ರಸ್ತೆಯಲ್ಲಿ  ಅಪಾಯವನ್ನು ಆಹ್ವಾನಿಸುವ ಎಚ್‌.ಟಿ. ವಿದ್ಯುತ್‌ ಕಂಬ !

ಕುಂಬಳೆ: ಸೀತಾಂಗೋಳಿ ಬದಿಯಡ್ಕ ರಸ್ತೆಯ ಕಟ್ಟದಂಗಡಿಯ ಕಪಿತಾನಿಯೊ ವಿದ್ಯಾಲಯದ ಬಳಿಯ ರಸ್ತೆಯಲ್ಲಿ ವಿದ್ಯುತ್‌ ಕಂಬವೊಂದು ಅಪಾಯವನ್ನು ಆಹ್ವಾನಿಸುತ್ತಿದೆ. 

110 ಕೆ.ವಿ. ಲೈನಿನ  ಎಚ್‌.ಟಿ.ವಿದ್ಯುತ್‌ ಹರಿಯುವ ಕಂಬ ರಸ್ತೆಯ ಮಧ್ಯದಲ್ಲೇ ಇದ್ದು ವಾಹನಗಳ ಸುಗಮ ಸಂಚಾರಕ್ಕೆ ತಡೆಯಾಗುವುದು.ಎರಡು ತಿಂಗಳ ಹಿಂದೆ ಈ ರಸ್ತೆಯನ್ನು ಹೇರಳ ನಿಧಿ ಬಳಸಿ ಅಭಿವೃದ್ಧಿ ಪಡಿಸಿದಾಗ ಈ ಕಂಬವನ್ನು ಬದಿಗೆ ಸರಿಸಲು ಲೋಕೋಪಯೋಗಿ ಇಲಾಖೆಯಾಗಲಿ ವಿದ್ಯುತ್‌ ಇಲಾಖೆಯಾಗಲಿ ಮುಂದಾಗಿಲ್ಲ. ಬದಲಾಗಿ ಬಿಳಿಮಾರ್ಕನ್ನು ಸಾಲು ತಪ್ಪಿಸಿ ಗುರುತಿಸಲಾಗಿದೆ. ಶಾಲಾ ಪರಿಸರವಲ್ಲದೆ ಸಾಕಷ್ಟು ವಾಹನಗಳು ಸಂಚರಿಸುವ ಈ ರಸ್ತೆ ಮಧ್ಯದ ಎಚ್‌. ಟಿ. ಲೈನ್‌ ಹೊಂದಿರುವ ವಿದ್ಯುತ್‌ ಕಂಬವನ್ನು ತೆರವುಗೊಳಿಸದ್ದಿದ್ದಲ್ಲಿ ಮುಂದೊಂದು ಇಲ್ಲಿ ದಿನ ಭಾರೀ ಅಪಾಯ ತಪ್ಪಿದ್ದಲ್ಲ. ಕೆಟ್ಟಮೇಲೆ ಬುದ್ಧಿ ಬರುವ ಮುನ್ನ ಇಲಾಖೆ ಎಚ್ಚೆತ್ತು ಈ ಕಂಬವನ್ನು ಪಕ್ಕಕ್ಕೆ ಸರಿಸಿ ಸಂಭಾವ್ಯ ದುರಂತ ತಪ್ಪಿಸುವುದು ಒಳಿತು.