ಅಫ್ಘಾನ್ ತಂಡಕ್ಕೆ ಅಫ್ತಾಬ್ ಬದಲು ಶಿರ್ಜಾದ್ ಸೇರ್ಪಡೆ

ಲಂಡನ್: ವಿಶ್ವಕಪ್ ನಲ್ಲಿ ಈಗಾಗಲೇ ಸೋಲಿನ ಸುಳಿಯಲ್ಲಿ ಬಿದ್ದಿರುವ ಕ್ರಿಕೆಟ್ ಶಿಶು ಅಫ್ಘಾನಸ್ಥಾನ ತಂಡಕ್ಕೆ ಮತ್ತೊಂದು ಆಘಾತ ಎದುರಾಗಿದೆ. ಸ್ಟ್ರೈಕ್ ಬೌಲರ್ ಅಫ್ತಾಬ್ ಅಲಮ್ ಕೂಟದಿಂದ ಹೊರಬಿದ್ದಿದ್ದಾರೆ. ಅಫ್ತಾಬ್ ಬದಲು ಮತ್ತೊಬ್ಬ ಆಟಗಾರ ಸಯ್ಯದ್ ಅಹಮದ್ ಶಿರ್ಜಾದ್ ತಂಡ ಸೇರಿದ್ದಾರೆ.

ಅಫ್ತಾಬ್ ತಂಡದಿಂದ ಹೊರ ಬೀಳಲು ಅವರ ದುರ್ನಡತೆ ಕಾರಣ ಎಂದು ವರದಿಯಾಗಿದೆ. ಅವರು ವಿಚಾರಣೆಗೆ ಹಾಜರಾಗಬೇಕಿದೆ. ಈ ಕಾರಣ ಅವರು ಮುಂದಿನ ಪಂದ್ಯಗಳಿಗೆ ಲಭ್ಯರಾಗುವುದಿಲ್ಲ ಎಂದು ತಿಳಿದು ಬಂದಿದೆ.

ಗಾಯದ ಹೊರತಾಗಿ ಯಾವುದೇ ಆಟಗಾರರನ್ನು ಕೂಟದ ಮಧ್ಯೆ ಬದಲಿಸುವಂತಿಲ್ಲ. ಆದರೆ ಐಸಿಸಿಯ ವಿಶೇಷ ಅನುಮತಿಯ ಮೇರೆಗೆ ಈ ಬದಲಾವಣೆ ಮಾಡಲಾಗಿದೆ. ಅಫ್ತಾಬ್ ಅಲಮ್ ಈ ಕೂಟದಲ್ಲಿ ನಾಲ್ಕು ಪಂದ್ಯವಾಡಿದ್ದು ಒಟ್ಟು ಮೂರು ವಿಕೆಟ್ ಪಡೆದಿದ್ದಾರೆ. ಈ ಮೂರು ವಿಕೆಟ್ ಗಳು ಕೂಡಾ ನ್ಯೂಜಿಲ್ಯಾಂಡ್ ವಿರುದ್ದವೇ ಸಿಕ್ಕಿದೆ.

ತಂಡಕ್ಕೆ ಹೊಸದಾಗಿ ಸೇರಿದ ಶಿರ್ಜಾದ್, ಎಡಗೈ ವೇಗಿಯಾಗಿದ್ದು, ಐರ್ಲೆಂಡ್ ವಿರುದ್ಧ ಪದಾರ್ಪಣೆ ಮಾಡಿದ್ದರೂ, ಆ ಪಂದ್ಯ ಮಳೆಯಿಂದಾಗಿ ರದ್ದಾಗಿತ್ತು.