ಕರುಣೆ ಇಲ್ಲದ ಕೋವಿಡ್ 19 ವೈರಸ್ ಅಟ್ಟಹಾಸ: ಆರು ವಾರದ ನವಜಾತ ಹಸುಳೆ ಸಾವು

ನ್ಯೂಯಾರ್ಕ್: ಮಾರಣಾಂತಿಕ ಕೋವಿಡ್ 19 ಸೋಂಕಿಗೆ ಆರು ವಾರದ ನವಜಾತ ಶಿಶು ಸಾವನ್ನಪ್ಪಿರುವ ಘಟನೆ ಅಮೆರಿಕದ ಕನೆಕ್ಟಿಕಟ್ ರಾಜ್ಯದಲ್ಲಿ ನಡೆದಿರುವುದಾಗಿ ಗವರ್ನರ್ ತಿಳಿಸಿದ್ದು, ಇದು ವೈರಸ್ ತಗುಲಿ ಸಾವನ್ನಪ್ಪಿರುವ ಅತೀ ಕಿರಿಯ ಶಿಶು ಎಂದು ದಾಖಲೆಯಾಗಿದೆ.

ಗವರ್ನರ್ ನೆಡ್ ಲ್ಯಾಮೋಂಟ್ ಟ್ವೀಟ್ ಮೂಲಕ, ಕಳೆದ ವಾರ ನವಜಾತ ಶಿಶು ಆಸ್ಪತ್ರೆಗೆ ದಾಖಲಾಗಿದ್ದು, ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿರುವುದಾಗಿ ವಿವರಿಸಿದ್ದಾರೆ. ನವಜಾತ ಶಿಶುವಿಗೆ ಕೋವಿಡ್ 19 ವೈರಸ್ ಇದ್ದಿರುವುದು ಕಳೆದ ರಾತ್ರಿ ವರದಿಯಲ್ಲಿ ದೃಢಪಟ್ಟಿತ್ತು.

ಇದೊಂದು ನಿಜಕ್ಕೂ ಹೃದಯವಿದ್ರಾವಕ ಘಟನೆಯಾಗಿದೆ. ಕೋವಿಡ್ 19 ಸೋಂಕಿಗೆ ಬಲಿಯಾಗಿರುವ ಮೊದಲ ನವಜಾತ ಶಿಶು ಇದಾಗಿದೆ. ಕಳೆದ ವಾರ ಅಮೆರಿಕದ ಇಲಿನಾಯ್ಸ್ ರಾಜ್ಯದಲ್ಲಿ ಒಂದು ವರ್ಷದ ಮಗು ಕೋವಿಡ್ 19 ಸಂಬಂಧಿತ ಲಕ್ಷಣದಿಂದ ಸಾವನ್ನಪ್ಪಿದ್ದು, ಈ ಬಗ್ಗೆ ವಿಶೇಷ ತನಿಖೆ ನಡೆಯುತ್ತಿದೆ ಎಂದು ವರದಿ ತಿಳಿಸಿದೆ.