‘ಗಿಣಿ ಹೇಳಿದ ಕಥೆ’ಯದ್ದು ಅಪ್ಪಟ ಕನ್ನಡದ ಸೊಗಡು!

ಆಂಗ್ಲ ಪದಗಳಿಂದ ಗಿಜಿಗುಡುವ ಶೀರ್ಷಿಕೆ ಹೊತ್ತ ಒಂದಷ್ಟು ಚಿತ್ರಗಳು ವ್ಯಾಪಕವಾಗಿ ಚಾಲ್ತಿಯಲ್ಲಿರುತ್ತವೆ. ಇಂಥಾದ್ದರ ನಡುವೆ ಅಪ್ಪಟ ಕನ್ನಡತನದ ಸೊಗಡು ಹೊತ್ತ ಶೀರ್ಷಿಕೆಗಳನ್ನು ಕಂಡರೆ ನಿಜಕ್ಕೂ ತಂಗಾಳಿ ತೀಡಿದಂಥಾದ್ದೇ ಆಹ್ಲಾದ ಆವರಿಸಿಕೊಳ್ಳುತ್ತದೆ. ಅಂಥಾದ್ದೊಂದು ಭಾವ ಹುಟ್ಟುವಂತೆ ಮಾಡಿರೋ ಗಿಣಿ ಹೇಳಿದ ಕಥೆ ಈ ವಾರ ತೆರೆ ಕಾಣಲಿದೆ.

ದೇವ್ ರಂಗಭೂಮಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆಯನ್ನೂ ಅವರೇ ಬರೆದಿದ್ದಾರೆ. ಇದಲ್ಲದೇ ತಾವೇ ನಾಯಕನಾಗಿಯೂ ನಟಿಸಿದ್ದಾರೆ. ಬಹುಶಃ ಇಂಥಾ ನೆಲದ ಸೊಗಡಿನ ಕಥೆಯೊಂದು ಜೀವ ಪಡೆಯಲು ಸಾಧ್ಯವಾದದ್ದು ಅವರ ರಂಗಭೂಮಿಯ ನಂಟಿನಿಂದಲೇ. ಕೇವಲ ಶೀರ್ಷಿಕೆ ಮಾತ್ರವಲ್ಲ, ಈ ಚಿತ್ರದ ಕಥೆ ಕೂಡಾ ಅಪ್ಪಟ ದೇಸೀತನವನ್ನು ಮೈ ತುಂಬಿಸಿಕೊಂಡಿದೆ. ತಂತ್ರಜ್ಞಾನದಲ್ಲಿ ಎಷ್ಟೇ ಮುಂದುವರೆದರೂ ನೆಲದ ನಂಟು ಮರೆಯದ ದೃಶ್ಯ ರೂಪಕಗಳು ಇತ್ತೀಚೆಗೆ ವಿರಳ. ಆದರೆ ಗಿಣಿ ಹೇಳಿದ ಕಥೆ ವರ್ಷಾರಂಭದಲ್ಲಿಯೇ ಆ ಕೊರಗು ನೀಗುವಂತೆ ಮೂಡಿ ಬಂದಿದೆಯಂತೆ.

ಹಾಗಾದರೆ, ಈ ಗಿಣಿ ಹೇಳಲಿರೋದು ಎಂಥಾ ಕಥೆ ಎಂಬ ಬಗ್ಗೆ ಪ್ರೇಕ್ಷಕರೆಲ್ಲರೂ ಕುತೂಹಲಗೊಂಡಿದ್ದಾರೆ. ಆದರೆ ಕಥೆಯ ಬಗ್ಗೆ ಯಾವ ಗುಟ್ಟನ್ನೂ ಬಿಟ್ಟು ಕೊಡದೆ ಬೆರಗೊಂದು ಥೇಟರಿನವರೆಗೂ ಸಾಗಿ ಬರುವಂತೆ ಚಿತ್ರತಂಡ ನೋಡಿಕೊಂಡಿದೆ. ಒಟ್ಟಾರೆಯಾಗಿ ಈ ಸಿನಿಮಾನ ಅಸಲೀ ವಿಶೇಷತೆ ಏನೆಂಬುದು ಈ ವಾರವೇ ಜಾಹೀರಾಗಲಿದೆ.