ಮುಂಬೈ: ಇಷ್ಟು ದಿನ ತಮಾಷೆಯ ಟ್ವೀಟ್‌ ಮೂಲಕ ಟ್ವೀಟರ್‌ನಲ್ಲಿ ಬೇರೆಯವರ ಕಾಲೆಳೆಯುತ್ತಿದ್ದ ಭಾರತ ತಂಡದ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹವಾಗ್‌ ಈಗ ತಾವೇ ಅದರ ಬಲೆಗೆ ಬಿದ್ದಿದ್ದಾರೆ. ಕ್ರಿಕೆಟ್‌ ದೇವರು ಸಚಿನ್‌ ತೆಂಡುಲ್ಕರ್‌ ಅವರಿಂದ ಇಂತಹದ್ದೊಂದು ಸಾಹಸ ನಡೆದಿದೆ! ತಮ್ಮ ಜನ್ಮದಿನದ ಪ್ರಯುಕ್ತ ಸಚಿನ್‌ ಮಾಡಿರುವ ಕಿತಾಪತಿಯಿಂದ ಸ್ವತಃ ವೀರೂ ಬೇಸ್ತುಬಿದ್ದಿದ್ದಾರೆ.
“ಟ್ವೀಟ್‌ ಮಾಸ್ಟರ್‌’ ಎಂದೇ ಖ್ಯಾತವಾಗಿರುವ ಸೆಹವಾಗ್‌ಗೆ ಶುಕ್ರವಾರ 39ನೇ ಜನ್ಮದಿನದ ಸಂಭ್ರಮ. ಮಾಜಿ- ಹಾಲಿ ಕ್ರಿಕೆಟಿಗರಿಂದ, ಅಭಿಮಾನಿಗಳಿಂದ, ಸ್ನೇಹಿತರಿಂದ ಸಂದೇಶಗಳ ಮಹಾಪೂರವೇ ಹರಿದು ಬಂದಿದೆ. ಮಾಸ್ಟರ್‌ ಬ್ಲಾಸ್ಟರ್‌ ಖ್ಯಾತಿಯ, ಸೆಹವಾಗ್‌ ಜತೆ ಸಾಕಷ್ಟು ಏಕದಿನ ಪಂದ್ಯಗಳಲ್ಲಿ ಆರಂಭಿಕನಾಗಿಯೂ ಕಾಣಿಸಿಕೊಂಡಿದ್ದ ಸಚಿನ್‌ ತೆಂಡುಲ್ಕರ್‌ ಉಲ್ಟಾ ಅಕ್ಷರಗಳಲ್ಲಿ ಶುಭಾಶಯಕೋರಿದ್ದಾರೆ. ಇದಕ್ಕೊಂದು ವಿಶಿಷ್ಟ ಕಾರಣವೂ ಇದೆ. ಅದನ್ನು ತೆಂಡುಲ್ಕರ್‌ ಮಾತುಗಳಲ್ಲೇ ಕೇಳಿ.
“ವೀರೂ ಜನ್ಮದಿನದ ಶುಭಾಶಯ! ನಿಮ್ಮ ನೂತನ ವರ್ಷ ಶುಭಾರಂಭಗೊಳ್ಳಲಿ. ಅಂಗಳದಲ್ಲಿದ್ದಾಗ ನಾನೇನು ಹೇಳುತ್ತಿದ್ದೆನೋ ಅದಕ್ಕೆ ನೀವು ಉಲ್ಟಾ ಮಾಡುತ್ತಿದ್ದಿರಿ. ಈಗ ನನ್ನ ಕಡೆಯಿಂದ ಅಂಥದೇ ಒಂದು ಪ್ರಯತ್ನ…’ ಎಂದು ತೆಂಡುಲ್ಕರ್‌
ಬಹಳ ತಮಾಷೆಯಾಗಿ, ತಲೆಕೆಳಗಾದ ಸಂದೇಶ ರವಾನಿಸಿದ್ದಾರೆ!
