RCB; ಮೈಕ್ ಹೆಸ್ಸನ್, ಸಂಜಯ್ ಬಂಗಾರ್ ಜಾಗಕ್ಕೆ ಹೊಸಬರ ಹುಡುಕಾಟ?

ಬೆಂಗಳೂರು: ಮುಂದಿನ ಐಪಿಎಲ್ ಋತುವಿನಲ್ಲಿ ತಂಡದ ಕ್ರಿಕೆಟ್ ನಿರ್ದೇಶಕ ಮೈಕ್ ಹೆಸ್ಸನ್ ಮತ್ತು ಮುಖ್ಯ ಕೋಚ್ ಸಂಜಯ್ ಬಂಗಾರ್ ಅವರೊಂದಿಗೆ ಮುಂದುವರಿಯದಿರಲು ನಿರ್ಧರಿಸಿರುವ ಆರ್‌ಸಿಬಿ ಹೊಸ ಬ್ಯಾಕ್‌ರೂಮ್ ಸಿಬಂದಿಯನ್ನು ಹುಡುಕುತ್ತಿದೆ ಎಂಬ ವಿಚಾರ ಕೇಳಿ ಬಂದಿದೆ.

ಫ್ರಾಂಚೈಸಿಯು ಹೊಸ ತರಬೇತುದಾರರನ್ನು ಹುಡುಕುತ್ತಿದೆ ಎಂದು ಮಾಧ್ಯಮಗಳಲ್ಲಿ ಚರ್ಚೆಯಾಗಿದೆ. ಆದರೆ ತಂಡ ಬೌಲಿಂಗ್ ಕೋಚ್ ಆಡಮ್ ಗ್ರಿಫಿತ್ ಅವರೊಂದಿಗೆ ಮುಂದುವರಿಯುತ್ತದೆಯೋ ಎಂಬುದು ಸ್ಪಷ್ಟವಾಗಿಲ್ಲ.

ಹೆಸ್ಸನ್ ಮತ್ತು ಬಂಗಾರ್ ಅವರು ವಿರಾಟ್ ಕೊಹ್ಲಿಯವರೊಂದಿಗೆ ಉತ್ತಮ ಒಡನಾಟವನ್ನು ಹೊಂದಿದ್ದು ಐದು ವರ್ಷಗಳ ಕಾಲ ತಂಡದೊಂದಿಗಿದ್ದಾರೆ.

ವಿಶ್ವದ ಅತ್ಯಂತ ನೆಚ್ಚಿನ ಕ್ರೀಡಾ ಫ್ರಾಂಚೈಸಿಗಳಲ್ಲಿ ಒಂದಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸತತವಾಗಿ 16 ಸೀಸನ್‌ಗಳಲ್ಲಿ ಐಪಿಎಲ್ ಪ್ರಶಸ್ತಿಯನ್ನು ಗೆದ್ದಿಲ್ಲ. ಅಭಿಮಾನಿಗಳು ಪ್ರತಿ ವರ್ಷವೂ ಈ ಸಲ ಕಪ್ ನಮ್ಮದೇ ಎಂದು ಹೇಳಿಕೊಂಡರೂ ಹೆಚ್ಚಿನ ಋತುಗಳಲ್ಲಿ ಲೀಗ್‌ನಲ್ಲಿ ಅತ್ಯುತ್ತಮ ತಂಡಗಳಲ್ಲಿ ಒಂದಾಗಿದ್ದರೂ ಫ್ರಾಂಚೈಸಿಗೆ ಟ್ರೋಫಿಯನ್ನು ಪಡೆಯಲು ಸಾಧ್ಯವಾಗಿಲ್ಲ. 2016 ರ ಫೈನಲ್ ಪಂದ್ಯದಲ್ಲಿ ಆರ್ ಸಿಬಿ ಸನ್‌ರೈಸರ್ಸ್ ಹೈದರಾಬಾದ್‌ ಎದುರು ಸೋತಿದ್ದನ್ನು,ಪ್ರಶಸ್ತಿಯನ್ನು ಗೆಲ್ಲುವ ಹತ್ತಿರಕ್ಕೆ ಬಂದಿತ್ತು.