ರಿಯೋ ಓಪನ್‌ ಗೆದ್ದ ಡೀಗೊ ಶಾರ್ಟ್ಸ್ ಮನ್‌

ರಿಯೋ ಡಿ ಜನೈರೊ: ಆರ್ಜೆಂಟೀನಾದ ಡೀಗೊ ಶಾರ್ಟ್ಸ್ಮನ್‌ 2 ವರ್ಷಗಳ ಕಾಯುವಿಕೆಯ ಬಳಿಕ ಎಟಿಪಿ ಟೆನಿಸ್‌ ಪ್ರಶಸ್ತಿಯೊಂದನ್ನು ಗೆದ್ದಿದ್ದಾರೆ. ಅವರು ರಿಯೋ ಓಪನ್‌ ಟೆನಿಸ್‌ ಟೂರ್ನಿಯಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿದರು.

ವಿಶ್ವದ 23ನೇ ರ್‍ಯಾಂಕಿಂಗ್‌ನ ಶಾರ್ಟ್ಸ್ಮನ್‌ ರವಿವಾರ ರಾತ್ರಿ ನಡೆದ ಫೈನಲ್‌ನಲ್ಲಿ ಸ್ಪೇನಿನ ಫೆರ್ನಾಂಡೊ ವೆರ್ದಸ್ಕೊ ಅವರನ್ನು 6-2, 6-3ರಿಂದ ಮಣಿಸಿದರು. ಶಾರ್ಟ್ಸ್ಮನ್‌ ಇದೇ ಕೂಟದ ಡಬಲ್ಸ್‌ನಲ್ಲೂ ಫೈನಲ್‌ ತಲುಪಿದ್ದರು. ಆದರೆ ಅಲ್ಲಿ ಪ್ರಶಸ್ತಿ ಎತ್ತಲಾಗಲಿಲ್ಲ. ವಿಪರೀತ ದಣಿದರೂ ಸಿಂಗಲ್ಸ್‌ ಹೋರಾಟದಲ್ಲಿ ಪಟ್ಟು ಸಡಿಲಿಸಲಿಲ್ಲ.

“ನಾನು ಬಹಳ ಸುಸ್ತಾಗಿದ್ದೆ. ಆದರೆ ತಾಳ್ಮೆಯ ಆಟವಾಡಿದೆ. 2 ವರ್ಷಗಳ ಬಳಿಕ ಟೆನಿಸ್‌ ಪ್ರಶಸ್ತಿಯೊಂದನ್ನು ಗೆದ್ದಿರುವುದಕ್ಕೆ ಬಹಳ ಖುಷಿಯಾಗಿದೆ. ನನ್ನ ಪಾಲಿಗೆ ಇದು ಪರಿಪೂರ್ಣ ವಾರವಾಗಿತ್ತು’ ಎಂದು ಶಾರ್ಟ್ಸ್ಮನ್‌ ಹೇಳಿದರು.