ಮಾರುಕಟ್ಟೆಯಲ್ಲಿ ದೀಪಾವಳಿ ಧಮಾಕ ; 40 ಸಾವಿರ ಗಡಿ ದಾಟಿದ ಸೂಚ್ಯಂಕ

ಮುಂಬಯಿ: ದೇಶೀ ಶೇರು ಮಾರುಕಟ್ಟೆಯಲ್ಲಿ ಮಂಗಳವಾರದಂದು ಕಂಡುಬಂದಿದ್ದ ತೇಜಿ ವಾತಾವರಣ ಬುಧವಾರವೂ ಮುಂದುವರೆದಿದೆ. ಇದರಿಂದಾಗಿ ಸರಿ ಸುಮಾರು ಮೂರು ತಿಂಗಳುಗಳ ಬಳಿಕ ಸಂವೇದಿ ಸೂಚ್ಯಂಕ 40 ಸಾವಿರ ಅಂಕಗಳ ಗಡಿಯನ್ನು ದಾಟಿ ಹೂಡಿಕೆದಾರರ ಮುಖದಲ್ಲಿ ದೀಪಾವಳಿಯ ನಗುವನ್ನು ಮೂಡಿಸಿತು. 40 ಸಾವಿರದಿಂದ ಮುನ್ನುಗ್ಗಿ ಶೇರು ಗೂಳಿ ದೇಶೀ ಮಾರುಕಟ್ಟೆಯಲ್ಲಿ ಗುಟುರು ಹಾಕುತ್ತಿದ್ದು, ಆರ್ಥಿಕತೆ ಚೇತರಿಕೆಯ ಲಕ್ಷಣಗಳು ಕಂಡುಬರುತ್ತಿವೆ.

ಈ ವರ್ಷದ ಜೂನ್ ತಿಂಗಳಿನಲ್ಲಿ ಸೆನ್ಸೆಕ್ಸ್ 40,312 ಅಂಕಗಳನ್ನು ತಲುಪುವ ಮೂಲಕ ಸಾರ್ವಕಾಲಿಕ ದಾಖಲೆಯನ್ನು ಬರೆದಿತ್ತು. ಬುಧವಾರ ಬೆಳಗ್ಗಿನ ವಹಿವಾಟು ಸಂದರ್ಭದಲ್ಲೇ ಬಿ.ಎಸ್.ಇ. ಸಂವೇದಿ ಸೂಚ್ಯಂಕ 268 ಪಾಯಿಂಟ್ ಗಳ ಜಿಗಿತ ಕಂಡು 40 ಸಾವಿರ ಅಂಕಗಳ ಗಡಿ ದಾಟಿತು.

ಮಂಗಳವಾರದಂದು 11,787 ಅಂಶಗಳಲ್ಲಿ ವಹಿವಾಟು ಅಂತ್ಯಗೊಳಿಸಿದ್ದ ಶೇರುಪೇಟೆ ಇಂದು ಬೆಳಿಗ್ಗೆ 11,883 ಅಂಕಗಳಿಂದ ತನ್ನ ವಹಿವಾಟನ್ನು ಪ್ರಾರಂಭಗೊಳಿಸಿತು.

ಭಾರ್ತಿ ಏರ್ ಟೆಲ್, ಇನ್ಫೋಸಿಸ್, ಎಲ್. ಆ್ಯಂಡ್ ಟಿ, ಐಟಿಸಿ ವೇದಾಂತ, ಬಜಾಜ್ ಆಟೋ, ಕೋಟಕ್ ಬ್ಯಾಂಕ್ ಹಾಗೂ ಸನ್ ಫಾರ್ಮಾ ಶೇರುಗಳ ಬೆಲೆ ಶೇ.2ರಷ್ಟು ಹೆಚ್ಚಳ ಕಂಡಿದೆ. ಇನ್ನು ಟಾಟಾ ಮೋಟಾರ್ಸ್, ಯೆಸ್ ಬ್ಯಾಂಕ್, ಇಂಡಸ್ ಇಂಡ್ ಬ್ಯಾಂಕ್, ಟಾಟಾ ಸ್ಟೀಲ್, ಟಿಸಿಎಸ್ ಶೇರುಗಳ ಬೆಲೆಯಲ್ಲಿ ಕುಸಿತ ಉಂಟಾಗಿದೆ.