ರಿಲ್ಯಾಕ್ಸ್‌ ಮೂಡಲ್ಲಿ ಸಿಎಂ: ರಾಜಕುಮಾರ ಸಿನಿಮಾ ವೀಕ್ಷಣೆ

ಮೈಸೂರು: ನಂಜನಗೂಡು ಮತ್ತು ಗುಂಡ್ಲುಪೇಟೆ ಉಪ ಚುನಾವಣೆ ಹಿನ್ನೆಲೆಯಲ್ಲಿ ಕಳೆದ ಕೆಲ ದಿನಗಳಿಂದ ನಗರದಲ್ಲಿ ವಾಸ್ತವ್ಯ ಹೂಡಿ ಬಿಡುವಿಲ್ಲದ ಚುನಾವಣಾ ಪ್ರಚಾರದಲ್ಲಿ ತೊಡಗಿದ್ದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಈಗ ರಿಲ್ಯಾಕ್ಸ್‌ ಮೂಡಲ್ಲಿದ್ದಾರೆ.

ಎರಡು ದಿನಗಳಿಂದ ರಾಜಕೀಯ ಒತ್ತಡ ಹಾಗೂ ಉಪ ಚುನಾವಣೆಯ ಜಂಜಾಟಗಳನ್ನು ಬದಿಗೊತ್ತಿ ಆರಾಮವಾಗಿ ಕಾಲ ಕಳೆಯುತ್ತಿರುವ ಸಿಎಂ ಸಿದ್ದರಾಮಯ್ಯ, ಭಾನುವಾರ ಪುನೀತ್‌ ರಾಜ್‌ಕುಮಾರ್‌ ಅಭಿನಯದ “ರಾಜಕುಮಾರ’ ಚಲನಚಿತ್ರ ವೀಕ್ಷಿಸಿದರು. ಕೆಲ ಆಪ್ತರೊಂದಿಗೆ ಜಯಲಕ್ಷ್ಮೀಪುರಂನ ಡಿಆರ್‌ಸಿ ಮಲ್ಟಿಫ್ಲೆಕ್ಸ್‌ನಲ್ಲಿ ಸಂಜೆ 4.30ರ  ಪ್ರದರ್ಶನ ವೀಕ್ಷಿಸಿದರು. 

ಸ್ಥಳೀಯ ಕಾಂಗ್ರೆಸ್‌ ಮುಖಂಡರಾದ ಜಿ.ವಿ.ಸೀತಾರಾಂ, ಪ್ರದ್ಯುಮ್ನ, ಜಗದೀಶ್‌, ಉಮೇಶ್‌, ಮರಿಸ್ವಾಮಿ ಮೊದಲಾದವರು ಮುಖ್ಯಮಂತ್ರಿ ಜತೆಗೆ ಸಿನಿಮಾ ವೀಕ್ಷಿಸಿದರು.  ಶನಿವಾರ ಸಚಿವ ಈಶ್ವರ ಖಂಡ್ರೆ ಮತ್ತಿತರ ಜತೆ ಸಿಎಂ ಸಿದ್ದರಾಮಯ್ಯ ಮೈಸೂರಿನ ರಮ್ಯಾ ಹೋಟೆಲ್‌ನಲ್ಲಿ ಇಡ್ಲಿ, ವಡೆ ಸವಿದಿದ್ದರು.