ಹೈದರಾಬಾದ್: ಟಾಲಿವುಡ್ ಹಿರಿಯ ನಟಿ ಅನ್ನಪೂರ್ಣಾ ಚಿತ್ರರಂಗದಲ್ಲಿ ಇದೆ ಎನ್ನಲಾಗುತ್ತ ಬಂದಿರುವ ಕಾಸ್ಟಿಂಗ್ ಕೌಚ್ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಇತ್ತೀಚಿಗೆ ಸಂದರ್ಶನವೊಂದರಲ್ಲಿ ಮಾತಾಡಿರುವ ಅವರು, ಎಲ್ಲರಂಗದಲ್ಲಿಯೂ ಕಾಸ್ಟಿಂಗ್ ಕೌಚ್ ಅಸ್ತಿತ್ವದಲ್ಲಿದೆ ಎಂದಿದ್ದಾರೆ. ಅದನ್ನು ದೂರಮಾಡಲು ತಾವು ಕಂಡುಕೊಂಡ ಮಾರ್ಗದ ಬಗ್ಗೆ ಹೇಳಿಕೊಂಡಿರುವ ಅನ್ನಪೂರ್ಣಾ, ‘ನಾನು 20ನೇ ವಯಸ್ಸಿಗೆ ಮದುವೆಯಾದೆ ಎಂದಿದ್ದಾರೆ.
ನನಗೆ ನಾಯಕಿ ಪಾತ್ರಕ್ಕಾಗಿ ಸಾಕಷ್ಟು ಸಿನಿಮಾಗಳಿಂದ ಅವಕಾಶಗಳು ಅರಸಿ ಬಂದವು. ಆದರೆ, ನಾನು ಕೇವಲ ಎರಡು ಸಿನಿಮಾಗಳಲ್ಲಿ ಮಾತ್ರ ನಾಯಕಿ ನಟಿಯಾಗಿ ಅಭಿನಯಿಸಿದೆ. ನಂತರದ ದಿನಗಳಲ್ಲಿ ತಾಯಿಯಂತಹ ಪೋಷಕ ಪಾತ್ರಗಳಲ್ಲಿ ಅಭಿನಯಿಸಲು ಶುರು ಮಾಡಿದೆ ಎಂದು ಹೇಳಿದ್ದಾರೆ.
ಚಿತ್ರರಂಗದಲ್ಲಿ ಬೇರು ಬಿಟ್ಟಿರುವ ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿರುವ ಅವರು, ಎರಡೂ ಕಡೆಯಿಂದ ತಪ್ಪು ನಡೆಯುತ್ತದೆ. ಯಾರೂ ಕೂಡ ಯಾರನ್ನೂ ಕಾಂಪ್ರಮೈಸ್ ಮಾಡಿಕೊಳ್ಳಲು ಒತ್ತಾಯಿಸುವುದಿಲ್ಲ. ಇಬ್ಬರುಗಳ ಸಹಮತ ಇದ್ದಾಗ ಮಾತ್ರ ಇಂತಹ ತಪ್ಪುಗಳು ನಡೆಯುತ್ತವೆ. ಒಂದು ವೇಳೆ ಯಾರಾದರೂ ಅಂತಹ ಅನುಭವಕ್ಕೆ ತುತ್ತಾದರೆ /ಎದುರಿಸಿದರೆ ಅವರು ತಕ್ಷಣವೇ ಅದರ ವಿರುದ್ಧ ಧ್ವನಿ ಎತ್ತಬೇಕೆಂದು ಸೂಚಿಸಿದ್ದಾರೆ.
ಇನ್ನು ನಟಿ ಅನ್ನಪೂರ್ಣಾ ಅವರು 1975 ರಲ್ಲಿ ತೆರೆಕಂಡ ‘ಸ್ವರ್ಗಂ ನರಕಂ’ ಸಿನಿಮಾದ ಮೂಲಕ ಬಣ್ಣದ ಲೋಕಕ್ಕೆ ಪದಾರ್ಪಣೆ ಮಾಡಿದರು. ಅಲ್ಲಿಂದ ಶುರುವಾದ ಇವರ ಸಿನಿ ಪಯಣ ಇಂದಿಗೂ ಮುಂದುವರೆದಿದೆ. ಪ್ರಸ್ತುತ ಅವರು ವೆಂಕಟೇಶ್ ದಗ್ಗುಬಾಟಿ, ವರುಣ್ ತೇಜ್, ತಮನ್ನಾ ಭಾಟಿಯಾ ನಟಿಸುತ್ತಿರುವ ಸಿನಿಮಾವೊಂದರಲ್ಲಿ ಬಹುಮುಖ್ಯ ಪಾತ್ರ ನಿಭಾಯಿಸುತ್ತಿದ್ದಾರೆ.
