ಕ್ರೀಡಾ ನಿಯೋಗ ಮುನ್ನಡೆಸಲಿರುವ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌

ಹೊಸದಿಲ್ಲಿ: ಆಸ್ಟ್ರೇಲಿಯದ ಗೋಲ್ಡ್‌ ಕೋಸ್ಟ್‌ನಲ್ಲಿ ನಡೆಯಲಿರುವ 2018ರ “ಕಾಮನ್ವೆಲ್ತ್‌ ಗೇಮ್ಸ್‌’  ಕ್ರೀಡಾಕೂಟದಲ್ಲಿ ಪಾಲ್ಗೊಳ್ಳಲಿರುವ ಭಾರತದ ಕ್ರೀಡಾ ಸಚಿವಾಲಯ ಸಮಿತಿಯ 7 ಸದಸ್ಯರ ನಿಯೋಗವನ್ನು  ಕ್ರೀಡಾ ಸಚಿವ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌ ಮುನ್ನಡೆಸಲಿದ್ದಾರೆ.

ಸಚಿವಾಲಯವು ಅನುಮೋದನೆಗಾಗಿ ಸಲ್ಲಿಸಿದ್ದ ಗೇಮ್ಸ್‌ನಲ್ಲಿ ಪಾಲ್ಗೊಳ್ಳಲಿರುವ 8 ಮಂದಿ ಸಚಿವರು, ಮಂತ್ರಿಗಳ ಪಟ್ಟಿಗೆ ಶನಿವಾರ ಪ್ರಧಾನ ಮಂತ್ರಿಗಳ ಕಚೇರಿಯಿಂದ ಅನುಮೋದನೆ ದೊರೆತಿದೆ. ಪ್ರಧಾನ ಮಂತ್ರಿ ಕಚೇರಿಯಿಂದ ಬಂದಿರುವ ಉಪ ಕಾರ್ಯದರ್ಶಿ ವಿಜಯ್‌ ಕುಮಾರ್‌ ಮತ್ತು ಕ್ರೀಡಾ ಪ್ರಾಧಿಕಾರದ ನಿರ್ದೇಶಕ ಜನರಲ್‌ ರಾಹುಲ್‌ ಭಟ್ನಾಗರ್‌ ಅವರ  ಸಹಿಯುಳ್ಳ ಪತ್ರದ ಪ್ರಕಾರ, ಸಚಿವಾಲಯ ನಿಯೋಗ ತಂಡ ಭಟ್ನಾಗರ್‌ ಅವರೊಂದಿಗೆ ಶನಿವಾರ ರಾತ್ರಿಯೇ ಹೊರಟಿದ್ದು, ತಂಡದ ಪ್ರವಾಸ ಎ. 2ರಿಂದ 7ರ ವರೆಗೆ ನಡೆಯಲಿದೆ.

ಕ್ರೀಡಾ ವಿಭಾಗದ ಆಡಳಿತಾಧಿಕಾರಿ ಧೀರಜ್‌ ಸಿಂಗ್‌ ಅವರೊಂದಿಗೆ ರಾಜ್ಯವರ್ಧನ್‌ ಸಿಂಗ್‌ ರಾಥೋಡ್‌ ಎ. 8-15ರ ವರೆಗೆ ಗೋಲ್‌ ಕೋಸ್ಟ್‌ನಲ್ಲಿ ಇರಲಿದ್ದಾರೆ. ಕ್ರೀಡಾ ಸಹ ಕಾರ್ಯದರ್ಶಿ ಇಂದರ್‌ ದಮಿಜ ಮತ್ತು ಕ್ರೀಡಾ ಕಾರ್ಯದರ್ಶಿ ಎಸ್‌.ಪಿ.ಎಸ್‌. ತೋಮರ್‌ ಅವರಿಗೆ ಎ. 4ರಿಂದ 9ರ ವರೆಗೆ ಸ್ಥಳದಲ್ಲಿರಲು ಅವಕಾಶ ನೀಡಲಾಗಿದೆ. ಸಾಯ್‌ನ ಡಿ.ಜಿ. ನೀಲಮ್‌ ಕಪೂರ್‌ ಮತ್ತು ಜಂಟಿ ಕಾರ್ಯದರ್ಶಿ ಪಂಕಜ್‌ ರಾಗ್‌ ಎ. 10ರಿಂದ 15ರ ತನಕ ಗೋಲ್ಡ್‌ ಕೋಸ್ಟ್‌ನಲ್ಲಿ ಉಪಸ್ಥಿತರಿರುವರು.