ರಾಯಚೂರು: ಕೃಷಿಯಲ್ಲಿ ಕೆಲ ಯಂತ್ರಗಳು ಕ್ರಾಂತಿಯನ್ನೇ ಮಾಡಿದ್ದು, ರೈತಸ್ನೇಹಿಯಾಗಿ ಕೆಲಸ ಮಾಡುತ್ತಿವೆ. ಕೃಷಿ ಇನ್ನಷ್ಟು ಸರಳೀಕರಣಗೊಳಿಸಲು ಯಂತ್ರಗಳ ಪಾತ್ರ ಬಹಳ ಮಹತ್ವದ್ದಾಗಿದೆ ಎಂದು ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯದ ಶಿಕ್ಷಣ ನಿರ್ದೇಶಕ ಎಂ.ಜಿ. ಪಾಟೀಲ ಅಭಿಪ್ರಾಯಪಟ್ಟರು.
ನಗರದ ಕೃಷಿ ವಿಜ್ಞಾನಗಳ ವಿಶ್ವವಿದ್ಯಾಲಯದ ಪ್ರೇಕ್ಷಾ ಗೃಹದಲ್ಲಿ ಕೃಷಿ ತಾಂತ್ರಿಕ ಕಾಲೇಜು ಹಾಗೂ ಅಖೀಲ ಭಾರತ ಸಮನ್ವಿತ ಸಂಶೋಧನೆ ಯೋಜನೆಗಳ ಸಹಯೋಗದಲ್ಲಿ ಗುರುವಾರ ಏರ್ಪಡಿಸಿದ್ದ ಕೃಷಿ ತಂತ್ರಜ್ಞಾನ ಹಾಗೂ ಯಂತ್ರೋಪಕರಣಗಳ ಪ್ರಾತ್ಯಕ್ಷಿಕೆ ಮೇಳ-2022 ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಯಾಂತ್ರಿಕ ಕೃಷಿ ವಿಶೇಷ ಸ್ಥಾನ ಹೊಂದಿದ್ದು, ರೈತರು ಯಂತ್ರಗಳ ಬಳಕೆಯಿಂದ ಖರ್ಚು ತಗ್ಗಿಸಬಹುದು.
ರೈತರ ಆದಾಯ ಇಮ್ಮಡಿಗೊಳಿಸುವ ಉದ್ದೇಶಕ್ಕಾಗಿ ಕೇಂದ್ರ-ರಾಜ್ಯ ಸರ್ಕಾರಗಳು ಯೋಜನೆ ರೂಪಿಸುತ್ತಿವೆ. ಕೃಷಿಗೆ ತಗಲುವ ವೆಚ್ಚ ಕಡಿಮೆಗೊಳಿಸುವುದು ಲಾಭವಿದ್ದಂತೆ. ಉದಾಹರಣೆಗೆ ಟ್ರಾಕ್ಟರ್‌ ಕೃಷಿಯ ಭಾಗವಾದಂತಾಗಿದೆ. ಯುವಕರು ಯಾಂತ್ರಿಕ ಕೃಷಿಗೆ ಒಲವು ತೋರುತ್ತಿರುವುದು ಒಳ್ಳೆಯ ಬೆಳವಣಿಗೆ ಎಂದರು. ಕೃಷಿ ಇಲಾಖೆ ಜಂಟಿ ನಿರ್ದೇಶಕಿ ದೇವಿಕಾ ಆರ್‌. ಮಾತನಾಡಿ, ರೈತರಿಗೆ ಕೂಲಿ ಕಾರ್ಮಿಕರ ವೆಚ್ಚವೇ ಹೆಚ್ಚು ಹೊರೆಯಾಗುತ್ತಿದೆ.
ಈಗ ಸಾಕಷ್ಟು ಕೆಲಸಗಳಿಗೆ ಯಂತ್ರಗಳ ಆವಿಷ್ಕಾರ ಮಾಡಲಾಗಿದ್ದು, ರೈತರು ಸರಿಯಾಗಿ ಬಳಸಿಕೊಳ್ಳಬೇಕು. ಮಳೆ ಬಂದಾಗ ಸಿದ್ಧತೆ ಮಾಡಿಕೊಳ್ಳುವುದಕ್ಕಿಂತ ಪೂರ್ವದಲ್ಲೇ ತಯಾರಿ ಮಾಡಿಕೊಂಡರೆ ಅನುಕೂಲವಾಗುತ್ತದೆ ಎಂದರು. ಕೃಷಿ ಸಂಶೋಧನಾ ಎಂಜಿನಿಯರ್‌ ಡಾ| ಕೆ.ವಿ. ಪ್ರಕಾಶ ಪ್ರಾಸ್ತಾವಿಕ ಮಾತನಾಡಿ, ನೂತನ ಯಂತ್ರಗಳನ್ನು ಸೂಕ್ತ ದರದಲ್ಲಿ ತಲುಪಿಸಲು ನೆರವಾಗಲು ಉದ್ದಿಮೆಗಳನ್ನು ಕೂಡ ಆಹ್ವಾನಿಸಲಾಗಿದೆ ಎಂದು ವಿವರಿಸಿದರು.
