ದಾವೂದ್‌ ಆಸ್ತಿ 3.51 ಕೋಟಿಗೆ ಹರಾಜು

ಮುಂಬಯಿ: ತಲೆಮರೆಸಿಕೊಂಡಿರುವ ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂಗೆ ಸೇರಿದ ಆಸ್ತಿಯನ್ನು ಮುಂಬಯಿ ಮೂಲದ ಟ್ರಸ್ಟ್‌ವೊಂದು ಗುರುವಾರ ನಡೆದ ಹರಾಜಿನಲ್ಲಿ 3.51 ಕೋಟಿ ರೂ. ನೀಡಿ ಖರೀದಿಸಿದೆ. ದಾವೂದ್‌ ಆಸ್ತಿಯಾದ ನಾಲ್ಕು ಅಂತಸ್ತಿನ ಕಟ್ಟಡ “ಮಸುಲ್ಲಾ’ ದಕ್ಷಿಣ ಮುಂಬಯಿಯ ಬೆಂಡಿ ಬಜಾರ್‌ನಲ್ಲಿ ಇತ್ತು. ಕೇಂದ್ರ ಹಣಕಾಸು ಸಚಿವಾಲಯ, ಕಳ್ಳ ಸಾಗಾಣಿಕೆ, ವಿದೇಶಿ ವಿನಿಮಯ ದುರುಪಯೋಗ ಕಾಯ್ದೆ ಅಡಿ ಇದನ್ನು ಹರಾಜಿಗೆ ಇರಿಸಿತ್ತು. ದ ಸೈಫೀ ಬುರ್ಹಾನಿ ಅಪ್‌ಲಿಫ್ಟ್ಮೆಂಟ್‌ ಟ್ರಸ್ಟ್‌ (ಎಸ್‌ಬಿಯುಟಿ) ಹೆಚ್ಚು ಮೊತ್ತ ಬಿಡ್‌ ಮಾಡಿ ಈ ಆಸ್ತಿಯನ್ನು ಕೊಂಡುಕೊಂಡಿದೆ.

ಇ-ಬಿಡ್ಡಿಂಗ್‌ನಲ್ಲಿ ಎಸ್‌ಬಿಯುಟಿ 3.43 ಕೋಟಿ ಬಿಡ್‌ ಮಾಡಿ, ಕಡೆಗೆ 3.51 ಕೋಟಿ ರೂ. ನೀಡಿ ಹರಾಜು ಗೆದ್ದಿದೆ. ನಮ್ಮ ಬೆಂಡಿ ಬಜಾರ್‌ ಯೋಜನೆಯಡಿ ಕಟ್ಟಡವನ್ನು ಮರುನಿರ್ಮಾಣ ಮಾಡುತ್ತೇವೆ ಎಂದು ಎಸ್‌ಯುಬಿಟಿ ಹೇಳಿದೆ.