ಸಾನಿಯಾ-ಬೋಪಣ್ಣ ಜೋಡಿಯ ಫೈಟ್‌

ಮೆಲ್ಬರ್ನ್: ಆಸ್ಟ್ರೇಲಿಯನ್‌ ಓಪನ್‌ ಮಿಕ್ಸೆಡ್‌ ಡಬಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತದ ಸಾನಿಯಾ ಮಿರ್ಜಾ, ರೋಹನ್‌ ಬೋಪಣ್ಣ ಜೋಡಿ ಪರಸ್ಪರ ಮುಖಾಮುಖೀಯಾಗಲಿವೆ. ಮಂಗಳವಾರದ ದ್ವಿತೀಯ ಸುತ್ತಿನ ಪಂದ್ಯದಲ್ಲಿ ರೋಹನ್‌ ಬೋಪಣ್ಣ-ಗ್ಯಾಬ್ರಿಯಲ್‌ ಡಾಬ್ರೋವ್‌ಸ್ಕಿ (ಕೆನಡಾ) ಸೇರಿಕೊಂಡು 5ನೇ ಶ್ರೇಯಾಂಕದ ಯುಂಗ್‌ ಜಾನ್‌ ಚಾನ್‌ (ಚೀನ)-ಲುಕಾಸ್‌ ಕ್ಯುಬಟ್‌ (ಪೋಲೆಂಡ್‌) ಜೋಡಿಯನ್ನು ಭಾರೀ ಹೋರಾಟದ ಬಳಿಕ 6-4, 5-7, 10-3 ಅಂತರದಿಂದ ಮಣಿಸಿದರು.

ಅನಂತರದ ಪಂದ್ಯದಲ್ಲಿ ದ್ವಿತೀಯ ಶ್ರೇಯಾಂಕದ ಸಾನಿಯಾ ಮಿರ್ಜಾ ಹಾಗೂ ಕ್ರೊವೇಶಿಯಾದ ಇವಾನ್‌ ಡೋಡಿಗ್‌ ಕೂಡ ಪ್ರಬಲ ಸವಾಲು ಎದುರಿಸಬೇಕಾಯಿತು. ಸೈಸೈ ಜೆಂಗ್‌ (ಚೀನ)-ಅಲೆಕ್ಸಾಂಡರ್‌ ಪೆಯ (ಆಸ್ಟ್ರಿಯಾ) ವಿರುದ್ಧ ನಡೆದ ಈ ಪಂದ್ಯದಲ್ಲಿ ಸಾನಿಯಾ-ಡೋಡಿಗ್‌ ಜೋಡಿಯ ಗೆಲುವಿನ ಅಂತರ 2-5, 6-3, 10-6.

ಇವರಲ್ಲೀಗ ಭಾರತದ ಒಂದು ಜೋಡಿಯ ಸೆಮಿಫೈನಲ್‌ ಖಾತ್ರಿಯಾಗಿದೆ. ಇನ್ನೊಂದು ಕಡೆ ಲಿಯಾಂಡರ್‌ ಪೇಸ್‌-ಮಾರ್ಟಿನಾ ಹಿಂಗಿಸ್‌ ಕೂಡ ಜಯ ಸಾಧಿಸಿದರೆ ಆಗ ಸೆಮಿಫೈನಲ್‌ನಲ್ಲೂ ಭಾರತೀಯ ಆಟಗಾರರ ಜೋಡಿಯೇ ಪರಸ್ಪರ ಮುಖಾಮುಖೀ ಆಗುವುದನ್ನು ಕಾಣಬಹುದು. ಪೇಸ್‌-ಹಿಂಗಿಸ್‌ ಸ್ಥಳೀಯ ನೆಚ್ಚಿನ ಜೋಡಿಯಾದ ಸಮಂತಾ ಸ್ಟೋಸರ್‌-ಸ್ಯಾಮ್‌ ಗ್ರೋತ್‌ ವಿರುದ್ಧ ಸೆಣಸಲಿದ್ದಾರೆ. 

ಮಿಶ್ರ ಡಬಲ್ಸ್‌ ಕ್ವಾರ್ಟರ್‌ ಫೈನಲ್‌ ಪಂದ್ಯಗಳು ಭಾರತೀಯ ಕಾಲಮಾನದಂತೆ ಜ. 26ರ ಬೆಳಗ್ಗೆ 5.30ಕ್ಕೆ ನಡೆಯಲಿವೆ.