ಪೊಂಡಾದಲ್ಲಿ ಜನವರಿ 2ರಿಂದ 7ರವರೆಗೆ ಆರ್ ಎಸ್ಎಸ್ ರಾಷ್ಟ್ರೀಯ ಸಮಾವೇಶ

ಪಣಜಿ: ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸಂಘಚಾಲಕ  ಡಾ. ಮೋಹನ್ ಭಾಗವತ್ ರವರು ಜನವರಿ 2 ರಂದು ಗೋವಾಕ್ಕೆ ಆಗಮಿಸಲಿದ್ದಾರೆ.  ಜನವರಿ 2 ರಿಂದ 7 ರವರೆಗೆ ಗೋವಾದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ರಾಷ್ಟ್ರೀಯ ಸಮಾವೇಶವನ್ನು ಆಯೋಜಿಸಲಾಗಿದೆ. ಈ ಸಮಾವೇಶದಲ್ಲಿ ಸಂಘ ಪರಿವಾರದ ಕಾರ್ಯಕರ್ತರಿಗೆ ಡಾ. ಮೋಹನ್ ಭಾಗವತ್ ರವರು ಮಾರ್ಗದರ್ಶನ ನೀಡಲಿದ್ದಾರೆ.

ಜ 2ರಿಂದ 7ರವರೆಗೆ ಗೋವಾದ ಪೊಂಡಾ ತಾಲೂಕಿನ ನಾಗೇಶಿಯಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ರಾಷ್ಟ್ರೀಯ ಸಮಾವೇಶ ನಡೆಯುತ್ತಿದ್ದು, ಈ ಸಂದರ್ಭದಲ್ಲಿ ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ ಎಂದು ಸಂಘದ ಅಖಿಲ ಭಾರತ ಪ್ರಚಾರ ಮುಖ್ಯಸ್ಥ ಸುನೀಲ್ ಅಂಬೇಕರ್ ಮಾಹಿತಿ ನೀಡಿದ್ದಾರೆ.

ಜನವರಿ 2 ರಿಂದ 4 ರ ವರೆಗೆ  ಸಂಘಕ್ಕೆ ಸಂಬಂಧಿಸಿದ ವಿವಿಧ ಪದಾಧಿಕಾರಿಗಳ ಸಭೆಗಳನ್ನು ಪೊಂಡಾದ ನಾಗೇಶಿಯಲ್ಲಿ ನಡೆಸಲಾಗುವುದು. ಜನವರಿ 5 ಮತ್ತು 6 ರಂದು ಸಂಘ ಪರಿವಾರದ ರಾಷ್ಟ್ರೀಯ ಸಮನ್ವಯ ಸಮಿತಿ ಸಭೆ ನಡೆಯಲಿದೆ.  ಸಂಘದ  ನಿರ್ದೇಶಕ ಡಾ. ಮೋಹನ್ ಭಾಗವತ್, ದತ್ತಾತ್ರೇಯ ಹೊಸಬಾಳೆ, ವಿಶ್ವ ಹಿಂದೂ ಪರಿಷತ್‍ನ ಮಿಲಿಂದ್ ಪರಾಂಡೆ, ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್‍ನ ಆಶಿಶ್ ಚೌಹಾಣ್, ಭಾರತೀಯ ಮಜ್ದೂರ್ ಸಂಘದ ಬಿ ಸುರೇಂದ್ರನ್, ಭಾರತೀಯ ಜನತಾ ಪಕ್ಷದ ಬಿ. ಎಲ್. ಸಂತೋಷ್ ಅವರಲ್ಲದೆ, ಭಾರತೀಯ ಕಿಸಾನ್ ಸಂಘದ ರಾಷ್ಟ್ರೀಯ ಪದಾಧಿಕಾರಿ ವಿದ್ಯಾಭಾರತಿ ಈ ಸಭೆಗಳಲ್ಲಿ ಭಾಗವಹಿಸಲಿದ್ದಾರೆ.

ಜನವರಿ 7 ರಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘ ಚಾಲಕ ಡಾ. ಮೋಹನ್ ಭಾಗವತ್ ಅವರು ಸಂಘ ಪರಿವಾರದ ಕಾರ್ಯಕರ್ತರಿಗೆ ಮಾರ್ಗದರ್ಶನ ನೀಡಲಿದ್ದಾರೆ ಎಂಬ ಮಾಹಿತಿ ನೀಡಿದರು.