Advertisement
ಹೆಲ್ಸಿಂಕಿ ವೈವಿಧ್ಯಗಳಿಂದ ಕೂಡಿದ ನಗರ ಹಾಗೂ ಸೈಕಲ್‌ ಸವಾರರ ಕನಸಿನ ಭೂಮಿ. ಸುಂದರ ಉದ್ಯಾನವನಗಳು, ದಟ್ಟವಾದ ಮರಗಿಡಗಳು ಹಾಗು ಸಮುದ್ರದ ತಡಿಯಲ್ಲೇ ಸಾಗುವ ನೀಳವಾದ ರಸ್ತೆಗಳಿಂದ ಕೂಡಿದೆ. ಮುಖ್ಯವಾಗಿ ಸೈಕಲ್‌ ಸವಾರಿಗಾಗಿಯೇ ನಿರ್ಮಾಣ ಹೊಂದಿದೆಯೋ ಎನಿಸುವಂಥ ರಸ್ತೆಗಳು ಇಲ್ಲಿವೆ. 1200 ಕಿ.ಮೀ ಸೈಕಲ್‌ ದಾರಿಯಲ್ಲಿ 500 ಕಿ. ಮೀ. ದೂರ ಮನೋರಂಜನೆಗಾಗಿ ಇರುವ ಪ್ರದೇಶದÇÉೇ ಸಾಗುತ್ತದೆ. ಇಲ್ಲಿ ಬಗೆಬಗೆಯ ಜನರು ಸೈಕಲ್‌ ಮೇಲೆ ಓಡಾಡುವುದನ್ನು ನೋಡಬಹುದು. ಪ್ರವಾಸಿಗರು, ಕಚೇರಿಗೆ ಹೋಗುವವರು, ಶಾಲಾಮಕ್ಕಳು, ನವ ತರುಣ-ತರುಣಿಯರು, ದಂಪತಿಗಳು, ವ್ಯಾಯಾಮ ಮಾಡುವವರು ನಾನಾ ಬಗೆಯವರು ಇದ್ದಾರೆ. ಚಿಕ್ಕ ಸೀಟ್‌ ಅಳವಡಿಸಿಕೊಂಡು ಅದರಲ್ಲಿ ಪುಟಾಣಿಗಳನ್ನು ಕೂರಿಸಿಕೊಂಡು ಓಡಾಡುವವರಿದ್ದಾರೆ. ಪುಟ್ಟ ಸೈಕಲ್‌ಗ‌ಳಲ್ಲಿ ಹಿಂಬಾಲಿಸುವ ಕೊಂಚ ದೊಡ್ಡ ಮಕ್ಕಳ ಜೊತೆ ಸಾಗುವ ಪೋಷಕರಿದ್ದಾರೆ. ಇಲ್ಲಿ ಅಂಚೆ ಬಟವಾಡೆಗೂ ಸೈಕಲ್‌. ಆಹಾರ ಪದಾರ್ಥಗಳ ವಿತರಣೆಗೂ ಅದೇ.
