ಸುಶಾಂತ್ ಬರೆದ “ಕೃತಜ್ಞತೆ ಪಟ್ಟಿಯನ್ನು ‘ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ನಟಿ ರಿಯಾ

ಮುಂಬಯಿ: ಬಾಲಿವುಡ್‌ ನಟ ಸುಶಾಂತ್‌ ಸಿಂಗ್‌ ರಜಪೂತ್‌ ಆತ್ಮಹತ್ಯೆ ಪ್ರಕರಣ ಸಂಬಂಧ ಹಲವು ಆರೋಪಗಳನ್ನು ಎದುರಿಸುತ್ತಿರುವ ನಟಿ ರಿಯಾ ಚಕ್ರವರ್ತಿ ಶನಿವಾರ ಸುಶಾಂತ್‌ ಬರೆದಿದ್ದಾರೆ ಎನ್ನಲಾದ ಕೃತಜ್ಞತೆ ಪಟ್ಟಿಯ ಫೋಟೋ  ವೊಂದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.

7 ಕ್ರಮ ಸಂಖ್ಯೆಗಳನ್ನು ಹೊಂದಿರುವ ‘ಕೃತಜ್ಞತೆ ಪಟ್ಟಿ’ಯಲ್ಲಿ ಸುಶಾಂತ್‌ ತಮ್ಮ ಬದುಕಿನಲ್ಲಿ ಯಾರಿಗೆಲ್ಲ ಥ್ಯಾಂಕ್ಸ್‌ ಹೇಳಲು ಬಯಸುತ್ತಿದ್ದಾರೆ ಎಂಬುದನ್ನು ನಮೂದಿ ಸಿದ್ದಾರೆ. ಅದರಲ್ಲಿ, “ನಾನು ನನ್ನ ಜೀವನದಲ್ಲಿ ಲಿಲ್ಲು(ರಿಯಾನ ಸಹೋದರ ಶೋವಿಕ್‌), ಬೇಬು(ರಿಯಾ), ಸರ್‌(ರಿಯಾಳ ತಂದೆ), ಮ್ಯಾಮ್‌(ರಿಯಾಳ ತಾಯಿ), ಫ‌ಡ್ಜ್ (ಸುಶಾಂತ್‌ರ ನಾಯಿ)ಗೆ ಥ್ಯಾಂಕ್ಸ್‌ ಹೇಳಬಯಸುತ್ತೇನೆ. ನನ್ನ ಬದುಕಿನಲ್ಲಿ ಸಿಕ್ಕಿದ ಪ್ರೀತಿಗೆ ನಾನು ಧನ್ಯವಾದ ಹೇಳುತ್ತೇನೆ’ ಎಂದು ಬರೆಯ ಲಾಗಿದೆ. ಜತೆಗೆ, ಇದು ಸುಶಾಂತ್‌ರದ್ದೇ ಕೈಬರಹ ಎಂದೂ ರಿಯಾ ಹೇಳಿದ್ದಾರೆ.

ಇದಲ್ಲದೆ, ನೀರಿನ ಬಾಟಲಿಯೊಂದರ ಫೋಟೋವನ್ನು ಕೂಡ ಅವರು ಅಪ್‌ಲೋಡ್‌ ಮಾಡಿದ್ದು, ‘ಇದೊಂದೇ ನನ್ನ ಬಳಿಯಿರುವ ಸುಶಾಂತ್‌ನ ಆಸ್ತಿ’ ಎಂದೂ ರಿಯಾ ಹೇಳಿಕೊಂಡಿದ್ದಾರೆ.

ಸುಶಾಂತ್‌ ಪ್ರಕರಣದ ತನಿಖೆಗೆ ಸಂಬಂಧಿಸಿ ಬಿಹಾರ ಪೊಲೀಸರು ಉತ್ತಮ ಪ್ರಗತಿ ಸಾಧಿಸಿದ್ದರು ಎಂದು ಮುಂಬೈನಲ್ಲಿ ಕ್ವಾರಂಟೈನ್‌ಗೊಳಗಾಗಿ ಶನಿವಾರ ಬಿಹಾರ ತಲುಪಿರುವ ಐಪಿಎಸ್‌ ಅಧಿಕಾರಿ ವಿನಯ್‌ ತಿವಾರಿ ಹೇಳಿದ್ದಾರೆ. ಆದರೆ, ತನಿಖೆಯ ವಿವರಗಳನ್ನು ಬಹಿರಂಗಪಡಿಸಲು ನಿರಾಕರಿಸಿರುವ ಅವರು, ಆ ರೀತಿ ಮಾಹಿತಿ ಬಹಿರಂಗಪಡಿಸುವುದು ಸೂಕ್ತವಲ್ಲ ಎಂದು ಹೇಳಿದ್ದಾರೆ.