ಕನಕನ ತಂಗಿ

ಚಿತ್ರರಂಗಕ್ಕೆ ಬಾಲ ನಟ-ನಟಿಯರಾಗಿ ಎಂಟ್ರಿಕೊಡುವವರು ಮುಂದೆ ಹೀರೋ- ಹೀರೋಯಿನ್‌ ಆಗುವ ಕನಸು ಕಾಣುತ್ತಾರೆ. ಜೊತೆಗೆ ನಾಯಕಿಯ ಪುಟ್ಟ ತಂಗಿಯಾಗಿ ಕಾಣಿಸಿಕೊಳ್ಳುವವರಿಗೂ ಮುಂದೊಂದು ದಿನ ತಾನು ಕೂಡಾ ನಾಯಕಿಯಾಗಬೇಕೆಂಬ ಆಸೆ ಇರುತ್ತದೆ. ಅದಕ್ಕೆ ಸರಿಯಾಗಿ ಅವರ ಕುಟುಂಬ ವರ್ಗವೂ ಪ್ರೋತ್ಸಾಹ ನೀಡುತ್ತದೆ. ಈಗ ಯಾಕೆ ಈ ವಿಷಯ ಅಂದರೆ ಜೋಶಿಕಾ ಎಂಬ ಪುಟ್ಟ ಹುಡುಗಿಯ ಬಗ್ಗೆ ಹೇಳಬೇಕಾಗುತ್ತದೆ. ಯಾರು ಈ ಜೋಶಿಕಾ ಎಂದು ನೀವು ಕೇಳಬಹುದು. ಬಿಡುಗಡೆಗೆ ಸಿದ್ಧವಾಗಿರುವ “ಕನಕ’ ಚಿತ್ರದಲ್ಲಿ ನಾಯಕಿಯ ತಂಗಿ ಪಾತ್ರ ಮಾಡಿದ ಹುಡುಗಿ ಎನ್ನಬೇಕು.

ಹೌದು, ಆರ್‌.ಚಂದ್ರು ನಿರ್ದೇಶನದ ವಿಜಯ್‌ ನಾಯಕರಾಗಿರುವ “ಕನಕ’ ಚಿತ್ರದಲ್ಲಿ ಮಾನ್ವಿತಾ ಅವರ ತಂಗಿಯ ಪಾತ್ರದಲ್ಲಿ ಈ ಜೋಶಿಕಾ ನಟಿಸಿದ್ದಾರೆ. ಚಿಕ್ಕ ಪಾತ್ರವಾದರೂ ಜನರಿಗೆ ಇಷ್ಟವಾಗುವ ಪಾತ್ರವಂತೆ. ಅಂದಹಾಗೆ, ಜೋಶಿಕಾ ಅವರ ತಂದೆ ಪೊಲೀಸ್‌ ಇಲಾಖೆಯಲ್ಲಿದ್ದಾರೆ. ಅವರಿಗೆ ನಿರ್ದೇಶಕ ಆರ್‌. ಚಂದ್ರು ಅವರ ಪರಿಚಯಸ್ಥರು. ಚಂದ್ರು ಕೂಡಾ ಚಿತ್ರದ ತಂಗಿ ಪಾತ್ರಕ್ಕೆ ಹುಡುಕುತ್ತಿದ್ದಾಗ ಕಣ್ಣಿಗೆ ಬಿದ್ದವರು ಈ ಜೋಶಿಕಾ. ಪಾತ್ರಕ್ಕೆ ಹೊಂದಿಕೆಯಾಗುವುದರಿಂದ ಜೋಶಿಕಾರಿಂದಲೇ ತಂಗಿ ಪಾತ್ರ ಮಾಡಿಸಿದ್ದಾರೆ.

ಈಗ ಜೋಶಿಕಾ ಮತ್ತೂಂದು ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅದು ಕೂಡಾ “ದುನಿಯಾ’ ವಿಜಯ್‌ ಅವರ ಚಿತ್ರ. ವಿಜಯ್‌ ನಿರ್ಮಿಸಿ, ನಟಿಸುತ್ತಿರುವ “ಜಾನಿ ಜಾನಿ ಯೆಸ್‌ ಪಪ್ಪಾ’ ಚಿತ್ರದಲ್ಲೂ ಜೋಶಿಕಾ ಅವರಿಗೆ ತಂಗಿಯ ಪಾತ್ರ ಸಿಕ್ಕಿದೆ. ಸದ್ಯ 9ನೇ ತರಗತಿಯಲ್ಲಿ ಓದುತ್ತಿರುವ ಜೋಶಿಕಾಗೆ ಮುಂದೆ ಚಿತ್ರರಂಗದಲ್ಲೇ ಬೆಳೆಯುವ, ನಾಯಕಿಯಾಗುವ, ಒಳ್ಳೊಳ್ಳೆ ಪಾತ್ರ ಮಾಡುವ ಆಸೆ ಇದೆ. ಅದಕ್ಕೆ ಅವರ ಕುಟುಂಬದ ಬೆಂಬಲ ಕೂಡಾ ಇದೆಯಂತೆ. ಅವರ ಆಸೆ ಈಡೇರಲಿ

ರವಿ ರೈ