ಹುಬ್ಬಳ್ಳಿ: ನಗರ ಹೊರವಲಯದ ಹೊಸ ಗಬ್ಬೂರಿನ ರಿಲಾಯನ್ಸ್‌ ಮಾರ್ಕೆಟ್‌ ಎದುರು ನಿರ್ಮಾಣಗೊಳ್ಳುತ್ತಿರುವ ಧಾರವಾಡ ಪೂರ್ವ ವಿಭಾಗದ ಆರ್‌ಟಿಒ ಕಚೇರಿಯ ಕಟ್ಟಡ ಈ ವರ್ಷಾಂತ್ಯದಲ್ಲಿ ಪೂರ್ಣಗೊಂಡು ಕಾರ್ಯಾರಂಭವಾಗುವ ಸಾಧ್ಯತೆಗಳಿವೆ.
ಗಬ್ಬೂರಿನಲ್ಲಿಯ ಪ್ರಾದೇಶಿಕ ಸಾರಿಗೆ ಕಚೇರಿ (ಧಾರವಾಡ ಪೂರ್ವ)ಯ ಸ್ವಂತ ಕಟ್ಟಡ ಸುಮಾರು 1ಎಕರೆ 20 ಗುಂಟೆ ಜಾಗೆಯಲ್ಲಿ ನಿರ್ಮಾಣಗೊಳ್ಳುತ್ತಿದೆ. ಕೆಲ ತಾಂತ್ರಿಕ ಹಾಗೂ ಒಳಚರಂಡಿ ಮಾರ್ಗ ಸಮಸ್ಯೆ, ಕೋವಿಡ್ ಹಿನ್ನೆಲೆಯಲ್ಲಿ ಕಾಮಗಾರಿ ವಿಳಂಬವಾಗಿತ್ತು. ಈಗ ಅದೆಲ್ಲ ಅಡಚಣೆ ನಿವಾರಣೆಯಾಗಿದ್ದು, ಕಟ್ಟಡ ನಿರ್ಮಾಣದ ಗುತ್ತಿಗೆ ಪಡೆದಿರುವವರು ಮೇ ಅಂತ್ಯದೊಳಗೆ ಇದನ್ನು ಪೂರ್ಣಗೊಳಿಸಿ ಕೊಡುವುದಾಗಿ ಆರ್‌ಟಿಒ ಹಿರಿಯ ಅಧಿಕಾರಿಗಳಿಗೆ ಭರವಸೆ ಕೊಟ್ಟಿದ್ದಾರೆ.
ಆರ್‌ಟಿಒ ಧಾರವಾಡ ಪೂರ್ವ ಕಚೇರಿಯು ಅಂದಾಜು 10 ಕೋಟಿ ರೂ. ವೆಚ್ಚದಲ್ಲಿ ನೆಲಮಾಳಿಗೆ, ನೆಲಮಹಡಿ, ಮೊದಲ ಮಹಡಿ ಮಾದರಿಯಲ್ಲಿ ಸುಮಾರು 15 ಸಾವಿರ ಚದರಡಿಯಲ್ಲಿ ನಿರ್ಮಾಣವಾಗುತ್ತಿದೆ. ನಿರ್ಮಾಣದ ಹೊಣೆಯನ್ನು ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ (ಕೆಎಸ್‌ಆರ್‌ ಟಿಸಿ) ವಹಿಸಿಕೊಂಡಿದ್ದು, ಈಗ ಅದು ಧಾರವಾಡದ ಡಿ.ಬಿ. ಮಾಸೂರ ಕಂಪನಿಗೆ ಉಪ ಗುತ್ತಿಗೆ ನೀಡಿದೆ.
ಬೆಂಗಳೂರಿನ ವಿಸ್ಟಾರ್‌ ಕನ್ಸಲ್ಟಂಟ್ಸ್‌ ಕಟ್ಟಡದ ನೀಲನಕ್ಷೆ ಸಿದ್ಧಪಡಿಸಿದೆ. ಈ ಕಟ್ಟಡವು ನೆಲಮಾಳಿಗೆ 700 ಚಮೀ, ನೆಲಮಹಡಿ 800 ಚಮೀ, ಮೊದಲ ಮಹಡಿ 650 ಚಮೀನಂತೆ ಒಟ್ಟು 2150 ಚಮೀ ವಿಸ್ತೀರ್ಣದಲ್ಲಿ ನಿರ್ಮಾಣವಾಗುತ್ತಿದೆ. ಈಗಾಗಲೇ ನೆಲಮಹಡಿ ಮತ್ತು ಮೊದಲ ಮಹಡಿ ಕಾಮಗಾರಿ ಬಹುತೇಕ ಪೂರ್ಣಗೊಂಡಿದೆ. ಇವುಗಳ μನಿಶಿಂಗ್‌ ವರ್ಕ್‌ ಹಾಗೂ ರಿಟೇನಿಂಗ್‌ ವಾಲ್‌, ಕಾಂಪೌಂಡ್‌ ಗೋಡೆ, ನೆಲಹಾಸು, ವಾಹನಗಳ ಪಾರ್ಕಿಂಗ್‌ ಕೆಲಸ ಬಾಕಿ ಉಳಿದಿದೆ. ಈ ಕಟ್ಟಡವು ಪರಿಸರ ಸ್ನೇಹಿಯಾಗಿದ್ದು, ಸೋಲಾರ್‌ ಹಾಗೂ ಮಳೆಕೊಯ್ಲು ವ್ಯವಸ್ಥೆ ಹೊಂದಿರಲಿದೆ. ಆ ಮೂಲಕ ರಾಜ್ಯದಲ್ಲೇ ಅತ್ಯುತ್ತಮವಾದ ಆರ್‌ಟಿಒ ಕಚೇರಿ ಎಂಬ ಹೆಗ್ಗಳಿಕೆ ಇದರದ್ದಾಗಲಿದೆ.