ನನಗಂತೂ ಈ ಸುಂದರ ನಗರವನ್ನು ಅನ್ವೇಷಿಸಲು ಸೈಕಲ್‌ ಒಂದು ಉತ್ತಮ ಸಂಗಾತಿ. ಗೂಗಲ್‌ ಮ್ಯಾಪಿನ ಸಹಾಯದಿಂದ ನಾನು ನೋಡಬೇಕೆಂದಿರುವ ಸ್ಥಳವನ್ನು ಆರಿಸಿಕೊಂಡು ನನ್ನ ಸೈಕಲ್‌ ಜೊತೆ ಪಯಣ ಆರಂಭಿಸುತ್ತೇನೆ. ಖಚಿತವಾದ ಮಾರ್ಗವನ್ನು ತೋರುವ ಗೂಗಲ್‌ ಮ್ಯಾಪ್‌ ನಂಬಿಕೆಗೆ ಅರ್ಹನಾದ ಸ್ನೇಹಿತ. ನನ್ನ ಮೊತ್ತಮೊದಲ ಸೈಕಲ್‌ ಸವಾರಿ ಹೆಲ್ಸಿಂಕಿಯ ಹೃದಯ ಭಾಗದಲ್ಲಿರುವ ಪಾರ್ಕಿನ ಸುತ್ತಲೇ ಆಗಿತ್ತು. ಬಹಳ ಅಂದವಾದ ಉದ್ಯಾನವನ. ಪಾರ್ಕಿನಲ್ಲಿ ಸೈಕಲ್‌ ಸವಾರರ ಜೊತೆಗೇ ನಡಿಗೆಗೆ ಬಂದವರು, ಓಡುವವರು ಬೇಕಾದಷ್ಟು ಮಂದಿ ಕಾಣಿಸುತ್ತಾರೆ. ಈ ರಮ್ಯ ಉದ್ಯಾನವನದಲ್ಲಿ ನನಗೆ ಕವಿ ರಾಬರ್ಟ್‌ ಫ್ರಾಸ್ಟ್‌ನ ಕವಿತೆಯ ದ ವುಡ್ಸ್‌ ಆರ್‌ ಲವ್ಲೀ, ಡಾರ್ಕ್‌ ಅಂಡ್‌ ಡೀಪ್‌ ಎಂಬ ಸಾಲುಗಳು ನೆನಪಾಗುತ್ತವೆ. ಸೆಂಟ್ರಲ್‌ ಪಾರ್ಕ್‌ನಲ್ಲಿ ಸೈಕ್ಲಿಂಗ್‌ ಮಾಡುವಾಗ ನನಗೊಂದು ಹೊಸವಿಚಾರ ತಿಳಿಯಿತು. ಅಲ್ಲಿ ಸಾಮೂಹಿಕ ಒಡೆತನದಲ್ಲಿ ತೋಟಗಳನ್ನು ಬೆಳೆಸುವ ಪರಿಪಾಠವಿದೆ. ಒಂದೇ ತೋಟ, ಹಲವರು ಒಡೆಯರು. ನಗರಾಡಳಿತವು ಇಲ್ಲಿನ ನಾಗರಿಕರಿಗೆ ಬಾಡಿಗೆಯಲ್ಲಿ ಇಂಥ ಸ್ಥಳಗಳನ್ನು ಬಿಟ್ಟುಕೊಡುತ್ತದೆ. ಜನ ಬಿಡುವಿನ ವೇಳೆಯಲ್ಲಿ ತೋಟಗಾರಿಕೆಯ ಹವ್ಯಾಸಕ್ಕೆ ಹಚ್ಚಿಕೊಳ್ಳಲು ಇದು ಮುಕ್ತ ಅವಕಾಶ.
Related Articles
ನಗ್ನ ಸೈಕಲ್‌ ಸವಾರರು
ಹೆಲ್ಸಿಂಕಿಯಲ್ಲಿ ನನಗೆ ಆದ ಒಂದು ಕುತೂಹಲಕರ ಅಷ್ಟೇ ಆಘಾತಕಾರಿ ಅನುಭವವೆಂದರೆ ನಗ್ನ ಸೈಕಲ್‌ ಸವಾರರ ನಗರ ಪ್ರದಕ್ಷಿಣೆ ! ಕೆಲವು ನಿಮಿಷ ಈ ದೃಶ್ಯ ನನ್ನನ್ನು ಮಂತ್ರಮುಗ್ಧಗೊಳಿಸಿತು. ಒಮ್ಮೆಯಂತೂ ಆ ನಗ್ನ ಸವಾರರ ಗುಂಪು ಜನಗಳ ಗಮನ ತಮ್ಮ ಕಡೆಗೆ ತಿರುಗಿದ್ದು ಕಂಡು ಬೇಗಬೇಗನೆ ಮುಂದಕ್ಕೆ ಸಾಗಿತು. ಇಲ್ಲಿಯೇ ಸಮೀಪದಲ್ಲಿ ಹೆಲ್ಸಿಂಕಿಯ ಸುಂದರ ಭವ್ಯ ಕೆಥೆಡ್ರಾಲ್‌ ಇದೆ.