ಈ ವೇಳೆ ವಿವಿ ವ್ಯವಸ್ಥಾಪನಾ ಮಂಡಳಿ ಸದಸ್ಯ ತ್ರಿವಿಕ್ರಮ ಜೋಶಿ, ಕೊಟ್ರೆಪ್ಪ ಬಿ. ಕೊರೆರ, ಸುನೀಲಕುಮಾರ ವರ್ಮಾ, ಸಂಶೋಧನಾ ನಿರ್ದೇಶಕ ಡಾ| ಬಿ.ಕೆ. ದೇಸಾಯಿ, ವಿಸ್ತರಣಾ ನಿರ್ದೇಶಕ ಡಾ| ಡಿ.ಎಂ. ಚಂದರಗಿ, ಕುಲಸಚಿವ ಡಾ| ಎಂ. ವೀರನಗೌಡ, ಸಹ ಸಂಶೋಧನಾ ನಿರ್ದೇಶಕ ಡಾ| ಗುರುರಾಜ ಸುಂಕದ, ಕೃಷಿ ತಾಂತ್ರಿಕ ಕಾಲೇಜಿನ ಡೀನ್‌ ಡಾ| ಎಂ.ನೇಮಿಚಂದ್ರಪ್ಪ ಸೇರಿದಂತೆ ಇತರರಿದ್ದರು.
ಗಮನ ಸೆಳೆದ ಯಂತ್ರಗಳು
ಕೃಷಿ ವಿವಿಯಲ್ಲಿ ಪ್ರದರ್ಶನಕ್ಕಿಟ್ಟಿದ್ದ ವಿವಿಧ ಕೃಷಿ ಯಂತ್ರೋಪಕರಣಗಳು ಗಮನ ಸೆಳೆದವು. ರಿಮೋಟ್‌ ಚಾಲಿತ ಯಂತ್ರ, ಡ್ರೋಣ್‌ ಚಾಲಿತ ಸಿಂಪರಣಾ ಯಂತ್ರ, ಟ್ರಾಕ್ಟರ್‌ ಚಾಲಿತ ಸಿಂಪರಣಾ-ಕಳೆ ಕೀಳುವುದು, ಕಟಾವು ಮಾಡುವುದು, ಹತ್ತಿ ಕಟ್ಟಿಗೆ ಕತ್ತರಿಸುವುದು, ಗಾಳಿ ಒತ್ತಡ ಸಿಂಪರಣೆ ಯಂತ್ರ, ಕಳೆ ನಾಶಕ ಸಿಂಪಡಿಸುವ ಯಂತ್ರ, ಸ್ವಯಂ ಚಾಲಿತ ಕೂರಿಗೆ, ಸ್ವಯಂ ಚಾಲಿತ ಕಟಾವು ಮಾಡಿ ಪೆಂಡಿ ಕಟ್ಟುವ ಯಂತ್ರ, ಕಳೆ ತೆಗೆಯುವ ಮತ್ತು ಗೊಬ್ಬರ ಬಿತ್ತುವ ಯಂತ್ರ, ಸುಧಾರಿತ ಕಳೆ ತಗೆಯುವ ಯಂತ್ರಗಳು, ಪೆಡಲ್‌ ಮತ್ತ ಶಕ್ತಿ ಚಾಲಿತ ಮೆಕ್ಕೆಜೋಳ ಒಕ್ಕಣೆ ಯಂತ್ರ, ಎತ್ತು ಚಾಲಿತ ಸಿಂಪರಣಾ ಯಂತ್ರಗಳು, ಸುಧಾರಿತ ಚಕ್ಕಡಿಗಳು, ಕೂರಿಗೆ ಯಂತ್ರ, ಗೊಬ್ಬರ ಹರಡುವ ಯಂತ್ರ, ಸೌರಶಕ್ತಿ ಚಾಲಿತ ಸಿಂಪರಣಾ ಯಂತ್ರಗಳು, ಸೌರಶಕ್ತಿ ಚಾಲಿತ ಪಂಪ್‌ಸೆಟ್‌ ಸೇರಿದಂತೆ ಇನ್ನಿತರ ಯಂತ್ರಗಳಿದ್ದವು.
