ಶಿರ್ವ: ಸ್ನೇಹಿತನ ನಂಬರ್‌ ಹ್ಯಾಕ್‌ ಮಾಡಿ ವಾಟ್ಸಪ್‌ ಮೂಲಕ ಮೆಸೇಜ್‌ ಕಳುಹಿಸಿ ಆನ್‌ಲೈನ್‌ ಮೂಲಕ ರೂ. 98,000/- ಹಣ ಪಡೆದು ವಂಚಿಸಿದ ಘಟನೆ ಶಿರ್ವದಲ್ಲಿ ನಡೆದಿದೆ.
ಶಿರ್ವದಲ್ಲಿ ಟ್ಯಾಕ್ಸ್‌ ಕನ್ಸಲ್ಟೆಂಟ್‌ ಕಚೇರಿ ಹೊಂದಿದ್ದ ರಮಾನಂದ ಅವರು ವಿದೇಶದಲ್ಲಿದ್ದ ಸ್ನೇಹಿತ ಕೋಡು ದಿವಾಕರ ಅವರಿಗೆ ತೆರಿಗೆ ವಿಚಾರದಲ್ಲಿ ಸಲಹೆ ನೀಡು ತ್ತಿದ್ದರು. ನ. 8 ರಂದು ರಮಾನಂದ ಅವರು ಸ್ನೇಹಿತ ದಿವಾಕರ್‌ ಅವರಿಗೆ ತೆರಿಗೆ ವಿಚಾರದಲ್ಲಿ ಮೆಸೇಜ್‌ ಮಾಡಿದ್ದು,ಅದಕ್ಕೆ ತಾನು ಮೀಟಿಂಗ್‌ನಲ್ಲಿ ಇದ್ದೇನೆ ಬಳಿಕ ಹೇಳುತ್ತೇನೆ ಎಂದು ಮೆಸೇಜ್‌ ಮಾಡಿದ್ದಾರೆ. ಬಳಿಕ ತನಗೆ ಇಂಡಿಯಾದಲ್ಲಿ ಮೆಡಿಕಲ್‌ ಹೆಲ್ಪ್ಗಾಗಿ ರೂ. 98,000/-ಅವಶ್ಯಕತೆಯಿದ್ದು ನೀಡಿದ ಖಾತೆಗೆ ಹಣ ಕಳುಹಿಸ ಬೇಕು ಎಂದು ಮೆಸೇಜ್‌ ಮಾಡಿದ್ದಾರೆ.
ರಮಾನಂದ ಅವರು ಆ ಖಾತೆಗೆ ಗೂಗಲ್‌ ಪೇ ಮೂಲಕ ಹಣ ಕಳುಹಿಸಲು ಪ್ರಯತ್ನಿಸಿದಾಗ ಅದು ಕನೆಕ್ಟ್ ಆಗದೇ ಇದ್ದು, ವಾಟ್ಸಪ್‌ನಲ್ಲಿ ನೀವು ಕಳುಹಿಸಿದ ಖಾತೆಗೆ ಹಣ ಹೋಗುವುದಿಲ್ಲ ಎಂದು ಮೆಸೇಜ್‌ ಮಾಡಿದಾಗ ಬೇರೊಂದು ಖಾತೆ ನಂಬ್ರ ನೀಡಿದ್ದಾರೆ.
ರಮಾನಂದ ಅವರಿಗೆ ದಿವಾಕರ ಅವರೊಂದಿಗೆ ಹಿಂದಿನಿಂದಲೂ ವ್ಯವಹಾರ ಇದ್ದುದರಿಂದ ಆಸ್ಪತ್ರೆ ವಿಚಾರವನ್ನು ನಂಬಿ ರೂ.98,000/- ಹಣವನ್ನು ಗೂಗಲ್‌ ಪೇ ಮೂಲಕ ಕಳುಹಿಸಿದ್ದಾರೆ.ಬಳಿಕ ಸ್ವಲ್ಪ ಹೊತ್ತಿನಲ್ಲಿ ಮೊತ್ತ ತಪ್ಪಾಗಿದೆ, ರೂ.5,98,000/- ಹಣ ಕಳುಹಿಸಿ ಎಂದು ಹೇಳಿ ಖಾತೆಯ ವಿವರ ನೀಡಿ ಮತ್ತೆ 5 ಲ.ರೂ. ಕಳುಹಿಸಿ ಎಂದು ಮೆಸೇಜ್‌ ಮಾಡಿದ್ದಾರೆ. ಇದನ್ನು ನೋಡಿದ ರಮಾನಂದ ಅವರು ತನ್ನ ಖಾತೆಯಲ್ಲಿ ಅಷ್ಟು ಹಣ ಇಲ್ಲ ಎಂದು ಮೆಸೇಜ್‌ ಮಾಡಿದ್ದು, ಕರೆ ಮಾಡಿದಾಗ ಕನೆಕ್ಟ್ ಆಗಲಿಲ್ಲ. ತಾನು ಮೀಟಿಂಗ್‌ನಲ್ಲಿ ಇದ್ದೇನೆ ಬಳಿಕ ಕರೆ ಮಾಡುತ್ತೇನೆ ಎಂದ ದಿವಾಕರ್‌ ಮತ್ತೆ ಕಾಲ್‌ ಮಾಡಿರಲಿಲ್ಲ.
ದಿವಾಕರ ಅವರು ಯಾವಾಗಲೂ ರಮಾನಂದ ಅವರಿಗೆ ಕೂಡಲೇವಾಪಾಸು ಮೆಸೇಜ್‌ ಮಾಡುತ್ತಿದ್ದು ಈ ಸಮಯದಲ್ಲಿ ಎಷ್ಟು ಹೊತ್ತಾದರೂ ಮೇಸೇಜ್‌ ಮಾಡದಿದ್ದುದನ್ನು ಕಂಡು ಸಂಶಯಗೊಂಡು ದಿವಾಕರ ಅವರ ಪತ್ನಿಯ ಮೊಬೈಲಿಗೆ ಮೆಸೇಜ್‌ ಮಾಡಿದಾಗ ಅವರ ವಾಟ್ಸಪ್‌ ಹ್ಯಾಕ್‌ ಆದ ವಿಚಾರ ತಿಳಿದು ಬಂದಿದೆ.
ಕೋಡು ದಿವಾಕರ ಅವರ ವಾಟ್ಸಪ್‌ನ್ನು ಯಾರೋ ಹ್ಯಾಕ್‌ ಮಾಡಿ ತಾನೇ ಕೋಡು ದಿವಾಕರ ಎಂದು ನಂಬಿಸಿ ಮೆಸೇಜ್‌ ಮಾಡಿ ಆನ್‌ಲೈನ್‌ ಮೂಲಕ ರೂ. 98,000/- ಹಣ ಪಡೆದು ವಂಚಿಸಿ ಮೋಸ ಮಾಡಿದ್ದಾರೆ ಎಂದು ರಮಾನಂದ ನೀಡಿದ ದೂರಿನಂತೆ ಶಿರ್ವ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
