ಟಿಟಿ ಪುರುಷರ ಡಬಲ್ಸ್‌ ಫೈನಲ್‌: ಶರತ್‌-ಸಥಿಯನ್‌ಗೆ ಬೆಳ್ಳಿ ಮಿಂಚು

ಬರ್ಮಿಂಗ್‌ಹ್ಯಾಮ್‌: ಪುರುಷರ ಟೇಬಲ್‌ ಟೆನಿಸ್‌ ಡಬಲ್ಸ್‌ ಫೈನಲ್‌ನಲ್ಲಿ ಭಾರತದ ಖ್ಯಾತ ಜೋಡಿ ಅಚಂತ ಶರತ್‌ ಕಮಲ್‌-ಜಿ.ಸಥಿಯನ್‌ ಸೋತು ಹೋಗಿದ್ದಾರೆ.

ಹೀಗಾಗಿ ಬೆಳ್ಳಿಗೆ ಸಮಾಧಾನ ಪಟ್ಟಿದ್ದಾರೆ. ಆತಿಥೇಯ ಇಂಗ್ಲೆಂಡ್‌ನ‌ ಎಂದಿನ ಎದುರಾಳಿಗಳಾದ ಪಾಲ್‌ ಡ್ರಿಂಕ್‌ಹಾಲ್‌-ಲಿಯಮ್‌ ಪಿಚ್‌ಫೋರ್ಡ್‌ರೆದುರು ಭಾರತೀಯ ಜೋಡಿ 11-8, 8-11, 3-11, 11-7, 4-11 ಗೇಮ್‌ಗಳಿಂದ ಸೋತು ಹೋಯಿತು.

ವಿಶೇಷವೆಂದರೆ 2018ರ ಗೋಲ್ಡ್‌ಕೋಸ್ಟ್‌ ಕಾಮನ್‌ವೆಲ್ತ್‌ ಫೈನಲ್‌ನಲ್ಲೂ ಭಾರತ ಸೋತಿತ್ತು. ಇನ್ನೂ ವಿಚಿತ್ರವೆಂದರೆ ಅಂಕಗಳೂ ಹೀಗೆಯೇ ಇದ್ದವು. ಪ್ರೇಕ್ಷಕರ ಸಮೂಹದಿಂದ ಭಾರತೀಯರು ಭರ್ಜರಿ ಬೆಂಬಲ ಪಡೆದುಕೊಂಡಿದ್ದರು. ಹಾಗಿದ್ದರೂ ಇಂಗ್ಲೆಂಡ್‌ ಅಭಿಮಾನಿಗಳು ಭಾರತೀಯರನ್ನು ಮೀರಿಸಿದ್ದರು!

ಮೊದಲ ಸೆಟ್‌ನಲ್ಲಿ ಗೆದ್ದಿದ್ದ ಭಾರತೀಯ ಜೋಡಿ, ಇದೇ ವೇಗವನ್ನು ಉಳಿದ ಸೆಟ್‌ಗಳಲ್ಲಿ ಕಾಪಾಡಿಕೊಳ್ಳಲಿಲ್ಲ. 2, 3ನೇ ಸೆಟ್‌ನಲ್ಲಿ ಸೋತುಹೋಯಿತು. 4ನೇ ಸೆಟ್‌ನಲ್ಲಿ ಗೆದ್ದಿದ್ದರಿಂದ ಪಂದ್ಯ ನಿರ್ಣಾಯಕ 5ನೇ ಸೆಟ್‌ಗೆ ಹೋಯಿತು. ಅಲ್ಲಿ ಭಾರತೀಯರು ಕೈಚೆಲ್ಲಿದರು. ಚಿನ್ನದ ನಗು ಇಂಗ್ಲೆಂಡ್‌ ಆಟಗಾರರಿಗೆ ಲಭಿಸಿತು.