IPL 2024; ಐಪಿಎಲ್ ನಲ್ಲಿ 5 ಬಿಲಿಯನ್ ಡಾಲರ್ ಹೂಡಿಕೆಗೆ ಮುಂದಾದ ಸೌದಿ ಅರೇಬಿಯಾ

ದುಬೈ: ದೇಶದ ಅತ್ಯಂತ ಕ್ರೀಡಾ ಸಂಸ್ಥೆ ಎಂದೇ ಖ್ಯಾತವೆತ್ತಿರುವ ಬಿಸಿಸಿಐನ ಅಂಗ ಸಂಸ್ಥೆ ಐಪಿಎಲ್‌ನಲ್ಲಿ 5 ಬಿಲಿಯನ್‌ ಡಾಲರ್‌ನಷ್ಟು ಹೂಡಿಕೆ ಮಾಡಲು ಸೌದಿ ಅರೇಬಿಯಾ ಮುಂದಾಗಿದೆ.

ಕಳೆದ ಸೆಪ್ಟೆಂಬರ್‌ನಲ್ಲಿ ಭಾರತಕ್ಕೆ ಬಂದಿದ್ದ ಸೌದಿ ರಾಜಕುಮಾರ ಮೊಹಮ್ಮದ್‌ ಬಿನ್‌ ಸಲ್ಮಾನ್‌ ಈ ಸಂಬಂಧ ಮಾತುಕತೆ ನಡೆಸಿದ್ದಾರೆ. ಹೀಗಾಗಿ, ಐಪಿಎಲ್‌ ಅನ್ನು ಒಂದು ಹೋಲ್ಡಿಂಗ್‌ ಕಂಪನಿಯನ್ನಾಗಿ ಮಾಡಿ, ಇದರಲ್ಲಿ ಸೌದಿ ಅರೆಬಿಯಾದಿಂದ 5 ಬಿಲಿಯನ್‌ ಅಮೆರಿಕನ್‌ ಡಾಲರ್‌ ನಷ್ಟು ಹೂಡಿಕೆಯಾಗುವ ಸಾಧ್ಯತೆ ಇದೆ.

ಈ ಮೂಲಕ ಐಪಿಎಲ್‌ ಅನ್ನು ಇತರೆ ದೇಶಗಳಿಗೂ ವಿಸ್ತರಿಸುವ ಸಾಧ್ಯತೆಗಳೂ ದಟ್ಟವಾಗಿವೆ. 2008ರಲ್ಲಿ ಆರಂಭವಾದ ಐಪಿಎಲ್‌, ಈಗ ವಿಶ್ವವಿಖ್ಯಾತಿ ಪಡೆದಿದೆ. ಪಾಕಿಸ್ತಾನ ಹೊರತುಪಡಿಸಿ, ಉಳಿದೆಲ್ಲ ದೇಶಗಳ ಆಟಗಾರರು ಇದರಲ್ಲಿ ಭಾಗಿಯಾಗುತ್ತಿದ್ದಾರೆ.

ಡಿ.19ಕ್ಕೆ ಹರಾಜು?: 2024ನೇ ಸಾಲಿನ ಐಪಿಎಲ್‌ಗಾಗಿ ಇದೇ ಡಿ.19ರಂದು ಹರಾಜು ಪ್ರಕ್ರಿಯೆ ನಡೆಯಲಿದ್ದು, ಇದೇ ಮೊದಲ ಬಾರಿಗೆ ದುಬೈ ಆತಿಥ್ಯ ವಹಿಸಲಿದೆ. ಅಲ್ಲದೆ, ಪ್ರತಿಯೊಂದು ತಂಡಕ್ಕೂ 100 ಕೋಟಿ ರೂ. ಮಿತಿ ಹಾಕಲಾಗಿದೆ ಎಂದು ಹೇಳಲಾಗಿದೆ.