ಸ್ಪೆಲಿಂಗ್‌ ಬೀ ಸ್ಪರ್ಧೆ : ಅಮೆರಿಕದಲ್ಲಿ ಮಿಂಚಿದ ಕುಂದಾಪುರದ ಅಕ್ಕ-ತಂಗಿ

ಸಿದ್ದಾಪುರ: ಅಮೆರಿಕದ ಕೊಲಂಬಿಯಾ ಮಿಸೋರಿಯನ್‌ ರೀಜನಲ್‌ ಸ್ಪೆಲಿಂಗ್‌ ಬೀ ಸ್ಪರ್ಧೆಯಲ್ಲಿ ಕುಂದಾಪುರ ತಾಲೂಕಿನ ಅಂಪಾರು ಗ್ರಾಮದ ಬಾಳೆಬೇರು ಮನೆ ಮೂಲದ ಜೀಯಾ ಶೆಟ್ಟಿ ಪ್ರಥಮ ಸ್ಥಾನ ಪಡೆದಿದ್ದು, ರಾಷ್ಟ್ರ ಮಟ್ಟದ ಸ್ಪರ್ಧೆಗೆ ಆಯ್ಕೆಯಾಗಿದ್ದಾರೆ. ವಿಶೇಷ ಎಂದರೆ, ಪ್ರಾದೇಶಿಕ ಹಂತದ ಸ್ಪರ್ಧೆಯಲ್ಲಿ ಆಕೆಗೆ ಎದುರಾಳಿಯಾಗಿ ಇದ್ದದ್ದು ಸಹೋದರಿ ಅನ್ಯಾ ಶೆಟ್ಟಿ.

ಇವರಿಬ್ಬರು ಅಮೆರಿಕದಲ್ಲಿರುವ ಬಾಳೆಬೇರು ಮನೆಯ ಡಾ| ಪವನ್‌ ಕುಮಾರ್‌ ಶೆಟ್ಟಿ ಮತ್ತು ಚೈತ್ರಾ ಪಿ. ಶೆಟ್ಟಿ ದಂಪತಿಯ ಪುತ್ರಿಯರು. 14 ವರ್ಷದ ಜೀಯಾ ಶೆಟ್ಟಿ ಕಳೆದ ವರ್ಷವೂ ಈ ಸ್ಪರ್ಧೆಯಲ್ಲಿ ರೀಜನಲ್‌ ಚಾಂಪಿಯನ್‌ ಆಗಿದ್ದರು. ಆದರೆ ಕಳೆದ ವರ್ಷದ ಸ್ಪರ್ಧೆ ಕೋವಿಡ್‌ ಕಾರಣ ಮುಂದುವರಿದಿರಲಿಲ್ಲ. ಈ ಬಾರಿ ಆಕೆಯ ಸಹೋದರಿ, 10 ವರ್ಷದ ಅನ್ಯಾ ಶೆಟ್ಟಿ ಅಂತಿಮ ಸುತ್ತಿನಲ್ಲಿ ಅಕ್ಕನಿಗೆ ಸ್ಪರ್ಧಿಯಾಗಿದ್ದರು. ಕಳೆದ ವರ್ಷ ಅನ್ಯಾ ಕೂಡ ಸ್ಪರ್ಧಿಸಿದ್ದರೂ ಅಂತಿಮ ಹಂತದಲ್ಲಿ ವಿಫ‌ಲರಾಗಿದ್ದರು.

ನಾವು ವಯಸ್ಸಿನಲ್ಲಿ ಹೆಚ್ಚು ಅಂತರ ಹೊಂದಿಲ್ಲ. ಜತೆಗೆ ಅನೇಕ ಸಮಾನ ಆಸಕ್ತಿಗಳನ್ನು ಹೊಂದಿದ್ದೇವೆ. ಯಾರು ಉತ್ತಮ ಎನ್ನುವ ಸ್ಪರ್ಧೆ ನಮ್ಮೊಳಗೆ!

– ಅನ್ಯಾ ಶೆಟ್ಟಿ

ಓದಿನ ಮೂಲಕ ನಾನು ಅನೇಕ ಪದಗಳ ಸ್ಪೆಲ್ಲಿಂಗ್‌ ಪರಿಚಯಿಸಿಕೊಳ್ಳುತ್ತೇನೆ. ಜತೆಗೆ ಹೊಸ ಪದಗಳನ್ನು ಎಲ್ಲೆಲ್ಲಿ ಸಾಧ್ಯವೋ ಅಲ್ಲೆಲ್ಲ ಪರಿಚಯ ಮಾಡಿಕೊಳ್ಳುತ್ತೇನೆ.
– ಜೀಯಾ ಶೆಟ್ಟಿ

ಸ್ಪರ್ಧೆ ಅಕ್ಕ-ತಂಗಿಯ ನಡುವೆ ಅಲ್ಲ; ಇಬ್ಬರೂ ತಮ್ಮ ಎದುರಾಗಿ ತಾವೇ ಸ್ಪರ್ಧಿಸಿಕೊಳ್ಳುತ್ತಾರೆ.
– ಚೈತ್ರಾ ಶೆಟ್ಟಿ, ಜೀಯಾ-ಅನ್ಯಾ ಅವರ ತಾಯಿ