ಸ್ವಿಸ್‌ ಓಪನ್‌ ಸೂಪರ್‌ 300 ಬ್ಯಾಡ್ಮಿಂಟನ್‌ : ಪಿ.ವಿ. ಸಿಂಧು ಚಾಂಪಿಯನ್‌

ಬಾಸೆಲ್‌: ಭಾರತದ ಖ್ಯಾತ ಶಟ್ಲರ್‌ ಪಿ.ವಿ. ಸಿಂಧು ಸ್ವಿಸ್‌ ಓಪನ್‌ ಸೂಪರ್‌ 300 ಬ್ಯಾಡ್ಮಿಂಟನ್‌ ಕೂಟದ ವನಿತಾ ಸಿಂಗಲ್ಸ್‌ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. ಆದರೆ ಪುರುಷರ ವಿಭಾಗದ ಫೈನಲ್‌ನಲ್ಲಿ ಎಚ್‌.ಎಸ್‌. ಪ್ರಣಯ್‌ ಕಠಿನ ಹೋರಾಟದಲ್ಲಿ ಸೋತು ರನ್ನರ್ ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.

ಸತತ ಎರಡನೇ ಫೈನಲ್ಸ್‌ ನಲ್ಲಿ ಆಡಿದ ಎರಡು ಬಾರಿಯ ಒಲಿಂಪಿಕ್ಸ್‌ ಪದಕ ವಿಜೇತೆ ಸಿಂಧು ಅವರು ಥಾಯ್ಲೆಂಡಿನ ಬುಸಾನನ್‌ ಆಂಗ್ಬಮುರುಂಗಪ್ಪನ್‌ ಅವರನ್ನು 21-16, 21-8 ಗೇಮ್‌ಗಳಿಂದ ಮಣಿಸಿದರು. ಇದು ಸಿಂಧು ಅವರ ಈ ಋತುವಿನ ಎರಡನೇ ವನಿತಾ ಸಿಂಗಲ್ಸ್‌ ಪ್ರಶಸ್ತಿಯಾಗಿದೆ.

ಕೇವಲ 49 ನಿಮಿಷಗಳ ಹೋರಾಟ ದಲ್ಲಿ ನಾಲ್ಕನೇ ಶ್ರೇಯಾಂಕದ ಬುಸಾನನ್‌ ಅವರನ್ನು ಉರುಳಿಸಿದ ಸಿಂಧು ಕೊನೆಗೂ ಇಲ್ಲಿ ಪ್ರಶಸ್ತಿ ಗೆಲುವಿನ ಸಂಭ್ರಮ ಆಚರಿಸಿದರು.

ಇದನ್ನೂ ಓದಿ:ಐಪಿಎಲ್‌ 2022: ಬೆಂಗಳೂರು ವಿರುದ್ಧ ಪಂಜಾಬ್‌ ಕಿಂಗ್ಸ್‌ ಗೆ 5 ವಿಕೆಟ್‌ಗಳ ಭರ್ಜರಿ ಗೆಲುವು

ಮೋದಿ ಅಭಿನಂದನೆ
ಸ್ವಿಸ್‌ ಓಪನ್‌ ಪ್ರಶಸ್ತಿ ಗೆದ್ದ ಸಿಂಧು ಅವರನ್ನು ಪ್ರಧಾನಿ ಮೋದಿ ಅಭಿನಂದಿಸಿದ್ದಾರೆ. ಸಿಂಧು ಅವರ ಈ ಸಾಧನೆಯಿಂದ ಯುವ ಕ್ರೀಡಾಪಟು ಗಳಿಗೆ ಪ್ರೇರಣೆಯಾಗಲಿದೆ ಎಂದವರು ಹಾರೈಸಿದ್ದಾರೆ.

ಪ್ರಣಯ್‌ ರನ್ನರ್ ಅಪ್‌
ಪುರುಷರ ಫೈನಲ್‌ನಲ್ಲಿ ಪ್ರಣಯ್‌ ಗೆಲ್ಲಲು ಶಕ್ತಿಮೀರಿ ಪ್ರಯತ್ನಪಟ್ಟರೂ ಯಾವುದೇ ಪ್ರಯೋಜನವಾಗಲಿಲ್ಲ. ನಾಲ್ಕನೇ ಶ್ರೇಯಾಂಕದ ಇಂಡೋನೇಶ್ಯದ ಜೊನಾಥನ್‌ ಕ್ರಿಸ್ಟಿ ಅವರ ಸವಾಲಿಗೆ ದಿಟ್ಟ ಉತ್ತರ ನೀಡಲು ವಿಫ‌ಲರಾದ ಪ್ರಣಯ್‌ 12-21, 18-21 ಗೇಮ್‌ಗಳಿಂದ ಶರಣಾದರು. 48 ನಿಮಿಷಗಳ ವರೆಗೆ ಹೋರಾಡಿದ ಪ್ರಣಯ್‌ ಅಂತಿಮವಾಗಿ ರನ್ನರ್ ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು. ಜೊನಾಥನ್‌ ಅವರ ನಿಖರ ಮತ್ತು ಶಕ್ತಿಶಾಲಿ ಹೊಡೆತಕ್ಕೆ ಪ್ರಣಯ್‌ ನಿರುತ್ತರರಾದರು. ಕಳೆದ ಐದು ವರ್ಷಗಳಲ್ಲಿ ತನ್ನ ಮೊದಲ ಫೈನಲ್‌ ಪಂದ್ಯದಲ್ಲಿ ಆಡಿದ ಪ್ರಣಯ್‌ ದ್ವಿತೀಯ ಗೇಮ್‌ನಲ್ಲಿ ವೀರೋಚಿತ ಹೋರಾಟ ನೀಡಿದ್ದರು.