Advertisement
ಹೆಲ್ಸಿಂಕಿಯಿಂದ 50 ಕಿ. ಮೀ. ದೂರದಲ್ಲಿ ರುವ ಐತಿಹಾಸಿಕ ನಗರ ಪೊವೂìಗೆ ಸವಾರಿ ಹೋದದ್ದು ಒಂದು ಅತ್ಯದ್ಭುತ ಅನುಭವ. ಸುಂದರ ಮುಂಜಾವಿನಲ್ಲಿ ಹಿತಕರ ವಾತಾವರಣದಲ್ಲಿ ಪ್ರಯಾಣ ಚೇತೋಹಾರಿ. ದಾರಿಯ ಇಕ್ಕೆಲಗಳಲ್ಲಿ ತೋಟಗಳಿದ್ದವು. ಅನೇಕ ಸೈಕಲ್‌ ಸವಾರರು ಮಾತಿಗೆ ಸಿಕ್ಕರು. ಹಾಗೆ, ಅರ್ಧದಾರಿಯಲ್ಲಿ ನನಗೆ ಜೊತೆಯಾದ ಸೈಕಲ್‌ ಸವಾರನೊಬ್ಬ ಜತೆಯಾದ. ಆತನ ಹೆಸರು ಪ್ಯಾಟ್ರಿಕ್‌. ನನ್ನ ಹಾಗೆ ಹೆಲ್ಸಿಂಕಿಯಿಂದ ಪೊವೂìಗೆ ಹೊರಟಿದ್ದ. ಪ್ಯಾಟ್ರಿಕ್‌ನ ದೀರ್ಘ ಹಾದಿಯ ಸೈಕಲ್‌ ತುಳಿದೆ. ಜೀವನದ ಪಯಣದಲ್ಲಿ ಹೀಗೆ ಅಪರಿಚಿತರು ಅನಿರೀಕ್ಷಿತವಾಗಿ ಜೊತೆಯಾಗುತ್ತಾರೆ. ಹಳೆಯ ಯಾವುದೋ ಅನುಬಂಧದ ತಂತು ಅವರನ್ನು ನಮ್ಮ ಜೊತೆಯಾಗಿಸಿತು ಎಂದು ಭಾವಿಸಬೇಕಷ್ಟೆ. ಒಂದು ಐ.ಟಿ. ಕಂಪನಿಯಲ್ಲಿ ಮಾರಾಟ ಪ್ರತಿನಿಧಿ ಆಗಿರುವ ಪ್ಯಾಟ್ರಿಕ್‌ ಹಲವಾರು ಬಾರಿ ಭಾರತಕ್ಕೆ ಭೇಟಿ ನೀಡಿದ್ದಾನಂತೆ.
ಪೊವೂì ಪಟ್ಟಣ ಹತ್ತಿರ ಬಂದ ಹಾಗೆ ನಮ್ಮ ದಾರಿಗಳು ಬದಲಾದವು. ಅಲ್ಲೇಕೋ ಮಂಗಳೂರಿನ ರಸ್ತೆಗಳ ನೆನಪಾಯಿತು. ಆದರೆ, ವಾಹನ ದಟ್ಟಣೆ ಅತಿಯಾಗಿ ಇರಲಿಲ್ಲ. ಎರಡು ಗಂಟೆ ಮೂವತ್ತು ನಿಮಿಷದಲ್ಲಿ 50 ಕಿ. ಮೀ. ದೂರ ಕ್ರಮಿಸಿದ್ದೆವು. ಪೊವೂì ಸೊಗಸಾದ ಪುರಾತನ ನಗರ. ಬಹುತೇಕ ಎಲ್ಲಾ ಪುರಾತನ ಯೂರೋಪ್‌ ನಗರಗಳಲ್ಲಿರುವ ಹಾಗೆ ಅಂದವಾದ ಹಳೆಯ ಕಾಲದ ಇಗರ್ಜಿ, ಭವ್ಯವಾದ ಚೌಕ ಮತ್ತು ಬಂದರು ಕಟ್ಟೆ ಇದೆ.
