IPL 2025: ಗಾವಸ್ಕರ್‌ ಹೇಳಿಕೆಯನ್ನು ಅಲ್ಲಗಳೆದ ರಿಷಭ್‌ ಪಂತ್‌

ಹೊಸದಿಲ್ಲಿ: ತನ್ನ ಕುರಿತು ಲೆಜೆಂಡ್ರಿ ಕ್ರಿಕೆಟಿಗ ಸುನೀಲ್‌ ಗಾವಸ್ಕರ್‌ ನೀಡಿದ ಹೇಳಿಕೆಯೊಂದನ್ನು ರಿಷಭ್‌ ಪಂತ್‌ ಅಲ್ಲಗಳೆದಿದ್ದಾರೆ.

“ಉಳಿಕೆಯ ಸಂಭಾವನೆ’ಯಲ್ಲಿ ಅತೃಪ್ತಿ ಹೊಂದಿದ ಕಾರಣ ದಿಂದಲೇ ಪಂತ್‌ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡದಿಂದ ಬೇರ್ಪಡ ಬೇಕಾಯಿತು ಎಂಬ ಅರ್ಥ ಬರುವಂತೆ ಸುನೀಲ್‌ ಗಾವಸ್ಕರ್‌ ಇತ್ತೀಚೆಗೆ ಹೇಳಿದ್ದರು. ಆದರೆ ಮಂಗವಾರ ಟ್ವೀಟ್‌ ಮಾಡಿದ ಪಂತ್‌, ಇದನ್ನು ಅಲ್ಲಗಳೆದಿದ್ದಾರೆ. ತಾನು ಡೆಲ್ಲಿ ತಂಡದಿಂದ ಬೇರ್ಪಡಲು ಗಾವಸ್ಕರ್‌ ಅಂದುಕೊಂಡಂತೆ ಸಂಭಾವನೆಯ ವಿಚಾರ ಕಾರಣವಲ್ಲ ಎಂದು ಖಚಿತವಾಗಿ ಹೇಳಬಲ್ಲೆ ಎಂದು ಪ್ರತಿಕ್ರಿಯಿಸಿದ್ದಾರೆ.

“ಡೆಲ್ಲಿ ತಂಡ ಪಂತ್‌ ಅವರನ್ನು ಮರಳಿ ತನ್ನ ತೆಕ್ಕೆಗೆ ಸೇರಿಸಿಕೊಳ್ಳಲೇ ಬೇಕು. ಕೆಲವೊಮ್ಮೆ ಪ್ರಮುಖ ಆಟಗಾರರನ್ನು ಕೈಬಿಟ್ಟಾಗ ಇದಕ್ಕೆ ಸಂಭಾವನೆಯ ವಿಷಯವೇ ಮುಖ್ಯ ಕಾರಣವಾಗಿರುತ್ತದೆ. ಪಂತ್‌ ಮತ್ತು ಡೆಲ್ಲಿ ಫ್ರಾಂಚೈಸಿ ವಿಷಯದಲ್ಲೂ ಹೀಗೆಯೇ ಆಗಿರಬಹುದು’ ಎಂದು ಗಾವಸ್ಕರ್‌ ಹೇಳಿದ್ದರು.