ರಾಜ್ಯಸಭಾ ಚುನಾವಣೆ ಮುಂದೂಡಲು ಆಯೋಗ ನಿರ್ಧಾರ

ಹೊಸದಿಲ್ಲಿ: ಮಾ. 26ರಂದು ನಿಗದಿಯಾಗಿದ್ದ ರಾಜ್ಯಸಭಾ ಚುನಾವಣೆಯನ್ನು ಮುಂದೂಡಿರುವುದಾಗಿ ಚುನಾವಣ ಆಯೋಗ ಮಂಗಳವಾರ ತಿಳಿಸಿದೆ. ಕೊರೊನಾ ಹಿನ್ನೆಲೆಯಲ್ಲಿ ಜವಾಬ್ದಾರಿಯಿಂದ ನಡೆದುಕೊಳ್ಳುವ, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ಹೊಣೆಗಾರಿಕೆ ಎಲ್ಲರ ಮೇಲಿರುವುದರಿಂದ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.

ಮಾ. 31ರ ಅನಂತರ ಚುನಾವಣೆಯ ದಿನಾಂಕದ ಕುರಿತು ನಿರ್ಣಯ ಕೈಗೊಳ್ಳಬೇಕು  ಎಂದು ಚುನಾವಣಾ ಆಯುಕ್ತರಾದ ಅಶೋಕ್‌ ಲಾವಸ ಮತ್ತ ಸುಶೀಲ್‌ ಚಂದ್ರ ಅವರ ನೇತೃತ್ವದಲ್ಲಿ ನಡೆದ ಸಭೆಯಲ್ಲಿ ಈ ನಿರ್ಣಯ ತೆಗೆದುಕೊಳ್ಳಲಾಗಿದೆ. ಈ ವಿಷಮ ಪರಿಸ್ಥಿತಿಯಲ್ಲಿ ನಾವು ಶಾಸಕರನ್ನು ತೊಂದರೆಗೀಡುಮಾಡಬಾರದು. ಚುನಾವಣ ಪ್ರಕ್ರಿಯೆಗೆ ಅಗತ್ಯವಾಗಿ ಚುನಾವಣ ಅಧಿಕಾರಿಗಳು ಮತ್ತು ಸಿಬಂದಿ ಒಂದೆಡೆ ಸೇರ ಲೇಬೇಕಾಗುತ್ತದೆ.

ಸಾರ್ವಜನಿಕರ ಆರೋಗ್ಯ ದೃಷ್ಟಿಯಿಂದ ಒಂದೆಡೆ ಗುಂಪು ಸೇರುವುದು ಅಪಾಯವಾದ್ದರಿಂದ ಚುನಾವಣ ಆಯೋಗ ಚುನಾವಣೆ ಮುಂದೂಡಲು ಸ್ವತಂತ್ರವಾಗಿ ನಿರ್ಧಾರ ತೆಗೆದುಕೊಂಡಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.