ಕೇರಳಿಗನ ನೆಮ್ಮದಿ ಕಸಿದ ಸೇಕ್ರೆಡ್‌ ಗೇಮ್ಸ್‌

ನವದೆಹಲಿ: ನೆಟ್ಫ್ಲಿಕ್ಸ್‌ನಲ್ಲಿ ಆರಂಭವಾಗಿರುವ ‘ಸೇಕ್ರೆಡ್‌ ಗೇಮ್ಸ್‌ -2’ ವೆಬ್‌ ಸರಣಿಯ ತಯಾರಕರು ಮಾಡಿರುವ ಎಡವಟ್ಟಿನಿಂದಾಗಿ, ಶಾರ್ಜಾದಲ್ಲಿರುವ ಕೇರಳದ ಕುಞ್ಞಬ್ದುಲ್ಲಾ (37) ಎಂಬವರಿಗೆ ಭಾರತ, ಪಾಕಿಸ್ತಾನ, ನೇಪಾಳ, ಯುಎಇ ಹಾಗೂ ಇನ್ನಿತರ ದೇಶಗಳಿಂದ ವಿಪರೀತ ಫೋನ್‌ ಕರೆಗಳು ಬರಲಾರಂಭಿಸಿದ್ದು, ಇದರಿಂದ ಸರಣಿಯ ಬಗ್ಗೆ ಅರಿವೇ ಇಲ್ಲದ ಕುಞ್ಞಬ್ದುಲ್ಲಾ ಅವರ ನೆಮ್ಮದಿಯೇ ಹಾಳಾಗುವಂತಾಗಿದೆ.

ಆ.15ರಂದು ನೆಟ್ಫ್ಲಿಕ್ಸ್‌ನಲ್ಲಿ ಭೂಗತ ಲೋಕದ ಕಥಾವಸ್ತುವಿರುವ ‘ಸೇಕ್ರೆಡ್‌ ಗೇಮ್ಸ್‌ -2’ ಪ್ರಸಾರ ಆರಂಭವಾಗಿದೆ. ಮೊದಲ ಸಂಚಿಕೆಯಲ್ಲಿ ಗ್ಯಾಂಗ್‌ಸ್ಟರ್‌ ಒಬ್ಬನ ಮೊಬೈಲ್ ನಂಬರನ್ನು ತೋರಿಸಲಾಗಿತ್ತು. ಆ ಸಂಖ್ಯೆಯು ನಿಜವಾಗಿ ಕುಞ್ಞಬ್ದುಲ್ಲಾ ಅವರದ್ದು. ಹಾಗಾಗಿ, ಅವರಿಗೆ ಕರೆಗಳು ಅವ್ಯಾಹತವಾಗಿ ಬರುತ್ತಿವೆಯಂತೆ.