ರಥಬೀದಿ ವೀರ ವೆಂಕಟೇಶನಿಗೆ ಸ್ವರ್ಣ ಗರುಡ ವಾಹನ

ಮಂಗಳೂರು: ರಥಬೀದಿಯ ಶ್ರೀ ವೆಂಕಟರಮಣ ದೇವರ ಸಮರ್ಪಣೆಗೆ ಚಿನ್ನದ ಗರುಡ ವಾಹನ ಸಿದ್ಧಗೊಂಡಿದೆ. ಈ ಚಿನ್ನದ ಗರುಡ ವಾಹನವನ್ನು ಕಲಾತ್ಮಕವಾಗಿ ಸುಂದರ ವಿನ್ಯಾಸಗಳೊಂದಿಗೆ ಕಾರ್ಕಳ ತಾಲೂಕಿನ ಘಾಜಿನಡ್ಕದ ಶಿಲ್ಪಿ ಡಿ.ಪಿ. ಸುದರ್ಶನ ಚಿಪ್ಳೂಣRರ್‌ ಅವರ ಶ್ರೀ ಸಿದ್ಧಿವಿನಾಯಕ ಎಕ್ಸ್‌ಪೋರ್ಟ್‌ (ಕಲಾ ಕೇಂದ್ರ)ದಲ್ಲಿ ತಯಾರಿಸಲಾಗಿದೆ.
4 ಅಡಿ ಎತ್ತರದ ಗರುಡ ವಾಹನವನ್ನು ಸುಮಾರು 8 ಕೆಜಿ ಚಿನ್ನ 7 ಕೆಜಿ ಬೆಳ್ಳಿಯನ್ನು ಉಪಯೋಗಿಸಿ 10 ಕುಶಲಕರ್ಮಿಗಳ ತಂಡ 60 ದಿನಗಳ ಅವಧಿಯಲ್ಲಿ ತಯಾರಿಸಿದೆ. ಅತ್ಯಂತ ಸೂಕ್ಷ್ಮ ಉಬ್ಬು ಶಿಲ್ಪ, 9 ನಾಗನ ಹೆಡೆಗಳು ಹಾಗೂ ಅನಂತಶಯನದ ಶಿಲ್ಪ ಹೊಂದಿರುವ ಪದಕವನ್ನು ಇದರಲ್ಲಿ ಕಲಾತ್ಮಕವಾಗಿ ಮೂಡಿಸಲಾಗಿದೆ.
ಗುರುಗಳಾದ ಶ್ರೀ ಕಾಶೀ ಮಠಾಧೀಶ ಶ್ರೀಮತ್‌ ಸಂಯಮೀಂದ್ರತೀರ್ಥ ಸ್ವಾಮೀಜಿ ಅವರಿಂದ ಮೇ 16ರಂದು ಈ ಗರುಡ ವಾಹನವು ಶ್ರೀ ವೀರ ವೆಂಕಟೇಶನಿಗೆ ಸಮರ್ಪಣೆಗೊಳ್ಳಲಿದೆ.
ಈ ಶಿಲ್ಪಕಲೆಯ ರೂವಾರಿ ಡಿ.ಪಿ. ಸುದರ್ಶನ ಚಿಪ್ಳೂಣRರ್‌ ಅವರು ಶಿಲ್ಪಕಲಾ ಅಕಾಡೆಮಿ ಪ್ರಶಸ್ತಿ ವಿಜೇತ ಶಿಲ್ಪಿ ದಿ| ಡಿ.ಪಿ. ದಿವಾಕರ್‌ ಚಿಪ್ಳೂಣRರ್‌ ಅವರ ಪುತ್ರ. ಕಳೆದ 30 ವರ್ಷಗಳಿಂದ ಲೋಹ ಶಿಲ್ಪದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಚಿನ್ನದ ಗರುಡ ವಾಹನ ತಯಾರಿಕಾ ಹೊಣೆಯು ಸಂಸ್ಥೆಗೆ ಆ ಭಗವಂತ ಕೊಟ್ಟ ಸೇವಾವಕಾಶ ಮತ್ತು ತಮ್ಮ ಶಿಲ್ಪಕಲೆಗೆ ದೊರೆತ ಪುರಸ್ಕಾರ ಎಂದು ಅವರು ತಿಳಿಸಿದ್ದಾರೆ.