ಈ ಹಿಂದೆ “ನಮ್‌ ಏರಿಯಾಲ್‌ ಒಂದಿನ’, “ತುಘಲಕ್‌’, “ಹುಲಿ ರಾಯ’ ಚಿತ್ರಗಳನ್ನು ನಿರ್ದೇಶಿಸಿದ್ದ ಅರವಿಂದ್‌ ಕೌಶಿಕ್‌ ಈಗ “ಶಾರ್ದೂಲ’ ಎನ್ನುವ ಮತ್ತೂಂದು ಸಸ್ಪೆನ್ಸ್‌, ಥ್ರಿಲ್ಲರ್‌ ಚಿತ್ರಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶಿಸಿದ್ದು, ಶೀಘ್ರದಲ್ಲಿಯೇ ಚಿತ್ರವನ್ನು ತೆರೆಗೆ ತರುವ ತಯಾರಿಯಲ್ಲಿದ್ದಾರೆ.
ಚೇತನ್‌ ಚಂದ್ರ, ರವಿತೇಜ, ಕೃತ್ತಿಕಾ ರವೀಂದ್ರ, ಐಶ್ವರ್ಯ ಪ್ರಸಾದ್‌, ಕಲ್ಯಾಣ್‌, ಹೃಷಿಕೇಶ್‌, ಮಹೇಶ್‌ ಮುಂತಾದವರು ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿರುವ “ಶಾರ್ದೂಲ’ ಚಿತ್ರದ ಟೈಟಲ್‌ಗೆ “ದೆವ್ವ ಇರಬಹುದಾ?’ ಎಂಬ ಅಡಿಬರಹವಿದೆ.
ಸದ್ಯ ನಿಧಾನವಾಗಿ ಚಿತ್ರದ ಪ್ರಚಾರ ಕಾರ್ಯಗಳನ್ನು ಆರಂಭಿಸಿರುವ ಚಿತ್ರತಂಡ, ಇತ್ತೀಚೆಗೆ “ಶಾರ್ದೂಲ’ ಚಿತ್ರದ ಲಿರಿಕಲ್‌ ವಿಡಿಯೋ ಹಾಡನ್ನು “ಆನಂದ್‌ ಆಡಿಯೋ’ ಯು-ಟ್ಯೂಬ್‌ ಚಾನೆಲ್‌ನಲ್ಲಿ ಬಿಡುಗಡೆ ಮಾಡಿದೆ. ಸಂಚಿತ್‌ ಹೆಗಡೆ ಧ್ವನಿಯಲ್ಲಿ ಮೂಡಿಬಂದಿರುವ “ಒಂದು ಸಣ್ಣ ತಪ್ಪನ್ನು ಮಾಡಿ ಬಿಡಲೇ ನಾನು…’ ಎಂಬ ಈ ಹಾಡಿಗೆ ಅರವಿಂದ್‌ ಕೌಶಿಕ್‌ ಸಾಹಿತ್ಯವಿದ್ದು, ಸತೀಶ್‌ ಬಾಬು ಸಂಗೀತ ಸಂಯೋಜಿಸಿದ್ದಾರೆ.
“ಭೈರವ ಸಿನಿಮಾಸ್‌’ಮತ್ತು “ಸಿ.ವಿ.ಆರ್‌ ಸಿನಿಮಾಸ್‌’ಲಾಂಛನದಲ್ಲಿ ರೋಹಿತ್‌ ಶಾಂತಪ್ಪ ಹಾಗೂ ಕಲ್ಯಾಣ್‌ ಸಿ ನಿರ್ಮಿಸಿರುವ ಈ ಚಿತ್ರಕ್ಕೆ ವೈ.ಜಿ.ಆರ್‌ ಮನು ಛಾಯಾಗ್ರಹಣ, ಶಿವರಾಜ್‌ ಮೇಹು ಸಂಕಲನವಿದೆ. ಇನ್ನು ಬಿಡುಗಡೆಯಾಗಿರುವ ಚಿತ್ರದ ಲಿರಿಕಲ್‌ ವಿಡಿಯೋಗೆ ಉತ್ತಮ ಪ್ರತಿಕ್ರಿಯೆ ಸಿಗುತ್ತಿದೆ.
