ರಸೆಲ್‌ ಡೊಮಿಂಗೊ ಬಾಂಗ್ಲಾ ಕ್ರಿಕೆಟ್‌ ಕೋಚ್‌

ಢಾಕಾ: ದಕ್ಷಿಣ ಆಫ್ರಿಕಾದ ಮಾಜಿ ಕೋಚ್‌ ರಸೆಲ್‌ ಡೊಮಿಂಗೊ ಅವರೀಗ ಬಾಂಗ್ಲಾದೇಶ ಕ್ರಿಕೆಟ್‌ ತಂಡದ ನೂತನ ಪ್ರಧಾನ ತರಬೇತುದಾರನಾಗಿ ಆಯ್ಕೆಯಾಗಿದ್ದಾರೆ. ಬಿಸಿಬಿ ಶನಿವಾರ ಇದನ್ನು ಪ್ರಕಟಿಸಿತು.

ತನ್ನ ನೂತನ ಕೋಚ್‌ ಸ್ಥಾನಕ್ಕೆ ಬಾಂಗ್ಲಾದೇಶ 3 ಮಂದಿಯ ಹೆಸರನ್ನು ಅಂತಿಮಗೊಳಿಸಿತ್ತು. ಉಳಿದಿಬ್ಬರೆಂದರೆ ಮೈಕ್‌ ಹೆಸನ್‌ ಮತ್ತು ಮಿಕ್ಕಿ ಆರ್ಥರ್‌. ಇವರಲ್ಲಿ ಹೆಸನ್‌ ಟೀಮ್‌ ಇಂಡಿಯಾ ಕೋಚ್‌ ಹುದ್ದೆಗೂ ಅರ್ಜಿ ಸಲ್ಲಿಸಿ ಅಂತಿಮ ಸುತ್ತಿಗೆ ಆಯ್ಕೆಯಾಗಿದ್ದರು. ಇನ್ನೊಂದೆಡೆ ಮಿಕ್ಕಿ ಆರ್ಥರ್‌ ಅವರ ಒಡಂಬಡಿಕೆಯನ್ನು ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ ವಿಸ್ತರಿಸಲಿಲ್ಲ. ಇವರಿಬ್ಬರಿಗೂ ಬಾಂಗ್ಲಾ ಕೋಚ್‌ ಹುದ್ದೆಯೂ ಮರೀಚಿಕೆಯಾಯಿತು.

ವಿಶ್ವಕಪ್‌ ತನಕ ಸ್ಟೀವ್‌ ರೋಡ್ಸ್‌ ಬಾಂಗ್ಲಾ ತಂಡದ ಕೋಚ್‌ ಆಗಿದ್ದರು. ಬಳಿಕ ಖಲೀದ್‌ ಮಹಮ್ಮದ್‌ ಅವರನ್ನು ಹಂಗಾಮಿ ಕೋಚ್‌ ಆಗಿ ನೇಮಿಸಲಾಗಿತ್ತು.