ಚೊಚ್ಚಲ ಬಜೆಟ್‌ ಮಂಡಿಸಿದ ರಿಶಿ ಶುನಾಕ್‌

ಲಂಡನ್‌: ಕೊರೊನಾ ವೈರಸ್‌ ನಿಯಂತ್ರಣಕ್ಕಾಗಿ ಯು.ಕೆ. ಸರ್ಕಾರ 28 ಲಕ್ಷ ಕೋಟಿ ರೂ.ಗಳ ಯೋಜನೆಯನ್ನು ಜಾರಿಗೊಳಿಸಿದೆ.

ಯು.ಕೆ.ಯ ವಿತ್ತ ಸಚಿವ ಹಾಗೂ ಇನ್ಫೋಸಿಸ್‌ ಸಹ ಸಂಸ್ಥಾಪಕ ನಾರಾಯಣ ಮೂರ್ತಿಯವರ ಅಳಿಯ ರಿಷಿ ಶುನಾಕ್‌, ಬುಧವಾರ ತಾವು ಮಂಡಿಸಿದ ಚೊಚ್ಚಲ ಬಜೆಟ್‌ನಲ್ಲಿ ಈ ಯೋಜನೆಯನ್ನು ಘೋಷಿಸಿದ್ದಾರೆ. ಕೊರೊನಾ ವೈರಸ್‌ ಹತೋಟಿಗೆ ಹಾಗೂ ಸೋಂಕಿತರ ಚಿಕಿತ್ಸೆಗಾಗಿ ಇಷ್ಟು ದೊಡ್ಡ ಪ್ರಮಾಣದ ಪರಿಹಾರ ಪ್ಯಾಕೇಜನ್ನು ಬಿಡುಗಡೆ ಮಾಡಿರುವುದು ಯು.ಕೆ. ಮೇಲೆ ಭಾರೀ ಹೊರೆಯಾಗಲಿದೆ. ಆದರೆ, ಈ ಹೊರೆಯನ್ನು ಅರಗಿಸಿಕೊಳ್ಳುವ ಶಕ್ತಿ ಯು.ಕೆ. ಆರ್ಥಿಕತೆಗೆ ಇದೆ ಎಂದು ಅವರು ತಿಳಿಸಿದ್ದಾರೆ.

ಪಿಎಂ ಮೆಚ್ಚುಗೆ: ರಿಷಿ ಶುನಾಕ್‌ ಅವರ ಬಜೆಟ್‌ಗೆ ಅಲ್ಲಿನ ಪ್ರಧಾನಿ ಬೋರಿಸ್‌ ಜಾನ್ಸನ್‌, ಗೃಹ ಸಚಿವೆ ಹಾಗೂ ಭಾರತ ಮೂಲದ ಪ್ರೀತಿ ಪಟೇಲ್‌ ಸಂತೃಪ್ತಿ ವ್ಯಕ್ತಪಡಿಸಿದ್ದಾರೆ. ಚುನಾವಣೆಗೂ ಮುನ್ನ ಕನ್ಸರ್ವೇಟಿವ್‌ ಪಕ್ಷ ಜನತೆಗೆ ನೀಡಿದ್ದ ಆಶ್ವಾಸನೆಯನ್ನು ಪೂರೈಸುವ ಪ್ರಯತ್ನ ಮಾಡಿದೆ ಎಂದು ಬಜೆಟ್‌ ಮಂಡನೆ ವೇಳೆ ರಿಷಿ ಶುನಾಕ್‌ ತಿಳಿಸಿದರು.