ಸಿದ್ದಾಪುರ: ತಾಯಿ, ಮಗುವಿಗೆ ಕೋವಿಡ್

ಸಿದ್ದಾಪುರ: ಬೆಂಗಳೂರಿನಿಂದ ಸಿದ್ದಾಪುರಕ್ಕೆ ಬಂದ ತಾಯಿ ಹಾಗೂ ಮಗುವಿಗೆ ಶುಕ್ರವಾರ ಕೋವಿಡ್‌-19 ಸೋಂಕು ಪತ್ತೆಯಾಗಿದ್ದು, ಮನೆಯವರು ಹಾಗೂ ಸಿದ್ದಾಪುರ ಪರಿಸರದ ಜನರು ಆತಂಕಕ್ಕೆ ಒಳಗಾಗಿದ್ದಾರೆ. ಇಲ್ಲಿನ ಬಡಾಬಾಳುವಿಗೆ ತಾಯಿ- ಮಗು ಸಹಿತ ಒಂದೇ ಮನೆಯ 5 ಮಂದಿ ಬೆಂಗಳೂರಿನಿಂದ ಬಂದಿದ್ದಾರೆ. ಸಿದ್ದಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಐದು ಮಂದಿಯ ಪರೀಕ್ಷೆ ನಡೆಸಲಾಗಿದ್ದು 30 ಪ್ರಾಯದ ತಾಯಿ ಹಾಗೂ 4 ವರ್ಷದ ಹೆಣ್ಣು ಮಗುವಿನ ಪರೀಕ್ಷೆಯ ವರದಿಯಲ್ಲಿ ಪಾಸಿಟಿವ್‌ ಬಂದಿದೆ. ಅವರಿಬ್ಬರನ್ನು ಕುಂದಾಪುರ ಕೊವೀಡ್‌ ಆಸ್ಪತ್ರೆಗೆ ಸ್ಥಳಾಂತರಿಸಲಾಗಿದೆ. ಮನೆ ಇನ್ನಷ್ಟೆ ಸಿಲ್‌ಡೌನ್‌ ಮಾಡಬೇಕಾಗಿದೆ.

ಸಿದ್ದಾಪುರದ 2 ಬಾಡಿಗೆ ವಾಹನ ಚಾಲಕರು ಬೆಂಗಳೂರಿನಿಂದ ಇವರನ್ನು ಕರೆತಂದಿದ್ದು, ಅವರಿಗೆ ಜು. 6ರಂದು ಕೊವೀಡ್‌ ಪರೀಕ್ಷೆಗೆ ಒಳಪಡುವಂತೆ ಸೂಚಿಸಲಾಗಿದೆ. ತಾಯಿ ಮತ್ತು ಮಗು ಪಾದರಾಯನಪುರದಿಂದ ಕಾರಿನಲ್ಲಿ ಬಂದಿದ್ದರು. ಜೆಪಿ ನಗರದಿಂದ ಇನ್ನೊಂದು ಕಾರಿನಲ್ಲಿ ದಂಪತಿ ಮತ್ತು ಮಗು ಆಗಮಿಸಿದ್ದರು.

ಸಿದ್ದಾಪುರ ಪ್ರಾ. ಆ. ಕೇಂದ್ರದಲ್ಲಿ ಜು. 1ರಂದು ಪ್ರಥಮ ಬಾರಿಗೆ ಪರೀಕ್ಷೆ ನಡೆಸಲು ಆರಂಭಿಸಿದ್ದು, 50 ಮಂದಿಯ ಗಂಟಲ ದ್ರವವನ್ನು ತೆಗೆದು ಮಣಿಪಾಲಕ್ಕೆ ಕಳುಹಿಸಲಾಗಿತ್ತು. 50 ಮಂದಿಯ ಪರೀಕ್ಷೆಯ ವರದಿ ಶುಕ್ರವಾರ ಸಿಕ್ಕಿದ್ದು, ಅದರಲ್ಲಿ 2 ಪಾಸಿಟಿವ್‌ ಬಂದಿದೆ.