ಕಪಿಲ್‌ದೇವ್‌ ಕುರಿತು ಚಲನಚಿತ್ರ: ರಣವೀರ್‌ ಸಿಂಗ್‌ ನಾಯಕ

ಹೊಸದಿಲ್ಲಿ: ಭಾರತಕ್ಕೆ 1983ರ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ ತಂದುಕೊಟ್ಟ ಕಪಿಲ್‌ದೇವ್‌ ಜೀವನಚರಿತ್ರೆ ಆಧಾರಿತ ಚಲನಚಿತ್ರ ನಿರ್ಮಾಣವಾಗಲಿದೆ. 

ಬಾಲಿವುಡ್‌ ತಾರಾ ನಟ ರಣವೀರ್‌ ಸಿಂಗ್‌ ಕಪಿಲ್‌ದೇವ್‌ ಪಾತ್ರದಲ್ಲಿ ಅಭಿನಯಿಸಲಿದ್ದಾರೆ. ಚಿತ್ರ ಹಿಂದಿಯಲ್ಲಿ ನಿರ್ಮಾಣವಾಗಲಿದ್ದು, ಕಬೀರ್‌ ಖಾನ್‌ ನಿರ್ದೇಶನ ಮಾಡಲಿದ್ದಾರೆ. ಈ ಬಗ್ಗೆ ಪ್ರತಿಕ್ರಿಯಿಸಿದ ಕಬೀರ್‌ ಖಾನ್‌, ನಾವು ಕಪಿಲ್‌ದೇವ್‌ ಕುರಿತು ಚಿತ್ರ ಮಾಡಲು ತೀರ್ಮಾನಿಸಿದ್ದೇವೆ. ಸ್ಕ್ರಿಪ್ಟ್ ವರ್ಕ್‌ ನಡೆಯುತ್ತಿದೆ. 

ಕಪಿಲ್‌ದೇವ್‌ ಪಾತ್ರದಲ್ಲಿ ನಮ್ಮ ಮೊದಲ ಆಯ್ಕೆ ರಣವೀರ್‌ ಸಿಂಗ್‌ ಆಗಿದ್ದಾರೆ. ಆದರೆ ಉಳಿದ ಪಾತ್ರಗಳ ಆಯ್ಕೆ ನಡೆದಿಲ್ಲ ಎಂದು ತಿಳಿಸಿದ್ದಾರೆ. ಕಪಿಲ್‌ದೇವ್‌ ನೇತೃತ್ವದಲ್ಲಿ ಭಾರತ ತಂಡ 1983ರ ವಿಶ್ವಕಪ್‌ ಗೆಲುವು ಪಡೆದಿದೆ. ಇದು ಭಾರತಕ್ಕೆ ಸಿಕ್ಕ ಮೊದಲ ವಿಶ್ವಕಪ್‌ ಆಗಿದೆ. ಈಗಾಗಲೇ ಬಾಲಿವುಡ್‌ನ‌ಲ್ಲಿ ಕ್ರಿಕೆಟಿಗರಾದ ಎಂ.ಎಸ್‌.ಧೋನಿ, ಮೊಹಮ್ಮದ್‌ ಅಜರುದ್ದೀನ್‌, ಸಚಿನ್‌ ತೆಂಡುಲ್ಕರ್‌ ಜೀವನಚರಿತ್ರೆ ಚಿತ್ರಗಳು ಬಂದು ಯಶಸ್ಸುಗಳಿಸಿವೆ.