ದೇವಾಲಯದಲ್ಲಿ ನಿಧಿಗಾಗಿ ಶೋಧ

ಆನಂದಪುರ: ಸಮೀಪದ ಕಾಸ್ಪಾಡಿ ಗ್ರಾಮದ ಈಶ್ವರ- ಬಸವಣ್ಣ ದೇವಸ್ಥಾನದಲ್ಲಿ ದೇವರ ಪಾಣಿಪೀಠ ಕಿತ್ತು ನಿಧಿಗಾಗಿ ಶೋಧ ನಡೆಸಿದ ಘಟನೆ ನಡೆದಿದೆ.

ದೇವಾಲಯದಲ್ಲಿ ನಿಧಿ ಇರಬಹುದೆಂದು ದೇವರ ಪಾಣಿಪೀಠ ಮೂರ್ತಿಗಳನ್ನು ಕಿತ್ತು ಸುಮಾರು ಎರಡರಿಂದ ಮೂರು ಅಡಿ ಆಳದ ಗುಂಡಿಯನ್ನು ಮಾಡಿ ನಿಧಿಗಾಗಿ ಶೋಧ ನಡೆಸಿದ್ದಾರೆ.

ಗ್ರಾಮಸ್ಥರಿಂದ ಈ ದೇವಾಲಯದಲ್ಲಿ ವಾರಕ್ಕೆ ಒಂದು ದಿನ ದೇವರಿಗೆ ಪೂಜೆ ನಡೆಯುತ್ತಿತ್ತು. ದೇವರ ಮೂರ್ತಿಯ ಕೆಳಭಾಗದಲ್ಲಿ ಚೌಕಾಕಾರದ ಬಾಕ್ಸ್‌ ರೀತಿಯಲ್ಲಿ ಗೋಚರವಾಗಿದೆ. ನಿಧಿ ಇರಬಹುದಾದ ಬಾಕ್ಸ್‌ ಇದಾಗಿರಬಹುದೆಂದು ಸ್ಥಳೀಯರು ಅನುಮಾನಿಸುತ್ತಿದ್ದಾರೆ.

ಸಾಗರ ಗ್ರಾಮಾಂತರ ಠಾಣೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.