ಚೆನ್ನೈ: ಬಹುಭಾಷಾ ನಟಿ ಹನ್ಸಿಕಾ ಮೋಟ್ವಾನಿ ಮದುವೆ ಬಳಿಕ ಮತ್ತೆ ಬಣ್ಣದ ಲೋಕದಲ್ಲಿ ಬ್ಯುಸಿಯಾಗಿದ್ದಾರೆ. ʼಪಾರ್ಟ್ನರ್ʼ ಸಿನಿಮಾದ ಪ್ರಚಾರದಲ್ಲಿ ನಿರತರಾಗಿರುವ ಅವರು ಇತ್ತೀಚೆಗೆ ಸಹನಟ ಆಡಿದ ಮಾತಿನಿಂದ ಮುನಿಸಿಕೊಂಡಿರುವುದು ಟಾಕ್‌ ಆಫ್‌ ಟೌನ್‌ ಆಗಿದೆ.
ಆದಿ ಪಿನಿಸೆಟ್ಟಿ ಹಾಗೂ ಹನ್ಸಿಕಾ ಅಭಿನಯಯದ ʼಪಾರ್ಟ್ನರ್ʼ ಸಿನಿಮಾ ತೆರೆಗೆ ಬರಲು ಸಿದ್ದವಾಗಿದೆ. ಸಿನಿಮಾದಲ್ಲಿ ರೋಬೋ ಶಂಕರ್ ಅವರು ನಟಿಸಿದ್ದಾರೆ. ಚೆನ್ನೈನಲ್ಲಿ ನಡೆದ ಸಿನಿಮಾ ತಂಡದ ಕಾರ್ಯಕ್ರಮದಲ್ಲಿ ರೋಬೋ ಶಂಕರ್ ಅವರು, ಸಿನಿಮಾದ ದೃಶ್ಯವೊಂದರ ಅನುಭವದ ಬಗ್ಗೆ ಮಾತನಾಡಿರುವುದು ನಟಿ ಹನ್ಸಿಕಾ ಅವರ ಮುನಿಸಿಗೆ ಕಾರಣವಾಗಿದೆ.
“ಸಿನಿಮಾದಲ್ಲಿ ನಟಿ ಹನ್ಸಿಕಾ ಅವರ ಕಾಲುಗಳನ್ನು ಮುಟ್ಟುವ ದೃಶ್ಯವೊಂದಿತ್ತು. ಆದರೆ ಅವರು ಆ ದೃಶ್ಯವನ್ನು ಮಾಡಲು ನಿರಾಕರಿಸಿದರು. ಅವರು ಕಾಲು ಹಾಗೂ ಬೆರಳನ್ನು ಮುಟ್ಟಲು ಅವಕಾಶ ನೀಡಲಿಲ್ಲ. ಆದರೆ ಅದೇ ದೃಶ್ಯವನ್ನು ನಾಯಕ ನಟ ಆದಿ ಅವರಿಗೆ ಮಾಡಲು ನಟಿ ಅವಕಾಶ ಮಾಡಿಕೊಟ್ಟಿದ್ದಾರೆ. ಇದು ನಾಯಕನಾಗಿರುವ ಲಾಭ” ಎಂದು ಅವರು ಹೇಳಿದ್ದಾರೆ.
ಈ ವೇಳೆ ವೇದಿಕೆಯಲ್ಲಿ ನಾಯಕಿ ಹನ್ಸಿಕಾ ಅವರು ಕೂಡ ಇದ್ದರು. ಕೂಡಲೇ ರೋಬೋ ಶಂಕರ್ ನನ್ನ ಮಾತನ್ನು ತಮಾಷೆಯಾಗಿ ತೆಗೆದುಕೊಳ್ಳಿ ಎಂದು ಹೇಳಿದ್ದಾರೆ. ಆದರೆ ವೇದಿಕೆಯಲ್ಲಿದ್ದ ಹನ್ಸಿಕಾ ಅವರು ಇದರಿಂದ ಅಸಮಾಧಾನಗೊಂಡಿದ್ದಾರೆ.
ನಟಿಯ ಮೇಲಿನ ರೋಬೋ ಶಂಕರ್ ಅವರ ಹೇಳಿಕೆಗೆ ಹಲವರು ಅವರನ್ನು ಟೀಕಿಸಿದ್ದಾರೆ. ಸಮಾರಂಭದಲ್ಲಿದ್ದ ಪತ್ರಕರ್ತರೊಬ್ಬರು ನೀವು ನಿಮ್ಮ ಮಾತಿನ ಗಡಿಯನ್ನು ದಾಟಿದ್ದೀರಿ ಎಂದಿದ್ದಾರೆ. ನೆಟ್ಟಿಗರು ಕೂಡ ರೋಬೋ ಶಂಕರ್ ಅವರ ಮಾತಿಗೆ ಗರಂ ಆಗಿದ್ದಾರೆ.
ಇದಾದ ಬಳಿಕ ʼಪಾರ್ಟ್ನರ್ʼ ಚಿತ್ರತಂಡ ನಟಿಗೆ ರೋಬೋ ಶಂಕರ್ ಪರವಾಗಿ ಹನ್ಸಿಕಾಗೆ ಕ್ಷಮೆಯಾಚಿಸಿದೆ ಎಂದು ವರದಿಯಾಗಿದೆ. ಆದರೆ ಈ ಬಗ್ಗೆ ಅಧಿಕೃತ ಹೇಳಿಕೆ ಹೊರಬಿದ್ದಿಲ್ಲ.
ಆದಿ ಪಿನಿಸೆಟ್ಟಿ, ಹಂಸಿಕಾ ಮೋಟ್ವಾನಿ, ಯೋಗಿ ಬಾಬು, ಪಾಲಕ್ ಲಾಲ್ವಾನಿ, ಪಾಂಡ್ಯರಾಜನ್, ರೋಬೋ ಶಂಕರ್, ಜಾನ್ ವಿಜಯ್, ರವಿ ಮರಿಯಾ, ಟೈಗರ್ ತಂಗದುರೈ ಮತ್ತು ಇತರರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ.
