ಮುಂಬಯಿ : ತನುಶ್ರೀ ದತ್ತ ಮತ್ತು ನಾನಾ ಪಾಟೇಕರ್‌ ನಡುವಿನ ಲೈಂಗಿಕ ಕಿರುಕುಳ ವಿವಾದವನ್ನು ಲಘುವಾಗಿ ಪರಿಗಣಿಸಿ, ನಕ್ಕು ಪ್ರತಿಕ್ರಿಯಿಸಿರುವ ಬಾಲಿವುಡ್‌ ಹಿರಿಯ ನಟ ಶಕ್ತಿ ಕಪೂರ್‌ “ಘಟನೆ ನಡೆದಾಗ ನಾನು ಮಗುವಾಗಿದ್ದೆ’ ಎಂದು ಹೇಳುವ ಮೂಲಕ ಶೂನ್ಯ ಸಂವೇದನೆಯನ್ನು ವ್ಯಕ್ತಪಡಿಸಿರುವುದು ಇಡಿಯ ಮಹಿಳಾ ಸಮುದಾಯಕ್ಕೆ ಅಚ್ಚರಿ, ಕೋಪ ಉಂಟು ಮಾಡಿದೆ.
ನಾನಾ ಪಾಟೇಕರ್‌ ವಿರುದ್ಧ ಮಾಜಿ ಮಿಸ್‌ ಇಂಡಿಯಾ ತನುಶ್ರೀ ದತ್ತ ಈಚೆಗೆ ತನ್ನ ಸಂದರ್ಶನದಲ್ಲಿ ಕೆಲವು ಗಂಭೀರ ಆರೋಪಗಳನ್ನು ಮಾಡಿದ್ದರು.
“ಹಾರ್ನ್ ಓಕೆ ಪ್ಲೀಸ್‌ಸ್‌’ ಚಿತ್ರದ ನೃತ್ಯದ ಶೂಟಿಂಗ್‌ 2008ರಲ್ಲಿ ನಡೆದಿದ್ದಾಗ ಪಾಟೇಕರ್‌ ತನಗೆ ಲೈಂಗಿಕ ಕಿರುಕುಳ ನೀಡಿದ್ದರು ಎಂದು ತನುಶ್ರೀ ಆರೋಪಿಸಿದ್ದರು.
ಆಶಿಕ್‌ ಬನಾಯಾ ಆಪ್‌ನೇ ಚಿತ್ರದ ಯಶಸ್ವೀ ನಟಿಯಾಗಿ ಗುರುತಿಸಲ್ಪಟ್ಟಿರುವ ತನುಶ್ರೀ ಅವರನ್ನು ಬಾಲಿವುಡ್‌ ನ ಅನೇಕ ತಾರೆಯರು ಬೆಂಬಲಿಸಿದ್ದರು. ಇನ್ನು ಕೆಲವು ಇದು ತನುಶ್ರೀ ಬೆಳ್ಳಿ ತೆರೆಗೆ ಮರಳಲು ಮಾಡಿರುವ ಪಬ್ಲಿಸಿಟಿ ಗಿಮಿಕ್‌ ಎಂದು ಜರೆದಿದ್ದರು.
ತನುಶ್ರೀ ವಿವಾದದ ಬಗ್ಗೆ ನಿಮ್ಮ ಪ್ರತಿಕ್ರಿಯೆ ಏನು ಎಂಬ ಮಾಧ್ಯಮದ ಪ್ರಶ್ನೆಗೆ ದೊಡ್ಡದಾಗಿ ನಕ್ಕಿರುವ ಶಕ್ತಿ ಕಪೂರ್‌, “ಅದೇನಿದ್ದರೂ ಹತ್ತು ವರ್ಷಗಳಷ್ಟು ಹಳೆಯ ವಿಷಯ; ಆಗಂತೂ ನಾನು ಮಗುವಾಗಿದ್ದೆ’ ಎಂದು ಹೇಳಿರುವುದು ಇನ್ನೊಂದೇ ವಿವಾದ ಸೃಷ್ಟಿಸಿದೆ.
“ನಾನು ನಿನ್ನೆಯಷ್ಟೇ ಅಮೆರಿಕದಿಂದ ಮರಳಿದ್ದೇನೆ. ನಾನು ಗಣಪತಿ ಬಪ್ಪಾ ಪೂಜೆಗಾಗಿ ಅಲ್ಲಿಗೆ ಹೋಗಿದ್ದೆ. ತನುಶ್ರೀ ಪ್ರಕರಣದ ಬಗ್ಗೆ ನನಗೇನೂ ಗೊತ್ತಿಲ್ಲ’ ಎಂದು ಶಕ್ತಿ ಕಪೂರ್‌ ಹೇಳಿದರು.
