ಹೊಸದಿಲ್ಲಿ: ಟೀಂ ಇಂಡಿಯಾ ವಿಕೆಟ್‌ ಕೀಪರ್‌ ಬ್ಯಾಟರ್‌ ರಿಷಭ್‌ ಪಂತ್ ಅವರು 2022ರ ಡಿಸೆಂಬರ್ ನಲ್ಲಿ ಅಪಘಾತಗೊಂಡು ಕೂದಲೆಳೆ ಅಂತರದಲ್ಲಿ ಬದುಕುಳಿದಿದ್ದರು. ಕಾರಿನಲ್ಲಿ ಮನೆಗೆ ಹೋಗುತ್ತಿದ್ದಾಗ ಅಪಘಾತವಾಗಿದ್ದು, ಕಾರಿಗೆ ಬೆಂಕಿ ಹತ್ತಿಕೊಂಡಿತ್ತು. ಸತತ ಒಂದು ವರ್ಷಗಳ ಕಾಲ ಚಿಕಿತ್ಸೆ ಪಡೆದು ಪಂತ್ ಇದೀಗ ಮತ್ತೆ ಕ್ರಿಕೆಟ್‌ ಗೆ ಮರಳಿದ್ದಾರೆ.
ಇದೀಗ ರಿಷಬ್ ಪಂತ್ ಭೀಕರ ಕಾರು ಅಪಘಾತದ ಸಂದರ್ಭದಲ್ಲಿ ಅವರನ್ನು ರಕ್ಷಿಸಿದ ಇಬ್ಬರಿಗೆ ಸ್ಕೂಟಿಗಳನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಡಿಸೆಂಬರ್ 2022 ರಲ್ಲಿ ದೆಹಲಿಯಿಂದ ರೂರ್ಕಿಯಲ್ಲಿರುವ ತನ್ನ ತವರು ಮನೆಗೆ ಹೋಗುತ್ತಿದ್ದ ಪಂತ್ ಅಪಘಾತಕ್ಕೀಡಾದರು.
ಅವರನ್ನು ಆ ಅಪಘಾತದಿಂದ ರಕ್ಷಿಸಿದ ರಜತ್ ಕುಮಾರ್ ಮತ್ತು ನಿಶು ಕುಮಾರ್ ಅವರಿಗೆ ಪಂತ್ ಸ್ಕೂಟರ್‌ಗಳನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಇದರ ಬಗ್ಗೆ ವಿಡಿಯೋವೊಂದು ಇದೀಗ ವೈರಲ್ ಆಗುತ್ತಿದೆ.
“ಆ ಇಬ್ಬರು ಹುಡುಗರನ್ನು ದೇವರು ಕಳುಹಿಸಿದ್ದಾರೆ. ಅವರು ರಿಷಬ್ ನ ಜೀವ ಉಳಿಸಿದರು. ಅವರನ್ನು ಡೆಹ್ರಾಡೂನ್‌ ಗೆ ಕರೆದೊಯ್ಯುವ ನಿರ್ಧಾರವು ಅವರ ಜೀವವನ್ನೂ ಉಳಿಸಿದೆ” ಎಂದು ಸ್ವತಂತ್ರ ಶಾಸಕ ಉಮಂಗ್ ಕುಮಾರ್ ಅಂದು ತಿಳಿಸಿದ್ದರು.
