ವಿಂಡೀಸ್‌ “ಸೈನಿಕ’ನಿಗೆ ಶಮಿ ಸೆಲ್ಯೂಟ್‌!

ಕಾಟ್ರೆಲ್‌  ಈ ಕೂಟದ ಆಕರ್ಷಣೆಯಲ್ಲಿ ಒಬ್ಬರಾಗಿದ್ದರು. ಪ್ರತೀ ವಿಕೆಟ್‌ ಕಿತ್ತ ಬಳಿಕ ಇವರು ಸೈನಿಕನ ಶಿಸ್ತಿನಲ್ಲಿ ಸೆಲ್ಯೂಟ್‌ ಹೊಡೆಯುತ್ತಿದ್ದುದೇ ಇದಕ್ಕೆ ಕಾರಣ (ಮಾರ್ಚ್‌ ಆ್ಯಂಡ್‌ ಸೆಲ್ಯೂಟ್‌).  ವೃತ್ತಿಯಲ್ಲಿ ಕಾಟ್ರೆಲ್‌ ಸೈನಿಕ ನಾಗಿರುವುದರಿಂದ ಅದೇ ಶಿಸ್ತನ್ನು ಕ್ರಿಕೆಟ್‌ ಅಂಗಳದಲ್ಲೂ ಪಾಲಿಸಿಕೊಂಡು ಬಂದಿದ್ದರು. ಭಾರತ-ವೆಸ್ಟ್‌ ಇಂಡೀಸ್‌ ಪಂದ್ಯದ ವೇಳೆಯೂ ಈ ಸೆಲ್ಯೂಟ್‌ ಪ್ರದರ್ಶನ ಮುಂದುವರಿದಿತ್ತು.

ಕೊನೆಯಲ್ಲಿ ಭಾರತದ ಯಶಸ್ವಿ ಬೌಲರ್‌ ಮೊಹಮ್ಮದ್‌ ಶಮಿ ಇದೇ ಸೆಲ್ಯೂಟ್‌ ಮೂಲಕ ಸುದ್ದಿಯಾದದ್ದು ಈ ಪಂದ್ಯದ ತಮಾಷೆಯ ಕ್ಷಣವಾಗಿ ದಾಖಲಾಗಿದೆ. 10ನೇ ಕ್ರಮಾಂಕದಲ್ಲಿ ಬ್ಯಾಟ್‌ ಹಿಡಿದು ಬಂದ ಕಾಟ್ರೆಲ್‌ 10 ರನ್‌ ಮಾಡಿ (1 ಬೌಂಡರಿ, 1 ಸಿಕ್ಸರ್‌) ಚಹಲ್‌ ಎಸೆತದಲ್ಲಿ ಲೆಗ್‌ ಬಿಫೋರ್‌ ಬಲೆಗೆ ಬಿದ್ದರು. ಅವರು ಪೆವಿಲಿಯನ್‌ನತ್ತ ಸಾಗುತ್ತಿದ್ದಾಗ ಮೊಹಮ್ಮದ್‌ ಶಮಿ, ಕಾಟ್ರೆಲ್‌ ರೀತಿಯಲ್ಲೇ ನಗುತ್ತ ಸೆಲ್ಯೂಟ್‌ ಮಾಡಿ ನಗು ಉಕ್ಕಿಸಿದರು.

ಕಾಟ್ರೆಲ್‌ ಉರುಳಿಸಿದ 2 ವಿಕೆಟ್‌ಗಳಲ್ಲಿ ಶಮಿ ವಿಕೆಟ್‌ ಕೂಡ ಸೇರಿತ್ತು. ಆಗಲೂ ಕಾಟ್ರೆಲ್‌ ಸೆಲ್ಯೂಟ್‌ ಹೊಡೆದಿದ್ದರು. ಕೊನೆಯಲ್ಲಿ ಶಮಿ ಇದಕ್ಕೆ “ಸೇಡು’ ತೀರಿಸಿಕೊಂಡರು, ಅಷ್ಟೇ!