2016ರಲ್ಲಿ ಸ್ಥಾಪನೆಗೊಂಡ ಕಚೇರಿ: 2016ರ ಜ. 7ರಂದು ಸ್ಥಾಪನೆಗೊಂಡ ಧಾರವಾಡ ಪೂರ್ವ ಪ್ರಾದೇಶಿಕ ಸಾರಿಗೆ ಕಚೇರಿ ಸದ್ಯ ಬಾಡಿಗೆ ಕಟ್ಟಡದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಈ ಕಚೇರಿಯ ಸ್ವಂತ ಕಟ್ಟಡದ ನಿರ್ಮಾಣ ಜವಾಬ್ದಾರಿಯನ್ನು 2018ರಲ್ಲಿ ಕರ್ನಾಟಕ ಗೃಹ ಮಂಡಳಿಯವರಿಗೆ ವಹಿಸಲು ತೀರ್ಮಾನಿಸಲಾಗಿತ್ತು. ಆದರೆ ನಂತರ ಕೆಲ ಕಾರಣಾಂತರಗಳಿಂದಾಗಿ ಮೊದಲಿನ ನೀಲನಕ್ಷೆಯಲ್ಲಿ ಒಂದಿಷ್ಟು ಮಾರ್ಪಾಡು ಮಾಡಿ ಅದರ ಹೊಣೆಯನ್ನು ಕೆಎಸ್‌ಆರ್‌ಟಿಸಿಗೆ ವಹಿಸಲಾಯಿತು.
ಧಾರವಾಡ ಪೂರ್ವ ಕಚೇರಿಯ ಸ್ವಂತ ಕಟ್ಟಡ ನಿರ್ಮಾಣಕ್ಕಾಗಿ ಶಾಸಕ ಪ್ರಸಾದ ಅಬ್ಬಯ್ಯ ಹೆಚ್ಚಿನ ಮುತುವರ್ಜಿ ವಹಿಸಿದ್ದು, ಈಗ ಅದು ಪೂರ್ಣಗೊಳ್ಳುವ ಹಂತಕ್ಕೆ ಬಂದಿದೆ. ಅಂದುಕೊಂಡಂತೆ ಗುತ್ತಿಗೆದಾರರು ಮೇ ಅಂತ್ಯದೊಳಗೆ ಕಟ್ಟಡ ನಿರ್ಮಾಣ ಕಾರ್ಯ ಪೂರ್ಣಗೊಳಿಸಿಕೊಟ್ಟರೆ ವರ್ಷಾಂತ್ಯದೊಳಗೆ ಈ ಕಚೇರಿಯು ತನ್ನ ಸ್ವಂತ ಕಟ್ಟಡದಲ್ಲಿ ಕಾರ್ಯಾರಂಭಗೊಳ್ಳಲಿದೆ. ಆದರೆ ಇಲ್ಲಿ ಚಾಲನಾ ಪಥ (ಡ್ರೈವಿಂಗ್‌ ಟ್ರಾÂಕ್‌) ಹಾಗೂ ವಾಹನಗಳನ್ನು ತಾಂತ್ರಿಕವಾಗಿ ತಪಾಸಣೆಗೊಳಪಡಿಸಿ ಸದೃಢತೆ ಪ್ರಮಾಣಪತ್ರ ನೀಡಲು μಟ್‌ನೆಸ್‌ ಸೆಂಟರ್‌ ಇಲ್ಲ.
ಈ ಆರ್‌ಟಿಒ ಕಚೇರಿಗೆ ಇವೆರಡು ಕೇಂದ್ರಗಳ ಅವಶ್ಯಕತೆಯಿದೆ. ಅಂದಾಗ ಮಾತ್ರ ಧಾರವಾಡ ಪೂರ್ವ ಆರೊÂ ಕಚೇರಿ ಪರಿಪೂರ್ಣತೆ ಹೊಂದಿದ ಕಚೇರಿಯಾಗಲಿದೆ. ಸದ್ಯ ಈ ಕಚೇರಿಯವರು ಚಾಲನಾ ಪಥಕ್ಕಾಗಿ ರಾಯಾಪುರಕ್ಕೆ ಹೋಗಬೇಕಾಗಿದೆ.
