ಡ್ರೋನ್‌ ನಿಯಂತ್ರಣಕ್ಕೆ ಜಿಸ್ಯಾಟ್‌ 7ಎ

ನವದೆಹಲಿ: ಡ್ರೋನ್‌ಗಳನ್ನು ನಿಯಂತ್ರಿಸುವ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಯನ್ನು ನಿರೀಕ್ಷಿಸಲಾಗಿದ್ದು, ನವೆಂಬರ‌ಲ್ಲಿ ಇಸ್ರೋ ಉಡಾವಣೆ ಮಾಡಲಿರುವ ಜಿಸ್ಯಾಟ್‌ 7ಎ ಈ ನಿಟ್ಟಿನಲ್ಲಿ ಮಹತ್ವದ ಅಂಶವಾಗಿರಲಿದೆ. ಸದ್ಯ ಡ್ರೋನ್‌ಗಳನ್ನು ಆ್ಯಂಟೆನಾಗಳ ಮೂಲಕ ನಿಯಂತ್ರಿಸಲಾಗುತ್ತಿದ್ದು, ಜಿಸ್ಯಾಟ್‌ 7ಎ ನಭಕ್ಕೇರಿದ ನಂತರ ಡ್ರೋನ್‌ಗಳನ್ನು ಸ್ಯಾಟಲೈಟ್‌ನಿಂದಲೇ ನಿಯಂತ್ರಿಸಬಹುದಾಗಿದೆ. ಇದು ಭಾರತೀಯ ಸೇನೆಗೆ ಅತ್ಯಂತ ಅನುಕೂಲಕರವಾಗಿರಲಿದೆ. 700-800 ಕೋಟಿ ರೂ. ವೆಚ್ಚದಲ್ಲಿ ಈ ಸ್ಯಾಟಲೈಟ್‌ ಅಭಿವೃದ್ಧಿಪಡಿಸಲಾಗಿದೆ.

ಭಾರತವು ಅಮೆರಿಕದ ಪ್ರಿಡೇಟರ್‌ ಡ್ರೋನ್‌ಗಳನ್ನು ಖರೀದಿಸುವ ಮಾತುಕತೆಯಲ್ಲಿ ತೊಡಗಿದ್ದು, ಈ ಡ್ರೋನ್‌ಗಳು ಭಾರತಕ್ಕೆ ಲಭ್ಯವಾದ ನಂತರದಲ್ಲಿ ಇವುಗಳ ನಿಯಂತ್ರಣಕ್ಕೆ ಈ ವ್ಯವಸ್ಥೆ ನೆರವಾಗಲಿದೆ. ಪ್ರಿಡೇಟರ್‌ ಡ್ರೋನ್‌ಗಳನ್ನು ಅಫ್ಘಾನಿಸ್ತಾನ, ಪಾಕ್‌ ಗಡಿಯಲ್ಲಿ ತಾಲಿಬಾನ್‌ ಉಗ್ರರನ್ನು ಹೊಡೆದು ರುಳಿಸಲು ಅಮೆರಿಕ ಬಳಸಿತ್ತು. ಸದ್ಯ ಭಾರತವು ಹೆರಾನ್‌ ಮತ್ತು ಸರ್ಚರ್‌ ಡ್ರೋನ್‌ಗಳನ್ನು ಬಳಸುತ್ತಿದ್ದು, ಗ್ರೌಂಡ್‌ ಹಾಗೂ ಹಡಗು ಆಧರಿತ ಸ್ಟೇಷನ್‌ಗಳಿಂದ ನಿಯಂತ್ರಿಸಲಾಗುತ್ತಿದೆ. ಇದರಿಂದ ಡ್ರೋನ್‌ಗಳ ಹಾರಾಟ ಮಿತಿಯಲ್ಲಿರುತ್ತದೆ.