ಅಂಗನವಾಡಿ ಕಟ್ಟಡದ ಮೇಲ್ಛಾವಣಿ ಕುಸಿತ

ಮಂಡ್ಯ: ಮದ್ದೂರು ತಾಲೂಕು ರುದ್ರಾಕ್ಷಿಪುರದಲ್ಲಿ ಮಂಗಳವಾರ ಬೆಳಗ್ಗೆ ಶಿಥಿಲಾವಸ್ಥೆಯಲ್ಲಿದ್ದ ಅಂಗನವಾಡಿ ಕಟ್ಟಡದ ಮೇಲ್ಛಾವಣಿ ಕುಸಿದು ಬಿದ್ದಿದ್ದು, ಒಳ ಗಿದ್ದ 15 ಮಕ್ಕಳು ಅದೃಷ್ಟವಶಾತ್‌ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಅಂಗನವಾಡಿ ಕಟ್ಟಡ ಹಲವಾರು ತಿಂಗಳಿಂದ ಶಿಥಿಲಗೊಂಡಿತ್ತು. ಕಟ್ಟಡದ ಮೇಲ್ಛಾವಣಿಯ ಕಲಾ°ರ್‌ ಶೀಟ್‌ಗಳಿಗೆ ಬೆಂಬಲವಾಗಿ ಇರಿಸಲಾಗಿದ್ದ ಮರದ ತೊಲೆಗಳು ಗೆದ್ದಲು ಹಿಡಿದು ಕುಸಿದು ಬೀಳುವ ಹಂತದಲ್ಲಿದ್ದವು.

ಈ ಬಗ್ಗೆ ದೂರು ನೀಡಿದ್ದರೂ, ದುರಸ್ತಿಗೆ ಕ್ರಮ ಕೈಗೊಂಡಿರಲಿಲ್ಲ. ಮಂಗಳವಾರ ಬೆಳಗ್ಗೆ 10 ಗಂಟೆ ಸುಮಾರಿಗೆ ಮಕ್ಕಳು ಕುಳಿತಿದ್ದ ವೇಳೆಯೇ ಮೇಲ್ಛಾವಣಿಯ ಕಲಾ°ರ್‌ ಶೀಟು ಕುಸಿದು ಬಿತ್ತು. ಸುದ್ದಿ ತಿಳಿದು ಸ್ಥಳಕ್ಕೆ ಆಗಮಿಸಿದ ಗ್ರಾಮಸ್ಥರು ಮಕ್ಕಳನ್ನು ಹೊರಕ್ಕೆ ಕರೆ ತಂದರು. ಮಕ್ಕಳಿಗೆ ರಜಾ ನೀಡಿ ಮನೆಗೆ ಕಳುಹಿಸಲಾಯಿತು. ಕಟ್ಟಡ ದುರಸ್ಥಿಗೊಳ್ಳುವವರೆಗೆ ಖಾಸಗಿ ಸ್ಥಳದಲ್ಲಿ ಅಂಗನವಾಡಿ ಶಾಲೆ ನಡೆಸುವಂತೆ ನೌಕರರಿಗೆ ಸೂಚನೆ ನೀಡಲಾಗಿದೆ.