ಗುತ್ತಿಗಾರು: ಅತ್ತೆ-ಸೊಸೆಗೆ ಒಂದೇ ಆಧಾರ್‌!

ಗುತ್ತಿಗಾರು: ದೇಶದ ಪ್ರತಿಯೊಬ್ಬರಿಗೂ ಅವರದೇ ಆದ ಆಧಾರ್‌ ನಂಬರ್‌ ಇದ್ದರೆ ಇಲ್ಲಿನ ಮಹಿಳೆಯರಿಬ್ಬರಿಗೆ ಮಾತ್ರ ಒಂದೇ ಆಧಾರ್‌ ನಂಬರ್‌ ಲಭಿಸಿದೆ!

ಗುತ್ತಿಗಾರು ಗ್ರಾಮದ ಕಮಿಲ ನಿವಾಸಿಗಳಾದ ಹೊನ್ನಮ್ಮ (70) ಮತ್ತು ಸೊಸೆ ಕೆಂಚಮ್ಮ (50) ಅವರಿಗೆ ಒಂದೇ ನಂಬರನ್ನು ಆಧಾರ್‌ ಪ್ರಾಧಿಕಾರ ದಯಪಾಲಿಸಿದೆ. ಇದರಿಂದಾಗಿ ಅವರಿಗೆ ಸರಕಾರದ ಯಾವುದೇ ಯೋಜನೆಗಳನ್ನೂ ಬಳಸಿಕೊಳ್ಳಲಾಗುತ್ತಿಲ್ಲ.

ಇತ್ತೀಚೆಗೆ ಪಡಿತರ ಚೀಟಿಯನ್ನು ಅಪ್‌ಡೇಟ್‌ ಮಾಡಲು ಹೋದಾಗ ಇವರಿಬ್ಬರಿಗೆ ಒಂದೇ ಆಧಾರ್‌ ನಂಬರ್‌ ಸಿಕ್ಕಿರುವುದು ಅರಿವಿಗೆ ಬಂದಿದೆ. ಅನಂತರ 6 ಬಾರಿ ಆಧಾರ್‌ ಕೇಂದ್ರಕ್ಕೆ ತೆರಳಿ ಸರಿಪಡಿಸುವ ಪ್ರಯತ್ನ ನಡೆಸಿದರೂ ಪ್ರಯೋಜನವಾಗಿಲ್ಲ. ಮತ್ತೆ ಮತ್ತೆ ಅದೇ ನಂಬರಿನ ಹೊಸ ಆಧಾರ್‌ ಕಾರ್ಡ್‌ ಬರುತ್ತಿದೆ ವಿನಾ ತಿದ್ದುಪಡಿ ಆಗಿಲ್ಲ. ಹಲವು ಬಾರಿ ಅಲೆದಾಡಿ ಸುಸ್ತಾಗಿರುವ ಹಿರಿಯ ಜೀವಗಳು ಈ ಅವ್ಯವಸ್ಥೆಯಿಂದ ನೊಂದಿವೆ.