ಹ್ಯಾಂಗೋವರ್‌ಗೆ ಸಂಜಿತ್‌ ಹೆಗಡೆ ಹಾಡು

ಕನ್ನಡದಲ್ಲಿ ಹೊಸ ಗಾಯಕರ ಆಗಮನವಾಗುತ್ತಿದೆ. ಆ ಸಾಲಿಗೆ ಸಂಜಿತ್‌ ಹೆಗಡೆಯೂ ಒಬ್ಬರು. ಸರಿಗಮಪ ರಿಯಾಲಿಟಿ ಶೋ ನೋಡಿದವರಿಗೆ ಸಂಜಿತ್‌ ಹೆಗಡೆ ಅವರ ಪರಿಚಯ ಇದ್ದೇ ಇರುತ್ತೆ. ಸಂಜಿತ್‌ ಹೆಗಡೆ, ಕನ್ನಡಿಗರ ಮನಗೆದ್ದಿದ್ದು ಗೊತ್ತು. ಅವರು ಚಿತ್ರರಂಗದವರ ಮನವನ್ನೂ ಗೆದ್ದವರು. ಹಾಗಾಗಿ ಈಗಾಗಲೇ “ಚಮಕ್‌’ ಮತ್ತು “ಕಾಲೇಜ್‌ ಕುಮಾರ್‌’ ಚಿತ್ರಗಳಿಗೆ ಹಾಡು ಹಾಡುವ ಮೂಲಕ ಸುದ್ದಿಯಾದವರು.

ಈಗ ಮೊದಲ ಸಲ ಅವರು ರಾಕ್‌ ಶೈಲಿಯ ಗೀತೆಗೆ ಧ್ವನಿಯಾಗಿದ್ದಾರೆ. ಹೌದು, ವಿಠಲ್‌ಭಟ್‌ ನಿರ್ದೇಶನದ “ಹ್ಯಾಂಗೋವರ್‌’ ಚಿತ್ರಕ್ಕೆ ಸಂಜಿತ್‌ ಹೆಗಡೆ ಹಾಡಿದ್ದಾರೆ. ಸಂಗೀತ ನಿರ್ದೇಶಕ ವೀರ್‌ ಸಮರ್ಥ್ ಸಂಯೋಜಿಸಿರುವ ರಾಗಕ್ಕೆ ಚೇತನ್‌ ಬಹದ್ದೂರ್‌ ಗೀತೆ ರಚಿಸಿದ್ದಾರೆ. “ದಿನವೂ ಒಂದು ರೋಚಕ, ಹುಡುಕೋ ಒಳ್ಳೇ ಕೌತುಕ, ಸ್ನೇಹ ಅತಿ ಭಾವುಕ, ಪ್ರೀತಿ ಮನ ಮೋಹಕ…’ ಎಂಬ ಗೀತೆಗೆ ಸಂಜಿತ್‌ ಹೆಗಡೆ ಅವರು ಧ್ವನಿ ನೀಡಿದ್ದಾರೆ.

ಈ ಹಾಡಲ್ಲಿ ಚಿತ್ರದ ಮೂವರು ನಾಯಕರು, ಮೂವರು ನಾಯಕಿಯರು ಜರ್ನಿಯಲ್ಲಿ ಹಾಡುವ ಗೆಳೆತನದ ಹಾಡಿದು. ಇನ್ನೊಂದು ವಿಶೇಷವೆಂದರೆ, ಈ ಹಾಡಲ್ಲಿ ಸಂಜಿತ್‌ಹೆಗಡೆ ಅವರೊಂದಿಗೆ ರಾಕ್‌ ಸಿಂಗರ್‌ ಧೀರೇಂದ್ರ ಅವರು ಕೂಡ ಸಾಥ್‌ ನೀಡಿದ್ದಾರೆ. ಚಿತ್ರೀಕರಣ ಮುಗಿದಿದ್ದು, ಕೆಲವೇ ದಿನಗಳಲ್ಲಿ ಸಿ ಮ್ಯೂಸಿಕ್‌ ಸಂಸ್ಥೆಯಡಿ ಹಾಡುಗಳು ಬಿಡುಗಡೆಯಾಗಲಿವೆ ಎಂಬುದು ಚಿತ್ರತಂಡದ ಮಾತು. ರಾಕೇಶ್‌ ಡಿ ಚಿತ್ರವನ್ನು ನಿರ್ಮಿಸಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ನಡೆದರೆ, ಮುಂದಿನ ತಿಂಗಳು “ಹ್ಯಾಂಗೋವರ್‌’ ಬಿಡುಗಡೆಯಾಗಲಿದೆ.