HD Revanna: ರೇವಣ್ಣಗೆ ಧೈರ್ಯ ತುಂಬಿದ ಜೆಡಿಎಸ್‌ ಶಾಸಕರು

ಬೆಂಗಳೂರು: ಅರಕಲಗೂಡು ಕ್ಷೇತ್ರದ ಜೆಡಿಎಸ್‌ ಶಾಸಕ ಎ.ಮಂಜು ಹಾಗೂ ಶ್ರವಣಬೆಳಗೊಳದ ಸಿ.ಎನ್‌.ಬಾಲಕೃಷ್ಣ ಗುರುವಾರ ಪರಪ್ಪನ ಅಗ್ರಹಾರ ಕಾರಾಗೃಹದಲ್ಲಿರುವ ಎಚ್‌.ಡಿ.ರೇವಣ್ಣ ಅವರನ್ನು ಭೇಟಿ ಮಾಡಿ ಸಾಂತ್ವನ ಹೇಳಿ ಧೈರ್ಯ ತುಂಬಿದರು.

ಬಳಿಕ ಎ.ಮಂಜು ಮಾಧ್ಯಮದವರ ಜತೆಗೆ ಮಾತನಾಡಿ, ಈ ರೀತಿ ಘಟನೆಗಳು, ದ್ವೇಷದ ರಾಜಕಾರಣ ಯಾರಿಗೂ ಆಗಬಾರದು. ರೇವಣ್ಣ ಅವರನ್ನು ಅನಗತ್ಯವಾಗಿ ಪ್ರಕರಣದಲ್ಲಿ ಸಿಲುಕಿಸಿರುವುದು ತಪ್ಪು. ಯಾರೇ ತಪ್ಪು ಮಾಡಿದರೂ ಕ್ರಮ ತೆಗೆದುಕೊಳ್ಳಿ. ಇದರಲ್ಲಿ ಎರಡನೇ ಮಾತಿಲ್ಲ. ರೇವಣ್ಣ ಮೇಲೆ ಈ ರೀತಿಯ ಆಪಾದನೆ ಮಾಡಿರುವುದು ತಪ್ಪು ಎಂದರು.

ರೇವಣ್ಣ ಅವರು ಆರೋಗ್ಯವಾಗಿ, ಧೈರ್ಯವಾಗಿ, ಚೆನ್ನಾಗಿ ಇದ್ದಾರೆ. ಸೋಮವಾರ ರೇವಣ್ಣ ಅವರಿಗೆ ಜಾಮೀನು ಸಿಗಲಿದೆ ಎಂಬ ನಂಬಿಕೆ ಇದೆ. ಅವರಿಗೆ ಧೈರ್ಯ ತುಂಬಿದ್ದೇವೆ ಎಂದು ತಿಳಿಸಿದರು.