ಕಪಿಲ್‌ ದೇವ್‌ ನ್ಯೂ ಲುಕ್‌ಗೆ ರಿಚರ್ಡ್ಸ್‌, ಧೋನಿ ಸ್ಫೂರ್ತಿಯಂತೆ !

ಹೊಸದಿಲ್ಲಿ: ಭಾರತದ 1983ರ ವಿಶ್ವಕಪ್‌ ಹೀರೋ ಕಪಿಲ್‌ದೇವ್‌ ಕೆಲವು ದಿನಗಳಿಂದೀಚೆ ಹೊಸ ರೂಪದಲ್ಲಿ ಕಂಗೊಳಿಸುತ್ತಿದ್ದಾರೆ. ತಲೆಯನ್ನು ನುಣ್ಣಗೆ ಬೋಳಿಸಿಕೊಂಡು, ಅದರ ಮೇಲೆ ಸನ್‌ ಗ್ಲಾಸ್ ‌ ಏರಿಸಿಕೊಂಡ ಅವರೀಗ ದಾಡೀವಾಲಾ ಆಗಿದ್ದಾರೆ. “ಈ ಕ್ರಿಕೆಟಿಗ ಯಾರು?’ ಎಂಬ ಪ್ರಶ್ನೆ ಮುಂದಿಟ್ಟಾಗ ಅನೇಕರಿಂದ ತಪ್ಪು ಉತ್ತರವೇ ಬಂದಿತ್ತು. ಅಷ್ಟರ ಮಟ್ಟಿಗೆ ಕಪಿಲ್‌ ಬದಲಾಗಿದ್ದರು!

ಹಾಗಾದರೆ ಈ “ನ್ಯೂ ಲುಕ್‌ನ ಗುಟ್ಟೇನು?’ ಎಂಬ ಅನೇಕರ ಕುತೂಹಲಕ್ಕೆ ಸ್ವತಃ ಕಪಿಲ್‌ ಅವರೇ ಉತ್ತರ ನೀಡಿದ್ದಾರೆ. ಇದಕ್ಕೆ ವಿವಿಯನ್‌ ರಿಚರ್ಡ್ಸ್‌ ಮತ್ತು ಮಹೇಂದ್ರ ಸಿಂಗ್‌ ಧೋನಿ ಅವರೇ ಸ್ಫೂರ್ತಿ ಎಂದಿದ್ದಾರೆ.

ಅನುಸರಿಸಿದರೆ ತಪ್ಪೇನು?
“ವಿವಿಯನ್‌ ರಿಚರ್ಡ್ಸ್‌ ನನ್ನ ಹೀರೋ. ಅವರದೂ ಇದೇ ಲುಕ್‌. ಅಂದಮೇಲೆ ನಾನು ಅವರನ್ನು ಅನುಸರಿಸಿದರೆ ತಪ್ಪೇನು? ಹಾಗೆಯೇ ಧೋನಿ… ಅವರು 2011ರಲ್ಲಿ ವಿಶ್ವಕಪ್‌ ಗೆದ್ದ ಬಳಿಕ ತಲೆಗೂದಲ ಹರಕೆ ಒಪ್ಪಿಸಿದ್ದರು. ನನಗೆ ಈಗ ಈ ರೂಪ ತಾಳಬೇಕು ಎಂದೆನಿಸಿತು…’ ಎಂದು ಕಪಿಲ್‌ ಹೇಳಿದ ವೀಡಿಯೋ ಒಂದನ್ನು ಚೆನ್ನೈ ಸೂಪರ್‌ ಕಿಂಗ್ಸ್‌  ಟ್ವೀಟ್ ಮಾಡಿದೆ. “ನೀವು ನನ್ನಿಂದ ಸರಿಯಾದ ಸ್ಫೂರ್ತಿಯನ್ನೇ ಪಡೆದಿರುವಿರಿ ಫ್ರೆಂಡ್‌…’ ಎಂದು ರಿಚರ್ಡ್ಸ್‌ ಕೂಡ ಇದಕ್ಕೆ ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದಾರೆ.

ಕ್ರಿಕೆಟ್‌ ವಿದಾಯದ ಬಳಿಕ ರಿಚರ್ಡ್ಸ್‌ ಹೆಚ್ಚು-ಕಡಿಮೆ “ಬಾಲ್ಡಿ’ಯಾಗಿಯೇ ಉಳಿದಿದ್ದಾರೆ. ಈಗ ಕಪಿಲ್‌ ಕೂಡ ಒಂದು ನೋಟಕ್ಕೆ ಕೆರಿಬಿಯನ್‌ ಕ್ರಿಕೆಟ್‌ ದೈತ್ಯನ ಹಾಗೆ ಕಾಣುವುದು ಸುಳ್ಳಲ್ಲ !