ಅಲ್ಲೆಲ್ಲ ನೋಡಿದ ಬಳಿಕ ಹೆಲ್ಸಿಂಕಿಗೆ ಮರಳುವಾಗ ಸೈಕಲನ್ನು ಫೆರಿಯ ಮೇಲೆ ಹೇರಿಕೊಂಡು ಬಂದೆ. ಫೆರಿ ಎಂದರೆ ಪ್ರಯಾಣಿಕರನ್ನು ಮತ್ತು ಸರಂಜಾಮುಗಳನ್ನು ಸಾಗಿಸುವ ನೌಕೆ. ನೂರಕ್ಕೂ ಹೆಚ್ಚು ಸೈಕಲ್‌ಗ‌ಳನ್ನು ತುಂಬಿಕೊಂಡು ಫೆರಿ ಹೊರಟಿತು. ಫೆರಿಯ ಮೇಲ್ಛಾವಣಿಯಲ್ಲಿ ಸೈಕಲ್‌ಗ‌ಳನ್ನು ಇಟ್ಟಿದ್ದರು. ಸುಮಾರು ಮೂರು ಗಂಟೆ ಪಯಣದಲ್ಲಿ ಸಣ್ಣ ದ್ವೀಪಗಳ ಸುಂದರ ನೋಟ ನೋಡಲು ಚೆನ್ನಾಗಿತ್ತು. ಫೆರಿಯಲ್ಲಿದ್ದ ಕೆಫೆಯೊಂದು ಸೈಕಲ್‌ ಸವಾರರಿಗೆ ಅಗತ್ಯವಾಗಿ ಬೇಕಾಗಿದ್ದ ಉಪಹಾರ ಒದಗಿಸಿತ್ತು. ಸಂಜೆಯ ಚಳಿಗೆ ಬಿಸಿ ಬಿಸಿ ಕಾಫಿ ತುಂಬ ಚೇತೋಹಾರಿಯಾಗಿತ್ತು. ಮಧ್ಯೆ ಇಸ್ಪೂ ನಗರ ಸಿಗುತ್ತದೆ. ಅಲ್ಲಿನ ಅತಿ ದೊಡ್ಡ ಸರೋವರ ಬೋಡೊಮ್‌ ಇದೆ. ಪ್ರಸಿದ್ಧ ಗೇಮ್‌ ಶೋ ಆಂಗ್ರಿ ಬರ್ಡ್‌ ಮತ್ತು ನೋಕಿಯಾದ ಪ್ರಧಾನ ಕಛೇರಿಗಳಿರುವ ರೋವಿಯೋ ಪಟ್ಟಣ ಅಲ್ಲಿಯೇ ಸಮೀಪದಲ್ಲಿದೆ. ಇಸ್ಪೂದಲ್ಲಿನ ನೀರಿನ ಹಾದಿಗುಂಟದ ಪ್ರಯಾಣ ಮರೆಯಲಾರದ ಅನುಭವ. ಹೆಲ್ಸಿಂಕಿಯ ಇರುವಷ್ಟು ಕಾಲ ಹೊಸ ಪ್ರದೇಶಗಳ ಅನ್ವೇಷಣೆ ನನ್ನ ಕನಸು. ಚಳಿಗಾಲದಲ್ಲಿ ಸೈಕಲ್‌ ಸವಾರಿ ಹಿತಕರ. ಹಿಮದಲ್ಲಿ ದಪ್ಪ ಚಕ್ರದ ಸೈಕಲ್‌ ಸವಾರಿ ಇಲ್ಲಿ ಜನಪ್ರಿಯ. ಸೈಕಲ್‌ ನಿರಂತರವಾಗಿ ಚಲಿಸುತ್ತಿದ್ದರೆ ಮಾತ್ರ ಸಮತೋಲನದಲ್ಲಿರುತ್ತದೆ. ಬದುಕು ಕೂಡ ಹಾಗೆಯೇ.
ರಮೇಶಬಾಬು ಪಿ. ವಿ.