ಸಿಂಗಲ್‌ ಪೇರೆಂಟ್‌ ಪುರುಷರಿಗೂ ಇನ್ನು ಸಿಗಲಿದೆ 730 ದಿನಗಳ ಪಾಲನಾ ರಜೆ

ನವದೆಹಲಿ: ಸಿಂಗಲ್‌ ಪೇರೆಂಟ್‌ ಆಗಿರುವಂಥ ಅಂದರೆ, ಮಗುವನ್ನು ತಾನೇ ಪೋಷಣೆ ಮಾಡುತ್ತಿರುವಂಥ ಸರ್ಕಾರಿ ಉದ್ಯೋಗದಲ್ಲಿರುವ ಪುರುಷರಿಗೂ ಇನ್ನು ಮುಂದೆ 730 ದಿನಗಳ ಪಾಲನಾ ರಜೆ ಸಿಗಲಿದೆ. ಮಗುವಿನ ಲಾಲನೆ, ಪಾಲನೆ ದೃಷ್ಟಿಯಿಂದ ಅದನ್ನು ನೀಡಲು ನಿರ್ಧರಿಸಲಾಗಿದೆ. ಇದುವರೆಗೆ ಈ ಸೌಲಭ್ಯ ಮಹಿಳಾ ಉದ್ಯೋಗಿಗಳಿಗೆ ಮಾತ್ರ ಸಿಗುತ್ತಿತ್ತು. ಮಹಿಳಾ ಉದ್ಯೋಗಿಗಳಿಗೆ ಮಗುವಿನ ಲಾಲನೆ, ಪಾಲನೆಗಾಗಿ ವರ್ಷದಲ್ಲಿ ಮೂರು ಬಾರಿ ರಜೆಗೆ ಅವಕಾಶ ಉಂಟು. 

ಕುತೂಹಲಕಾರಿ ವಿಚಾರವೆಂದರೆ ನಮ್ಮ ದೇಶದಲ್ಲಿ ಸಿಂಗಲ್‌ ಪೇರೆಂಟ್‌ ಆಗಿರುವ ಹಾಗೂ ಸರ್ಕಾರಿ ಉದ್ಯೋಗದಲ್ಲಿರುವ ಪುರುಷರ ಸಂಖ್ಯೆ ಬಹಳಷ್ಟು ಕಡಿಮೆಯಿದೆ. ಆದರೆ, ಸರ್ಕಾರದ ಈ ನಿರ್ಧಾರದಿಂದ ಮಗುವಿನ ಪಾಲನೆಯಲ್ಲಿ ತಾಯಿಯ ಜತೆ ತಂದೆಯ ಪಾತ್ರವೂ ಮಹತ್ವದ್ದು ಎಂಬ ನಿರ್ಧಾರಕ್ಕೆ ಕೇಂದ್ರ ಸರ್ಕಾರ ಬಂದಂತಾಗಿದೆ. ಈ ಬಗ್ಗೆ ಕೇಂದ್ರ ಕೇಂದ್ರ ಸಿಬ್ಬಂದಿ ಮತ್ತು ತರಬೇತಿ ಇಲಾಖೆ ಆದೇಶ ಹೊರಡಿಸಿದ್ದು, ಇಲ್ಲಿ ಪುರುಷ “ಸಿಂಗಲ್‌’ ಪೇರೆಂಟ್‌ ಎಂಬ ವ್ಯಾಪ್ತಿಗೆ “ಅವಿವಾಹಿತ, ವಿಧುರ ಅಥವಾ ವಿಚ್ಛೇದಿತ ಸರ್ಕಾರಿ ಉದ್ಯೋಗದಲ್ಲಿರುವ ಪುರುಷರು’ ಸೇರುತ್ತಾರೆ. 7ನೇ ವೇತನ ಆಯೋಗದ ಶಿಫಾರಸಿನ ಹಿನ್ನೆಲೆ ಈ ಕ್ರಮ ಕೈಗೊಳ್ಳಲಾಗಿದೆ. 730 ದಿನಗಳ ರಜೆಯಲ್ಲಿ ಪೂರ್ತಿ ಸಂಬಳ ಪಾವತಿಸದೆ, ಶೇ.80ರಷ್ಟು ಮಾತ್ರ ನೀಡಲಾಗುತ್ತದೆ. ಮೊದಲ 365 ದಿನಗಳಿಗೆ ಪೂರ್ತಿ ವೇತನ ನೀಡಲಾಗುತ್ತದೆ ಎಂದು ಸಿಬ್ಬಂದಿ ಮತ್ತು ತರಬೇತಿ ಸಚಿವಾಲಯ ತನ್ನ ಆದೇಶದಲ್ಲಿ ತಿಳಿಸಿದೆ.