ಭಾರತದಲ್ಲಿ ಟಿಕ್‌ಟಾಕ್‌ ನಿಷೇಧದಿಂದ ಪ್ರತಿದಿನ 4.5 ಕೋಟಿ ರೂ. ನಷ್ಟ!

ಹೊಸದಿಲ್ಲಿ: ಕ್ರೇಜ್‌ ಹುಟ್ಟಿಸಿದ್ದ ಟಿಕ್‌ಟಾಕ್‌ ಎಂಬ ವಿಡಿಯೋ ಶೇರ್‌ ಆ್ಯಪ್‌ಗೆ ಕಳೆದ ವಾರ ಮದ್ರಾಸ್‌ ಹೈಕೋರ್ಟ್‌ ನಿಷೇಧ ಹೇರಿದ್ದು, ಈ ಆ್ಯಪ್‌ನ ಮಾತೃಸಂಸ್ಥೆಗೆ ಭಾರಿ ಹೊಡೆತ ನೀಡಿದೆ. ಚೀನ ಮೂಲದ ಬೈಟ್‌ಡ್ಯಾನ್ಸ್‌ ಕಂಪನಿಯ ಆ್ಯಪ್‌ ಇದಾಗಿದ್ದು, ನಿಷೇಧ ಜಾರಿಯಾದಾಗಿನಿಂದ ನಿತ್ಯ 4.5 ಕೋಟಿ ರೂ. ನಷ್ಟವಾಗುತ್ತಿದೆ. ಅಷ್ಟೇ ಅಲ್ಲ, ಸುಮಾರು 250 ಜನರ ಉದ್ಯೋಗಕ್ಕೂ ಇದು ಕುತ್ತು ತಂದಿದೆ. ಈ ಆ್ಯಪ್‌ ಅನ್ನು ಭಾರತದಲ್ಲಿ ಸುಮಾರು 30 ಕೋಟಿ ಜನರು ಡೌನ್‌ಲೋಡ್‌ ಮಾಡಿಕೊಂಡಿದ್ದಾರೆ. ಜಗತ್ತಿನ ಅತ್ಯಂತ ಯಶಸ್ವಿ ಸ್ಟಾರ್ಟಪ್‌ಗ್ಳಲ್ಲಿ ಇದೂ ಒಂದು. ಈ ಕಂಪನಿಯಲ್ಲಿ ಜಪಾನ್‌ ಸಾಫ್ಟ್ ಬ್ಯಾಂಕ್‌ ಹಾಗೂ ಜನರಲ್‌ ಅಟ್ಲಾಂಟಿಕ್‌ ಹಾಗೂ ಸೀಕ್ವಿಯಾ ಸಂಸ್ಥೆಗಳು ಹೂಡಿಕೆ ಮಾಡಿವೆ, ಇದೇ ಕಂಪನಿ ಹೆಲೋ, ವಿಗೊ ವೀಡಿಯೋ ಎಂಬ ಆ್ಯಪ್‌ಗ್ಳನ್ನೂ ಹೊಂದಿದೆ.