Scuba Diving ವೇಳೆ ಅವಘಡ: ಮಂಗಳೂರಿನ ಉದ್ಯಮಿ ಓಶಿನ್‌ ಪಿರೇರಾ ಥಾಯ್ಲೆಂಡ್‌ನ‌ಲ್ಲಿ ಸಾವು

ಮಂಗಳೂರು: ನಗರದ ಮಹಿಳಾ ಉದ್ಯಮಿ ಓಶಿನ್‌ ಪಿರೇರಾ (28) ಎ. 11ರಂದು ಥಾಯ್ಲೆಂಡ್‌ನ‌ಲ್ಲಿ ಮೃತಪಟ್ಟಿದ್ದಾರೆ.
ರಜಾ ದಿನ ಕಳೆಯಲು ಎರಡು ದಿನಗಳ ಹಿಂದೆ ಥಾಯ್ಲೆಂಡ್‌ಗೆ ತೆರಳಿದ್ದ ಅವರು ಮಂಗಳವಾರ ಸ್ಕೂಬಾ ಡೈವಿಂಗ್‌ ವೇಳೆ ಮೃತಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ.

ಮಂಗಳೂರು ಬೇಕಿಂಗ್‌ ಕಂಪೆನಿಯ ಮಾಲಕಿಯಾಗಿದ್ದ ಅವರು ನಗರದ ಗೋರಿಗುಡ್ಡ ನಿವಾಸಿಗಳಾದ ದಿ| ಆಸ್ಕರ್‌ ಮಾರ್ಟಿನ್‌ ಪಿರೇರಾ ಮತ್ತು ಒಲಿವಿಯಾ ಪಿರೇರಾ ಅವರ ಪುತ್ರಿ. ಅವರ ಕುಟುಂಬ ಹಂಪನಕಟ್ಟೆಯಲ್ಲಿ ಪಿರೇರಾ ರೆಸ್ಟೋರೆಂಟ್‌ ಹೊಂದಿದೆ. ಸಾವಿನ ಸುದ್ದಿ ತಿಳಿಯುತ್ತಲೇ ಓಶಿನ್‌ ಪಿರೇರಾ ಅವರ ತಾಯಿ ಮಂಗಳವಾರ ಥಾಯ್ಲೆಂಡ್‌ಗೆ ತೆರಳಿದ್ದಾರೆ. ಅವರು ತಾಯಿ ಮತ್ತು ಸಹೋದರನನ್ನು ಅಗಲಿದ್ದಾರೆ.