ಚೆನ್ನೈ ಪಿಚ್‌ ಕಳಪೆಯಾಗಿತ್ತು ಎಂಬ ಟೀಕೆಗಳಿಗೆ ರೋಹಿತ್‌ ತಿರುಗೇಟು

ಅಹ್ಮದಾಬಾದ್‌: ಚೆನ್ನೈ ಪಿಚ್‌ ಕಳಪೆಯಾಗಿತ್ತು ಎಂದು ಟೀಕಿಸಿದ್ದ ಇಂಗ್ಲೆಂಡ್‌ ತಂಡದ ಮಾಜಿ ಆಟಗಾರರಿಗೆ ಭಾರತದ ಆರಂಭಿಕ ಬ್ಯಾಟ್ಸ್‌ಮನ್‌ ರೋಹಿತ್‌ ಶರ್ಮ ತಿರುಗೇಟು ನೀಡಿದ್ದಾರೆ.

“ನಾವು ಬೇರೆ ದೇಶಗಳಿಗೆ ಪ್ರವಾಸ ಕೈಗೊಂಡ ವೇಳೆ ಈ ರೀತಿಯಾಗಿ ಪಿಚ್‌ಗಳ ಕುರಿತು ಎಂದೂ ದೂರಿಲ್ಲ. ಎಷ್ಟೇ ಕಠಿನ ಸವಾಲುಗಳಿದ್ದರೂ ಎದುರಿಸಿ ಆಡಿದ್ದೇವೆ. ಆದರೆ ಭಾರತದಲ್ಲಿ ಮೊದಲಿನಿಂದಲೂ ಸ್ಪಿನ್‌ ಸ್ನೇಹಿ ಪಿಚ್‌ಗಳು ಇರುವುದು ಸಾಮಾನ್ಯ. ಆದರೂ ವಿದೇಶಿಗರು ಟೀಕಿಸುತ್ತಾರೆ. ಇದು ಸರಿಯಲ್ಲ’ ಎಂದರು.

“ಎರಡೂ ತಂಡಗಳಿಗೆ ಅದೇ ಪಿಚ್‌ ಇರುತ್ತದೆ. ಇಬ್ಬರಿಗೂ ಸಮಾನ ಅವಕಾಶಗಳಿರುತ್ತವೆ. ಜತೆಗೆ ಆತಿಥೇಯ ತಂಡಗಳಿಗೆ ತಮ್ಮ ಅನುಕೂಲಕ್ಕೆ ತಕ್ಕಂತೆ ಪಿಚ್‌ ಸಿದ್ಧಪಡಿಸಿಕೊಳ್ಳುವ ಹಕ್ಕು ಕೂಡ ಇದೆ. ಆದರೂ ಈ ಟೀಕೆಗಳು ಸರಿಯಲ್ಲ. ಪಿಚ್‌ ಬಗ್ಗೆ ಟೀಕಾಕಾರರೀಗೆ ಅನುಮಾನಗಳಿದ್ದರೆ ಐಸಿಸಿಗೆ ದೂರು ನೀಡಲಿ, ಎಲ್ಲ ದೇಶಗಳಲ್ಲಿಯೂ ತಟಸ್ಥ ಪಿಚ್‌ಗಳನ್ನು ನಿರ್ಮಿಸಲು ಕ್ರಮಕೈಗೊಳ್ಳಲಿ’ ಎಂದು ರೋಹಿತ್‌ ತಿರುಗೇಟು ನೀಡಿದ್ದಾರೆ.