ತೋಡಿಗೆ ಉರುಳಿ ಬಿದ್ದ ಕಾರು: ಎಲ್ಲ 6 ಮಂದಿ ಸ್ಥಳದಲ್ಲೇ ಸಾವು

ಗುವಾಹಟಿ : ಒಂದೇ ಕುಟುಂಬದ ಮೂವರು ಸೇರಿದಂತೆ ಒಟ್ಟು ಆರು ಮಂದಿ ಇಲ್ಲಿನ ಜಾಲೂಕ್‌ಬಾರಿ ಪ್ರದೇಶದಲ್ಲಿ ಇಂದು ಸೋಮವಾರ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿದ್ದಾರೆ. 

ವೇಗವಾಗಿ ಚಲಾಯಿಸುತ್ತಿದ್ದ ಕಾರಿನ ಚಾಲಕನಿಗೆ ತನ್ನ ವಾಹನದ ಮೇಲಿನ ನಿಯಂತ್ರಣ ತಪ್ಪಿ ಅದು ಅಡಿಮೇಲಾಗಿ ತೋಡಿಗೆ ಉರುಳಿ ಬಿತ್ತು. ಪರಿಣಾಮವಾಗಿ ಕಾರಿನ ಚಾಲಕ, ಇಬ್ಬರು ಮಕ್ಕಳು ಸೇರಿದಂತೆ,ಕಾರೊಳಗಿದ್ದ ಎಲ್ಲ ಆರು ಮಂದಿ ಸ್ಥಳದಲ್ಲೇ ಸಾವಪ್ಪಿದರು ಎಂದು ಪೊಲೀಸರು ತಿಳಿಸಿದ್ದಾರೆ. 

ಮೃತರನ್ನು ಭರತ್‌ ದಾಸ್‌, ಪತ್ನಿ ರೀನಾ ದಾಸ್‌, ಪುತ್ರ ಜ್ಯೋತಿರಾಜ್‌ ದಾಸ್‌, ಮತ್ತು ಇತರ ಮೂವರಾದ ಶಂಕರ್‌ ದಾಸ್‌, ದೀಪಮಣಿ ದಾಸ್‌ ಮತ್ತು ತೋರದಾಸ್‌ ಎಂದು ಗುರುತಿಸಲಾಗಿದೆ. 

ಮೃತ ದೇಹಗಳನ್ನು ಗುವಾಹಟಿ ಮೆಡಿಕಲ್‌ ಕಾಲೇಜ್‌ ಆಸ್ಪತ್ರೆಗೆ ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಲಾಗಿದೆ.