ಸಿದ್ದರಾಮಯ್ಯ ಮಾತಿಗೆ ಕಿಮ್ಮತ್ತಿಲ್ಲ! ರಾಹುಲ್‌ ಬಾಯ್ಬಿಡ್ತಾರಾ ? 

ಬೆಂಗಳೂರು: ರಾಜ್ಯ ಪ್ರವಾಸದಲ್ಲಿರುವ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಅವರು ರಾಜ್ಯದಲ್ಲಿ ನಡೆಯುತ್ತಿರುವ ಕಾಂಗ್ರೆಸ್‌ ಗೂಂಡಾಗಿರಿ ಕುರಿತು ಬಾಯಿ ಬಿಡುತ್ತಾರಾ’ ಎಂದು ಸಂಸದೆ ಶೋಭಾ ಕರಂದ್ಲಾಜೆ ಪ್ರಶ್ನಿಸಿದ್ದಾರೆ. 

ಶನಿವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಶೋಭಾ ‘ಕಾಂಗ್ರೆಸ್‌ ದುರಹಂಕಾರ, ದರ್ಪದ ರಾಜಕಾರಣ ಮಾಡುತ್ತಿದೆ. ವಿದ್ವತ್‌ ಮೇಲೆ ಹಲ್ಲೆ ನಡೆಸಿದ ಗೂಂಡಾ ಮಹಮದ್‌ ಹ್ಯಾರಿಸ್‌ ನಲಪಾಡ್‌ನ‌ನ್ನು ಬಂಧಿಸಲು ಸಿಎಂ ಸಿದ್ದರಾಮಯ್ಯ ಆದೇಶ ನೀಡಿದ ಬಳಿಕ 38 ಗಂಟೆಗಳು ಬೇಕಾಯಿತು. ಸಿಎಂ ಮಾತಿಗೆ ಬೆಲೆ ಇಲ್ಲವೆ? ಸಿಎಂ ಮಾತಿಗೆ ಅಧಿಕಾರಿಗಳು ಕಿಮ್ಮತ್ತು ನೀಡುತ್ತಿಲ್ಲವೆ’ ಎಂದು ಪ್ರಶ್ನಿಸಿದರು. 

ಹಲ್ಲೆ ಆರೋಪಿ ಮಹಮದ್‌ ತಂದೆ ಹ್ಯಾರಿಸ್‌ ಅವರ ರಾಜೀನಾಮೆಯನ್ನು ಕಾಂಗ್ರೆಸ್‌ ಏಕೆ ಪಡೆದಿಲ್ಲ ? ಕಳೆದ 10 ದಿನಗಳಲ್ಲಿ ಬೆಂಗಳೂರಿನ ಸುತ್ತಮುತ್ತ ಹಲವು ಗೂಂಡಾಗಿರಿ ಪ್ರಕರಣಗಳನ್ನು ಕಾಂಗ್ರೆಸ್‌ ಬೆಂಬಲಿತರು ಮಾಡಿದ್ದಾರೆ. ಈ ಬಗ್ಗೆ ರಾಹುಲ್‌ ಬಾಯ್ಬಿಡಬೇಕು’ ಎಂದರು.